車仔麪
車仔麪係香港好多人鍾意嘅一款麪，上面都係放一啲平價料餸來食。開頭係街邊小販推架車仔木頭車，響街邊度賣，唔係好乾淨，所以又叫做嗱喳麪。因為夠晒平，所以有唔少人幫襯。以2006年來計，大概係十幾蚊一餐到，睇下要幾多料。
家下無咁多小販，唔少車仔麪都唔再係推車仔，而係響舖頭賣，有時重會有貴價料㖭。
起源
[編輯]車仔麪大概1950年代出現，二次大戰同國共內戰之後無幾耐。呢個時間香港市民生活都幾苦，唔少人都係大陸走難落來香港。唔係咁易搵到嘢做，所以好多人做小販攞檔，其中唔少小販係推架木頭車出來賣咖喱魚蛋同車仔麪。
車仔
[編輯]車仔就係木頭車，車裏面有鋼或者其他金屬做嘅缸，打橫打直分成一格格。每格放唔同，湯料麪。另有一格係用來煮。木頭車裏面就裝石油氣爐，以前可能係火水爐，開火㷫住啲湯料同煮熟來賣。
料
[編輯]一個麪可以配唔同料。買嘅人可以任揀。料就檔檔都唔同。常見有豬紅、豬皮、豬大腸、蘿蔔、紅腸、菜、雞翼、魷魚、燒賣、牛丸、咖哩魚蛋、獅子狗丸、雲吞、粉腸、蟹柳、冬菇、墨魚丸、牛腩等等。