谷卓恒

谷卓恒（男；1972年5月5號—），中共中央黨校函授學院法律專業畢業，係個中國商人，身世神秘。本文所轉述，來自各方嘅資料，有大把亦真假難辨。

近年，谷卓恒由於渠自己傍旗下《成報》，指控中共傍香港嘅官員犯下嚴重惡行，被中（唔包括大陸）外傳媒關注；與此同時，大陸傳媒紛紛報道渠係美貸網案嘅主腦，正被通緝。

設定

據《大公報》起底，谷卓恒原名係谷建紅，籍貫山東濰坊，父母早年離異，又同老頭關係唔好，十幾歲就已經獨立……2014年申請改名作「谷卓恒」，用過羅至欣等名，可能精通葡語，聲稱有巴西居留權；前妻係籍貫遼寧嘅沈威（疑似2012年2月簽協議離婚），渠哋有兩個仔，細嘅谷文智或者參與過巴西演藝事業。沈威嘅父傍母分別係沈保昌傍馮素君。

政治

綜合《大公報》、《南方都市報》傍《經濟參考報》互相矛盾嘅報道：谷喺2014年8月向美國駐廣州領事館交資料，申請非移民簽證，有潛逃計劃；指控美貸網嘅報案，令深圳公安着手調查谷，到咗同年9月5號，發現渠有多張偽造嘅身份證傍軍官證，又擁有對應唔同身分嘅居民身份證傍辦咗商務簽注嘅港澳通行證，於是即刻拘留渠；翌日谷成功「取保候審」；出入境紀錄顯示，自從喺2015年2月25號出咗境，谷卓恒就無返過大陸囉。不過，路德社話查實谷以前係中共國安總參情報二部特務，之後叛變咗，同美國聯邦調查局合作，成為污點證人，至於谷指控乜嘢，並無提及。谷卓恒話拒絕就此直接評論，只係籠統噉樣強調，本身無任何背景，勸喻外界唔使過度猜測。

2015年5月26號，谷卓恒喺香港國際機場一度被人捉着，糾纏過後甩咗身。谷喺2019年2月28號，向自由亞洲電台，首次公開講細節；渠話，喺機場富豪酒店大堂附近某條走廊，忽然間有廿幾個人郁手，想擄走渠，期間甚至用槍頂住渠，谷受制服後繼續反抗，好彩酒店保安幫忙解圍兼報警，之後機場警區人員趕來，救咗渠，亦帶走咗部分人，谷入咗醫院，留醫廿幾個鐘頭，其後先至知道嗰班係中共國安部嘅人，專程跨境來執行「秘密任務」，要帶佢返大陸。綜合立場新聞傍自由亞洲電台消息：香港警察公共關係科證實，當時收到個43歲男人報警求救，差人到場之後，喺當地拉咗兩個大陸人，分別係40歲姓趙嘅男人傍41歲孫姓女人，渠哋涉嫌非法禁錮傍普通襲擊，由東九龍總區重案組二隊跟進，有諮詢法律意見，判定唔夠證據起訴任何人。谷卓恒亦向自由亞洲電台表示，後來，中共公安部傍國安部非常高級，甚至家喻户曉嘅人物，多次去美國，面對面游說渠為中共服務，以及返大陸，亦都提出咗啲條件去吸引渠，不過自己覺得對方信唔過，就揀維持原狀嘞。

由2016年至2017年，谷卓恒傍《成報》，同香港其他左報以及部分中港官員「明爭暗鬥」。成報多次刊登「漢江泄」署名評論文章，指摘中共傍香港嘅部分官員貪污腐敗，攪亂香港，對抗中央……谷卓恒傍《成報》隨即受到各種合法傍非法嘅文攻武嚇（詳情睇「亂港四人幫」），浮面嘅爭論主題關乎政見、商業罪案傍桃色關係等等。谷回應話呢啲係對渠嘅「設局陷害」傍「人格謀殺」云云，又控訴大陸國安跨境執法，幾乎將渠擄走咗……2017年3月9號，《大公報》、《文匯報》、《星島日報》傍《頭條日報》喺同一日，頭版報道話國際刑警組織已經對渠發出紅色通緝令云云。《成報》又質疑深圳公安局副局長施志剛傍《星島日報》記者林思明等人，參與旗號為為美貸網案追討嘅所謂「職業示威團」以及其他法外滋擾事件。

