編輯 (工序)

  呢篇文講出版業嘅一種工序。想搵第二個意思嘅話，請睇編輯 (搞清楚)。

編輯係泛指針對文章、詩體或者故仔嘅各種改善工作，概念上同校對有少少重叠，但係原則上編輯同校對係唔同嘅工序。喺出版業，編輯亦都指釐定書、期刊、網站等等出版物嘅大方向、管理出版物嘅出街過程、決定收錄乜嘢文章等等。做編輯嘅人一樣都係叫編輯。

文字嘅編輯未必係直接改文。有啲類型嘅編輯只係嘜maak1低啲問題或者寫報告；如果喺編輯期間發現咗職責範圍以外嘅問題，亦只能夠係嘜低。

唔同語言對 ｢編輯｣ 嘅定義同分類都可能會有唔同，粵語亦唔例外；例如，英文講嘅 ｢editing｣ 同粵語講嘅 ｢編輯｣ 其實並唔係完全一樣。

主要分類

唔同語言（甚至同一語言但係唔同國家）對編輯嘅定義同分類都可能會有出入。文字上嘅編輯，按照英文圈嘅業內準則，性質上大致可以咁分：

• 針對結構（developmental editing 或者 structural editing），例如加料、成段成章鏟、段落掉位、改善情節或者大綱等等
• 針對文筆（stylistic editing），包括鏟行話、將太難明嘅字眼簡化或者掉轉，將太通俗嘅字眼改成正式啲嘅寫法等等
• 針對文法（copy editing，粵語通常叫校對），包括改錯別字、修正文法、修正格式、改標點等等，可能亦都包括例如核實內容等等
• 針對翻譯（comparative editing，粵語通常叫校對），指譯文同原文一齊睇，測cek1下有冇譯錯，同錯咗就改返啱
• 校對（proofreading），技術上並唔係一種編輯

結構上嘅編輯通常唔會直接改文，而係嘜低或者寫報告；詩體亦都係一樣，除非事先講明，直接改詩係大忌，只能夠嘜低疑似問題，問（query）個作者係特登寫成咁定真係錯咗。

針對文法嘅編輯，有啲人會叫 ｢審稿｣，但係其實好少人咁叫；喺粵語同中文，實際上通常係叫校對。例如，香港賽馬會對 ｢校對｣ 嘅定義係包括糾正，但係按英文圈嘅業內準則，校對員只可以嘜低問題，如果要糾正嘅就唔係校對，係針對文法嘅編輯。翻譯亦有同樣問題​——​按照英文圈嘅業內準則，譯完文睇下有冇錯，錯咗就改，係編輯；但係粵語同中文，都通常叫校對。

睇埋

• 編輯，做編輯嘅人
• 剪接，影片嘅對應工序
• 混音，錄音嘅對應工序