全民免疫

群體免疫模型

  紅色：感染者

  藍色：無免疫力者

  黃色：有免疫力者

群體免疫 (粵拼：kwan4 tai2 min5 yik6) 又叫全民免疫 (粵拼：chyun4 man4 min5 yik6)（英文：herd immunity 或者 community immunity）係指人或者動物群體中有好大比例對傳染病獲得免疫力，令其他無免疫力嘅個體因此受到保護而唔會被傳染。擁有抵抗力嘅個體比例越高，易感個體同受感染個體間接觸嘅可能性就越細，喺個體間傳播嘅疫病感染鏈就容易切斷，令疫病結束廣泛傳播、發病人數大量減少、流行病轉為地方病或者消失，進而達到群體免疫。獲得群體免疫嘅方法，概分為自然獲得同人為獲得。

所謂「自然群體免疫」（唔採取人為干預由得疫病自然傳播）嘅策略要實現，需要基本傳染數（R₀）低、死亡率低、病毒變異率低、病毒變異能力增強率低（包括毒力改變、條件致死嘅改變、宿主適應性嘅改變等）、地方人口少、地方面積細、人口平均健康水平高、康復後終生免疫率高等嘅因素配合，所以呢個策略受到各方科學家嘅爭議，並無足夠科學證據證實呢個講法嘅可靠性同可實踐性；依家認為呢種策略唔道德且唔可行，會導致不必要嘅死亡。

案例

• 歐洲喺應對傳染力高、死亡率低嘅流行病時一般採取自然群體免疫策略^{[來源請求]}，即係透過社區染病（水痘、手足口病等），以致大部分居民對病原免疫，達到群體免疫效果；對於死亡率高嘅流行病就採用人為群體免疫策略，令到免疫功能健全嘅居民接種疫苗（天花、麻疹、結核病等）。

• 2020年3月初，英國有專家同政府官員喺應對武漢肺炎英國疫情時建議採取自然群體免疫策略，引起國內外嘅爭議。不過由3月23號開始，英國政府宣佈開始進入為期3星期嘅全國封城防疫狀態，後宣佈延長至5月7號。呢個反映英國政府最終未有採用自然群體免疫策略，而係以限制社交距離措施防止病毒喺社區擴散。