2019年2月26號，谷卓恒用推特「預告」，日內揭示習近平家族涉貪内幕，指習家族貪腐程度遠超於歷代國家領導人，包括「江、朱、李、胡、溫、曾等幾大家族」；有以前屬於肖建華嘅公司，被習近平大姐夫鄧家貴納咗……翌日，谷接受自由亞洲電台獨家訪問時，話由於賣上述關子而被跟蹤，重收到好多恐嚇電話傍死亡威脅訊息，叫渠收聲，就連家人同朋友亦都因此被騷擾；谷卓恒簡介渠嘅發現話：2016年定居美國之後，參與當地一間非營利獨立調查機構嘅工作，主力追查同揭露中共政府腐敗；渠哋花咗唔止兩年調查，掌握到大量文件資料——係習近平家族刻意隱瞞喺境外走資嘅證據；習近平係中國「第一貪」，渠嘅家族係最有錢嗰個；細佬習遠平嘅、「孩子」身上嘅、習近平幾個最得力助手嘅傍其他常委嘅資產傍股權等等加埋，對外投資有過萬億美金；涉事公司有幾千間，遍布中港、歐美傍中東等地，齋計香港嘅，數目都多過三千，大部分係空殼公司，而涉及嘅大陸公司，大把係著名國企傍央企；渠哋由習近平家族通過個錯綜複雜嘅網絡非法控制；對於「巴拿馬文件」顯示，習近平家族以迂迴手法喺海外投資房產，谷指嗰筆只係小數目，最主要嘅資產屬於金融產業；渠重話，幾年來一直遭到迫害，到咗美國之後，仍然頻頻被恐嚇傍滋擾，唯有出親街都揾兩個保鑣陪着。嗰則訪問嘅報道，指無法經第三方核實以上種種。不過，谷卓恒個推特户口即刻被封鎖咗，之後雖然開通返，但係並無喺嗰道出現所提及過嘅所謂習近平家族罪證。儘管如此，谷都有繼續發帖，數落中共其他方面。

2019年3月4號，《成報》頭版報道，十多個公安噚日午間去沈威傍其他谷卓恒嘅老嫩親人所住嘅北京寓所，查問谷喺焉道兼施壓要沈叫谷返大陸，否則會再來攪渠哋，谷自稱身處美國加州，質疑北京市公安局威嚇老弱婦孺……爾段嘢隨印刷版如期出咗街，然而一度無辦法喺《成報》嘅網頁道睇到，職員話噉係由於受到網絡攻擊；後來已經重新上架。

2019年4月12號，谷卓恒喺渠嘅推特户口道「公告」，即將向國際刑事法院，控告七個中共中央政治局常委——習近平、李克強、栗戰書、汪洋、王滬寧、趙樂際傍韓正，重有中共政府，原因係渠哋令中國人民始終處於水深火熱之中，而且香港、台灣、西藏傍新疆等地，正遭受渠哋帶來嘅嚴重種族危機。喺同一日，谷向自由亞洲電台獨家「爆料」，準備首先集中踢爆當中兩間央企嘅「黑幕」——屬於金融保險傍房地產業務，背後老闆都係習近平家族；記者根據谷向渠哋所透露嘅嘢查核，發覺有啲料到。然而，至今尚未有該計劃付諸實行嘅聲氣。

生意

《大公報》話，谷、沈夫妻一齊去過巴西發展，後來返到大陸做生意。由2004年至2015年，渠哋喺大陸經營或／及擁有過嘅公司包括北京亞太置地國際投資有限公司、北京綠頓乳業、利亞（中國）飲品、國利鋼筋鋼網、深圳世紀星空影視製作公司、深圳九木電子公司、深圳市鼎和投資擔保有限公司、美貸網、信達財富、中融資本、深圳鼎和資產管理集團、南亞礦業傍鼎和礦業……並指控個夫婦檔靠以上公司來掠水再走路，多次重施故技。

