福岡市博物館

福岡市博物館

福岡fuk1 gong1市博物館（日文：福岡市博物館ふくおかしはくぶつかん^{(Fukuoka shi hakubutsukan)}）係一間喺日本福岡嘅市立博物館。佢喺1990年開張，取替咗福岡市立歷史資料館，展出福岡嗰頭嘅歷史、民俗同考古發現。博物館嘅鎮館之寶係日本國寶漢委奴國王印，其他出名嘅藏品仲包括「日本號」長槍，同埋「箭號」日本國產車。福岡市博物館係福岡市一帶嘅主要旅游景點之一。

歷史

福岡市博物館前身係福岡市立歷史資料館，喺1989年福岡市搞亞洲太平洋博覽會嗰陣攞過佢嚟做主題展廳。但係因為地方太細嘅關係，喺亞太博覽會完咗之後冇耐佢就開始閂門裝修，直到1990年10月福岡市博物館先至正式開館。館藏入面有一批叫做「黑田資料」嘅文物同文獻就係喺開館嗰陣由福岡市美術館移交過嚟嘅，連作為鎮館之寶嘅漢委奴國王印都喺呢批文物入面。另外，博物館嘅常設展覽喺2013年更新過。

建築設計

博物館大堂

福岡市博物館嘅所有設施加埋佔地差唔多5萬平方米，其中博物館主樓係一棟正正方方嘅建築物，每邊邊長大約100米。一行到入去就會見到好闊落嘅大堂，屋頂用咗拱形嘅玻璃設計。同其他博物館嘅陰暗形象唔同，福岡市博物館個大堂用咗好多玻璃去大量採光，營造光猛、友善、平靜嘅氛圍。除咗白色嘅天井側面有「博多織」傳統圖案嘅浮雕之外，大堂仲會按時按節擺啲公仔出嚟裝飾。呢啲公仔係西頭哲三郎整嘅，喺1989年亞太博覽會嘅「福岡鴻臚館」展館入面都有展出過。

博物館分咗兩層，展廳喺嗮二樓，除此之外二樓仲有「博多傳統工藝館」，同研習室、講堂之類設施。至於一樓就主要係檔案室同擺文物嘅倉庫，仲有一間學習體驗室、同埋紀念品舖頭等等。

博物館東面有停車場，南面對出就有一個2000平方米大嘅水池。博物館南邊正門出面仲有四座青銅雕像，係法國雕塑大師布爾代勒（法文：Antoine Bourdelle）嘅作品。呢四座3.75米高、1噸重嘅雕像開初係鑄出嚟用喺布爾代勒嘅代表作「阿維爾將軍紀念碑」（法文：Monument au général Alvear）嗰度嘅。後來，為咗慶祝福岡市成立100周年，就喺巴黎布爾代勒美術館嗰度買咗呢四座銅像擺喺度。

展覽同藏品

常設展覽

日本國寶漢委奴國王印

常設展覽展示咗福岡嘅歷史同當地人嘅生活。展覽總共分做十一個區，其中第一區專講鎮館之寶漢委奴國王印，而最尾嘅第十一區就係講「博多祇園山笠」嘅節日習俗嘅。至於剩返嗰九區就按住時間順序，由冰河時期開始、經過鴻臚館同福岡藩等嘅事跡、一路講到現代，詳細介紹福岡呢一帶嘅歷史。

常設展覽入面最出名嘅藏品就係漢委奴國王印。佢係喺倭奴國國王派使者來朝之後，後漢光武帝送畀佢嘅一隻金印信物，後來俾人埋咗喺福岡嘅志賀島，再喺1784年俾人發現返。呢粒金印作為證明日本歷史由來嘅文物，喺1931年已經被指定咗做日本國寶。除咗金印之外，福岡市博物館嘅出名藏品仲有號稱天下三名槍之一嘅「日本號」長槍，同埋作為機械遺產保存住嘅日本現存最舊國產車「箭號」（日文：アロー号）。

企劃展覽

企劃展覽主要係圍繞住唔同地方嘅歷史文化做嘅專題展，呢度啲展品每兩個月就會換一次。呢個展廳分咗做四間房，其中一間專門展出黑田家收藏嘅文獻同文物，包括每年1月同2月都會展出嘅日本國寶「圧切長谷部」刀、同「日光一文字」太刀。

以前喺企劃展廳搞過嘅展覽仲包括四君子植物畫展、日本南北朝時期動亂嘅專題展、福岡青銅器展、江戶時代盔甲展等等。

特別展覽

福岡市博物館每年會搞五、六場特別展覽，主題好廣，涉及到日本乃至世界各地嘅歷史民俗，有時仲會用流行文化做主題。同另外兩個展區唔同嘅係，參觀特別展覽需要另外買飛。

以前喺特別展廳搞過嘅展覽包括浮世繪三大巨匠作品展、龐貝壁畫展、鬼滅之刃原稿展、名偵探柯南科學主題展等等。

出面網頁

• 福岡市博物館首頁