西門口 (廣州)

  呢篇文講廣州市嘅西門口。想搵同名嘅景區景點或設施嘅話，請睇西門口。

西門口（粵拼：sai1 mun4 hau2）係廣州市越秀區西邊一笪地方，呢個地方喺中山七路、中山六路同埋人民中路、人民北路嘅交界附近。「西門口」呢個名其實早就喺明朝同埋清朝嗰陣時就有喇。

史

有資料記載，舊陣時嘅廣州城係好細嘅，其中除咗南邊有依家珠江邊嘅「天字碼頭」外，凈低嘅三個方向（東、西、北）都係畀城牆包圍住。其中東邊就係依家越秀中路附近嘅「大東門」；西邊就係去到依家人民中路同埋人民北路之間嘅「西門口」；而北邊就係去到依家環市中路附近嘅「小北門」。出入廣州城嘅話就要行過城門先至得。而西門口嘅城門就係喺明朝同埋清朝嗰陣時，百姓成日行嘅主要出入口。而老百姓出入廣州城嗰陣，必須要攞出啲嘢嚟做典當，而啲典舖就喺城門附近。

清朝

到咗清朝嘅乾隆時期，由於乾隆好鍾意玩海禁（因為啲鬼佬成日玩鴉片仔就唔識做嘢），就凈係得廣州可以通商。嗰陣時嘅清朝，由於成日對商人有意見，成日嘭曬啲商人走佬，唔畀入城，搞到啲商人凈係喺西門口出面做買賣生意。而畀人嘭走嘅嗰啲商人，就開咗間洋行嚟逐漸帶旺週邊嘅市場，卒之成為而家嘅「十三行」。而喺朱海仁嘅印象入面，清朝時起嘅寶生大押就係噉起咗喺城門外出。佢同大東門啱啱好對正，結果嗰陣時，就噉出咗廣州城嘅第三大當鋪。而喺西門口附近嘅一帶，就係紡織工業區。

中華民國

喺20世紀20年代嗰陣時，由於陳濟棠主粵、大興土木開馬路，就起咗座西南鐵橋（依家珠江大橋個位）嚟連接粵西。結果西門口城門就噉畀人拆咗。但係拆咗之餘，路都一直未搞好，成日爛融融，直到解放之後先至搞掂。喺嗰陣時，呢個地方主要係以賣棺材同埋殯葬服務用品為主嘅市場。

中華人民共和國

• 1959年，中山八路開通。
• 改革開放（1978年）之後，廣州市政府就喺呢度拓寬兼整埋中山七路。
• 20世紀80年代，金花街道成為咗廣州市第一條舊城改造嘅街，後嚟畀人規劃起成8——9層樓嘅建築。
• 20世紀90年代，高度有廿到卅、卌層樓嘅建築都嚟起喇。
• 依家，西門口廣場、越秀新都會大廈、捷泰廣場等呢啲大批嘅寫字樓或者係特色市場喺週邊出嗮嚟。

著名景點

西門口甕城遺址

内文：西門口甕城遺址

呢處遺蹟以前係廣州為咗防禦出面嘅入侵者而起嘅西門口甕城，而家就匿埋喺一大片樹木入面。而家嗰度有好多美人蕉、木瓜樹、木棉樹、鐵樹呢啲植物，搞到啲人好難睇到原嚟係點嘅樣。如果隔離冇文物保護招牌喺度嘅話，可能重有啲人話：「呢度係一間唔開畀啲人入去玩嘅公園啊。」

其實喺1996年，廣州市文物考古研究所就喺呢度發現咗明代嘅西城門甕城遺址喇。而甕城遺址就係拱衛城門，南北長50幾米，東西闊18米，中間部份埋咗喺中山七路地底。南北兩部分喺地面，畀啲民居冚住嗮，重有一部分嘅城牆喺長庚首約2號通去出面馬路嘅樓梯度。結果搞到好多攝影家成日嚟呢度影相，直到為咗迎接亞運會。城牆上面，重印咗有關單位嘅瓷磚添。

光孝寺同埋光孝堂

内文：光孝寺 (廣州)同光孝堂

成日民間有話：「未有羊城，先有光孝。」其實光孝寺就係廣州年代最早、規模最大嘅佛教名寺。從光孝寺出嚟一直向南行100米就係光孝堂啦。如估攞光孝寺嚟對比下，其實光孝堂嘅建築風格係中西結合嘅，佢用咗意大利批蕩，喺1924年11月11號，呢間嘢起好咗，重改咗名叫「中華基督教會光孝堂」。喺晚黑嗰陣如估輕輕咁推開棟鐵門嘅話，堂入面嘅歌聲就出嗮嚟喇。而跟住啲聲，重端跩住好暗嘅燈光去到主堂入面，會發現一堆成年嘅男女喺度睇住女指揮嘅手勢嚟跟住佢去唱歌（重要好大聲噉滯）。而鋼琴就好似風噉優雅，歌聲好似海洋噉闊，想搵個位坐低咋，噉就過咗一日喇。

寶生大押

内文：寶生大押

寶生大押係清朝建築。而呢棟好似棟炮樓噉嘅建築呢，以前係廣州市入面嘅最高建築。其實呢棟碉樓喺文革嗰陣時，曾經畀間廠霸咗嚟開工，後嚟先至畀主人收返。後嚟畀人裝修乾淨，之後嘅碉樓到依家為止，都好少人見到佢開畀出面啲人入去睇，喺朱紅色嘅木門上面，重鋪咗埐好厚嘅灰塵。而呢種落寞呢，就有時吸引咗啲過街行人嚟睇，話點解佢會咁神秘嘅。

西華路美食

内文：西華路 (廣州荔灣)

喺西門口嘅西北邊有條「西華路」，而呢度係本土「夜貓」好鍾意去食宵夜嘅地方。喺晚飯嗰陣一直到深夜，啲人氣都冇降過咁滯，甚至係重越嚟越HIGH添。究竟係點解？因為附近有一大片居民區，加上條路重有好多食檔同埋大排檔。附近亦有唔少嘅寫字樓同埋電腦城、眼鏡城嘅專業市場。

倫文敘紀念廣場

内文：倫文敘同倫文敘紀念廣場

喺西門口地鐵站嘅B出口附近，就有個牌坊響度，其實呢個係倫文敘紀念廣場嘅牌坊。喺明朝嗰陣，有位叫「倫文敘」嘅人雖然話出世嗰陣又窮又折墮，但係佢後嚟就變得好鬼猛嗰隻，就變咗廣州民間喺傳說入面成日話嘅「鬼才」就係講緊呢個人喇。呢個廣場響2010年12月起好。

附近嘅車站

• 廣州地鐵1號綫：西門口站
• 巴士：西門口（人民北路）站、西門口（中山六路）站