祐漢市政綜合體

祐漢市政綜合體（葡文：Mercado Municipal do Bairro Iao Hon），俗稱祐漢街市，位於澳門祐漢市場街，響1994年1月28號起好，由當時嘅澳督韋奇立主持揭幕儀式。

成個市政綜合體包含街市、固定小販區、市政公園、體育中心、停車場同社區活動中心。

背景

因為祐漢區長年係低收入同失業人士聚居嘅地方，澳門回歸之前有人響公園入面開大戲，但係因為公園附近都係民居，引嚟附近居民投訴嘈音問題，但當局執法不嚴奈佢哋唔何。

到2004年底響街市一樓嘅粵曲中心對外開放，加上公園開始整治工程，情況先緩和返。

祐漢街市市政綜合大樓，俗稱祐漢街市，有四層樓高旁邊有一座群樓，大樓以紅色做主色。

天台	籃球場、羽毛球場
三樓	民政總署祐漢活動中心、街總活動中心
二樓	賣肉類、家禽、急凍嘢食、可以去另一座祐漢街市大樓群樓、祐漢小販大樓
一樓	賣菜、豆類食品、可以去另一座祐漢街市大樓群樓
地下	賣乾貨、魚、海鮮

響祐漢街市隔離嘅廣場，有五千平方米左右，早期只係有噴水池同石椅，到1999年5月起增加種樹，而且改建舞台。

為咗解決附近唔夠泊車位，民政總署響2005年5月23號將公園關閉，用嚟起三層地下停車場，提供四百個輕型汽車同四百個電單車泊位，宜家已經起好開放畀市民使用。

2006年，由於居民意見同消防問題，民政總署研究將街市側邊嘅小販區改建做永久性大樓方案，加上後嚟因為祐漢公園搞緊改造工程導致小販區傾斜，所以將原來小販區拆卸，同時起過五層樓高嘅小販大樓，而大樓響2008年開工，響2012年陸續啟用。