約拿書
(由約納跳轉過嚟)
《約拿書》係《舊約聖經》嘅小先知書，天主教譯做《約納》，呢卷書體現咗耶和華公正對待地上所有嘅人，只要壞人改邪歸正，佢就樂意畀佢哋機會悔改。
簡介
[編輯]作者：約拿
日期：公元前755年
地點：尼尼微
約拿書係一本以反諷形式講述一位先知自己嘅故事嘅書，呢卷書挑戰讀者係咪允許神愛讀者自己嘅仇敵。
內容講述先知約拿唔聽上帝嘅話，無去將上帝要毁滅尼尼微城嘅警告傳畀嗰處嘅人。尼尼微係以色列嘅敵人亞述帝國嘅首都，約拿因爲唔願意尼尼微人被拯救，所以唔肯去尼尼微城畀警告，就想偷偷走去他施。點知經過一連串戲劇性嘅事發生之後，約拿終於勉強服從命令，去咗尼尼微。尼尼微係一個需要三日先行得完嘅城，約拿只行咗一日，而且佢嘅警告喺希伯來文只有五個字，內容只有：再多四十日尼尼微就會被推翻，想藉此令尼尼微人唔悔罪而被毁滅。但尼尼微全城竟然因為佢嘅警告全城悔罪，上帝就因此願意寬恕尼尼微。最後約拿嘅警告係實現咗，全個城係被推翻，只不過唔係以約拿所諗嘅方式。約拿最後因為唔滿意個結果而向上帝大發脾氣，上帝借由蓖麻一事令約拿感同身受，藉此說明神同樣愛惜尼尼微城嘅人民。
呢卷書講明上帝對被造物有絕對嘅主權。不過更強調上帝係愛同憐憫嘅上帝，甚至願意寬恕並且拯救佢子民嘅仇敵，而唔願意懲罰，毁滅佢哋。佢呼喚以色列悔改，重提醒佢哋嘅使命係要使萬民都接受上帝嘅慈愛同赦免。
提要
[編輯]- 約拿嘅蒙召同違命（1章1-17節）
- 約拿悔改，得到拯救（2章1-10節）
- 約拿警告尼尼微（3章1-10節）
- 上帝憐憫尼尼微（4章1-11節）