《星島日報》引述消息人士話谷喺2013年「涉嫌透過欺詐手段」攞咗塊深圳坪山嘅地。谷反駁話對方特登報啲唔報啲，來污衊渠，而真相係正當噉買到嘅，並且為此糾紛，已經响2016年12月29號，喺香港高等法院打贏咗官司。之後依然有同嗰塊地拏緪嘅官司，喺香港打緊，之不過似乎已經傍谷無乜挐掕。

到咗2014年7月，谷卓恒喺香港投資《成報》，2014年10月29號成為正式阿頭，2015年7月再大手增持集團股份……其後，谷喺香港被多方追數。其中，最大債主金利豐財務有限公司喺2017年5月入稟香港高等法院（下稱高院）追渠攞大約1.09億港紙；幾次聆訊之後，谷喺2020年8月5號被頒令破產。另外，商人鄧偉權、誠宇財務有限公司及仁德信貸財務有限公司，亦分別响2017年4月、2017年5月8號及2018年，入稟高院，向谷追債港幣372萬零、1070萬零及大概1128萬加斷年計嘅罰息。重有，喺鴻鵠資本有限公司以及其老闆鄧俊杰，响2018年入稟高院向香港傳媒集團控股有限公司以及其老闆谷卓恒，索償5.1億港元嘅案件當中，除咗誹謗嘅主題之外，亦涉及谷借咗鄧1000萬蚊而冇還嘅指控。

喺2016年10月20號，新華社放料如是：2014年12月26號，深圳市公安局羅湖分局接到群眾報案，控告「深圳美貸電子商務有限公司」利用P2P網貸平台非法集資，令到群眾投資金額損失，攞唔返；經審查，喺2015年1月23號以涉嫌「非法吸收公眾存款犯罪」立案偵查；郝建國、王雪華、沈威傍王景先後被拉，統統指證谷卓恒係嗰間公司嘅實際控制人；谷於是喺同年3月17號被「辦理刑事拘留強制措施」，到咗同月20號，開始受到「上網追逃」。經審訊，同年5月27號，深圳市羅湖區人民檢察院以同上嘅罪名「批准逮捕」谷，渠於是成為逃犯。喺2017年3月9號，巴士的報公開咗份聲稱係獨家獲得，由國際刑警組織發出，關乎以上罪行，對於谷卓恒嘅「紅色通緝令」嘅副本，並加以介紹。翌日，谷喺《成報》刊登聲明反駁：因為關於上者嘅內容，全部無寫消息來源，而所有官方渠道都無相關資訊，所以唔評論；又提到，係個有公職身分嘅廣東商人想由渠手上搶走上述土地，又得到深圳市公安局傍市政府官員包庇，先至會夾硬拖渠入美貸網案度，甚至用到黑社會手段，包括淋雞血來恐嚇，想渠就範；聲稱查實自己同美貸網業務無關；又拆解對手所報道，美貸網案嘅資料唔合常理，懷疑論述有造假，實則另有陰暗內情……沈威喺2017年7月25號被深圳市羅湖區人民法院一審判「非法吸收公眾存款」罪名成立，刑罰係有期徒刑3年，緩刑5年，以及罰款5萬蚊人民幣，同年9月30號放咗出來；响2019年，深圳市中級人民法院嘅二審兼終審，改判渠無得緩刑。

2020年12月18號，《大公報》報道，香港公司註册處顯示，谷卓恒持有19間當地公司，當中17間已經解散，又推測部分係空殼公司。

桃色

《大公報》形容谷卓恒風流成性，女伴眾多；話有傳聞指，美貸網董事長助理王雪華係渠紅顏知己，有個由四川走去香港打工做過網台節目主持嘅高姓女人都係，後者陪谷去咗美國兼喺2016年生咗對雙胞胎。