豆腐火腩

豆腐火腩係香港一味小菜，亦係茶餐廳碟頭飯常見嘅餸，夾埋做豆腐火腩飯。

豆腐火腩主要材料有豆腐同火腩（隔夜燒腩），有啲煮法會落埋枝竹、草菇等配料。常見做法係先將豆腐炸到金黃，再將豆腐、火腩同配料落鑊炒一炒，再倒個蠔油獻汁落去炆一陣就得。

文化

• 香港網絡文化入面，豆腐火腩飯係「男人嘅浪漫」。
• 2017年6月，香港快運將旗下一架空中巴士A321改名做「豆腐火腩飯」。
• 2017年8月，有香港商家發明同推出豆腐火腩罐頭。