荃灣天后宮
22°22′23″N 114°07′17″E / 22.37306°N 114.12139°E
荃灣天后宮又叫蕙荃路天后宮，舊時叫荃灣廟崗天后宮，喺香港新界荃灣區蕙荃路，原本喺三棟屋村。由於起荃灣線，1984年搬去綠楊新邨對出嘅位置。 喺1995年被古物古蹟辦事處評為二級歷史建築，2009年12月18號確認評級。
史[編輯]
荃灣天后宮原本喺石圍角嘅南面，舊名烏石崗嘅地方，喺清朝康熙年間起，由鄉人夾錢起，初期起廟分為三間，中間係正殿供奉天后神像，旁邊東西兩廂設置太歲祠。乾隆八年（1743年）信士黎卿上送咗一個重逾百斤嘅銅鐘，而家仍然掛咗喺廟裏面。
道光丙午（1846年）首次修葺，至光緒庚子（1900年）因為廟宇用得太耐，又受到白蟻同風雨嘅侵蝕，經過鄉中父老發起再次修葺，民國七年（1918年）第三次修葺，同年9月15號進行開光。經歷60年之後廟貌又見頹廢，發起四次修葺，喺1976年11月動工至翌年2月間完工。
1978年香港政府起地下鐵路荃灣綫伸展至荃灣，要喺廟前面掘一道深坑用嚟起護土牆，嚴重影響間廟嘅地基，當時地方鄉紳組成「重修天后宮委員會」專門負責理民府同地下鐵路公司會議並監督修建工程，喺1983年開始動工重建，並喺廟前面加建一座牌樓同東西兩廊，至翌年秋季全部工程完成，擇吉日喺1984年12月12號舉行重修開光大典。
建築[編輯]
門額寫住「天后宫」三個字，保存乾隆九年（1744年）鑄造嘅大鐘同光緒廿六年（1900年）碑石一塊。門聯：「聖德宏深敷海國，母儀敦厚載蒼生」。