西九文化區
![](http://upload.wikimedia.org/wikipedia/commons/thumb/d/d7/WKCD_Site_view_201702.jpg/220px-WKCD_Site_view_201702.jpg)
西九文化區(英文:West Kowloon Cultural District,縮寫:WKCD)前身係西九龍文娛藝術區,位於香港西九龍填海區臨海地段(西九龍最南端,由填海形成嘅大概40公頃土地,面向維多利亞港,由廣東道伸延至西區海底隧道入口一帶,北至柯士甸道),將會係集結一系列世界級文化、藝術、潮流、消費同大眾娛樂為一體嘅綜合文化主要場地,核心設施包括劇院、博物館、演藝場館、劇場同廣場等,共17座,旨意提高香港文化嘅水平同世界地位[1]。此外,西九文化區包含長兩公里嘅海濱長廊,並且將會設有佔地23公頃嘅西九公園。
願景
[編輯]坐落維多利亞港海旁嘅西九文化區,係全球規模最大嘅文化項目之一,集藝術、教育同公共空間於一身。西九文化區嘅願景,係為香港創造一個多姿多彩嘅文化地帶,促進香港藝術界互動、合作同發展。區內將有佔地二十三公頃嘅公共空間,同埋長達兩公里、充滿活力嘅海濱長廊,並設有各種文化藝術設施,上演世界級展覽、表演節目同文化藝術活動。
發展進程
[編輯]西九文化區嘅發展計劃,以世界知名建築規劃團隊Foster + Partners嘅概念圖則為基礎,並喺2013年1月由行政長官會同行政會議核准。俯瞰壯麗維多利亞港嘅西九文化區,將分階段發展,逐步展現公眾眼前,並喺未來十年初具規模。
第一期工程包括戲曲中心、M+、自由空間同M+展亭,呢啲場地喺2016開始逐步啟用。戲曲中心嘅建築工程,已經喺2013年9月開始動工,標誌住整個發展計劃踏入新里程。
第二期工程包括演藝劇場、中型劇院、當代藝術中心同駐區藝團中心,其餘位於文化區中央部分嘅設施,將會喺綜合地庫工程完成嘅時候興建。
現有場地同空間
[編輯]![](http://upload.wikimedia.org/wikipedia/commons/thumb/c/ca/M_pavilion_201607.jpg/220px-M_pavilion_201607.jpg)
![](http://upload.wikimedia.org/wikipedia/commons/thumb/8/8b/WKCD_Nursery_site_overview_2016.jpg/220px-WKCD_Nursery_site_overview_2016.jpg)
M+展亭
[編輯]M+展亭已經喺2016年9月9號開幕。喺M+博物館大樓落成之前,M+展亭會係M+舉辦展覽同活動嘅主要場地。而喺M+大樓啟用之後,展亭將成為藝術家、設計師同其他機構喺西九藝術公園內舉辦小型獨立展覽同活動嘅空間。
竹翠公園(前苗圃公園)
[編輯]苗圃公園2015年啟用,作臨時公園用途。苗圃公園係一個人人共享嘅公共空間,公眾可以喺綠草如茵嘅環境下輕鬆寫意噉進行各種休閒活動,隨意喺公園散步,或踩住單車漫遊海濱長廊;更可以喺草地上同寵物玩,同家人好友野餐聚會,體驗幾年之後落成嘅西九公園。
除咗提供公共空間之外,苗圃公園亦將會係每個月第二個星期日舉行定期節目「自由約」,為觀眾帶來各式街頭表演、創意市集、現場音樂同特別策劃的節目,畀你率先體驗將來嘅西九文化區,同埋未來西九公園裏面自由空間嘅表演同活動。
苗圃公園係培植唔同樹木同植物嘅試驗場,係愛好樹木同植物嘅朋友嘅一個好去處。公園將會因應生長習性、樹木形態、樹葉嘅形狀、季節性嘅顏色變化,栽種以下四個類別的植物:
- 海濱:種植常見於海岸或濱臨水邊地帶嘅耐鹽植物。
- 林地:種植常見於香港郊外嘅香港原生植物,樹種隨住季節變化展現唔同色彩,樹葉同果實亦各具特色。
- 城市森林:種植耐陰植物,植物樹形優美、分枝茂盛,啲人可以喺樹冠下寬敞嘅空間裏面自由行走,進行各式活動。
- 果林:種植常見於香港同東南亞地區嘅果樹。呢啲果樹建議栽種喺幼樹苗圃,用嚟試驗同教育用途。
苗圃公園南面位置隨香港故宮文化博物館工程而喺2018年停用,北面位置喺2022年定名做「竹翠公園」,提供容納六千人嘅戶外表演場地。
戲曲中心
[編輯]為戲曲而設嘅世界級表演場地。
M+
[編輯]視覺文化博物館,重點展出20至21世紀嘅藝術、設計、建築同影像。
西九藝術公園
[編輯]新嘅藝術公園將成為文化區嘅綠色心臟地帶,種植多種樹木同植物,兼有遼闊嘅草坪畀大眾輕鬆自在噉休憩同享樂。
自由空間
[編輯]自由空間坐落喺西九藝術公園嘅中央位置。呢個場地將為跨界別節目提供一個靈活嘅表演空間。
發展計劃場地
[編輯]演藝綜合劇場
[編輯]演藝綜合劇場係一個上演香港同國際優秀舞蹈同戲劇製作嘅頂級表演藝術場地,預計2025年啟用。
出面網頁
[編輯]參考
[編輯]- ↑ 立法會CB(1)161/03-04號文件立法會秘書處 議會事務部1 2003年10月27號