金不換

金不換（紅骨九層塔）
春季時嘅金不換
種
Ocimum basilicum

甜羅勒（Sweet basil）係淺綠色，有闊葉，而金不換（Thai basil）有紫色嘅莖同花，同埋矛狀嘅葉

夏末嘅時候，金不換嘅花

仲夏嘅時候，金不換嘅花

金不換（又叫做泰國羅勒；泰文：โหระพา、hōraphā；越南文：húng quế；英文：Thai basil）係一種原產於東南亞嘅羅勒，佢啲葉比歐洲甜羅勒（Italian Basil 或者叫 Sweet Basil）嘅葉細而窄，莖係紫色嘅，啲花係粉紫色嘅。因為佢嘅莖部係深紫紅色嘅，所以又叫做紅骨九層塔。台菜料理常用，同埋台灣人講嘅九層塔（Taiwan Basil 或者 Taiwanese Basil），就係指外觀同味道都類似金不換嘅羅勒品種。金不換嘅香氣比甜羅勒強烈，有啲茴香同埋甘草味，微辣，係煮青咖喱同埋冬蔭功湯嘅重要材料，亦都係泰菜同埋越南菜好常用嘅調味香草。喺高溫同埋長時間嘅煮食之下，佢比歐洲嘅甜羅勒更加穩定。

描述

Thyrse （花序）

金不換堅固而緊湊，可以生到45厘米（一呎半）高，有閃亮嘅綠色，啲葉比較窄同埋略帶鋸齒，有啲甜甜地嘅茴香香味，仲有淡淡嘅甘草味，同埋一般甜羅勒無嘅微微辣味。金不換有紫色嘅莖，同薄荷家族嘅其他植物一樣，啲莖係方形嘅。佢嘅葉係對生同雙葉。 就好似佢嘅學名所暗示，金不換嘅花序係Thyrse。佢嘅花序係紫色，而開花嗰陣嘅花係粉紅色。

分類同命名

甜羅勒（英文：Sweet Basil；學名：Ocimum basilicum）有多個品種 —— 金不換（O. basilicum var. thyrsiflora）係其中一種變種。因為佢有茴香同甘草嘅香味同味道，所以金不換有時俾人叫做茴香羅勒或者甘草羅勒。雖然個名一樣，不過佢同西方叫嘅茴香羅勒（anise basil）、甘草羅勒（licorice basil）係唔同嘅嘢。

有時，金不換又會俾人叫做肉桂羅勒（cinnamon basil），呢個係金不換喺越南文嘅字面名，但係肉桂羅勒通常係指另一個獨立嘅羅勒品種。

屬名 Ocimum 係源自希臘文，佢嘅意思係「去聞」（英文：to smell），呢個詞適合大部分 Lamiaceae 科嘅植物，亦叫做薄荷科。羅勒有超過 40 個唔同嘅品種，佢哋豐富嘅味道、香氣同顏色會方便我哋識別佢哋，不過亦都會喺識別特定品種嗰陣令人覺得混淆。

泰國菜常用嘅三種羅勒：

• 金不換，又叫做泰國羅勒、horapha（泰文：โหระพา），喺全個東南亞都好廣泛咁用，喺越南菜嗰度亦都扮演住重要嘅角色。佢係西廚最常用嚟做亞洲菜嘅羅勒品種。
• 聖羅勒（英文：Holy Basil；學名：O. tenuiflorum）、mreah-pruv（高棉文：ម្រះព្រៅ）、kaphrao（泰文：กะเพรา），佢有一種辣、胡椒味、丁香味，可能係泰國人最鍾意嘅味道 佢亦都叫做泰國聖羅勒，或者用佢嘅印度名 tulasi 或者 tulsi；佢喺印度經常俾人用喺烹飪、醫藥同埋宗教活動。
• 檸檬羅勒（英文：Lemon basil；學名：O. × citriodorum）、maenglak （泰文：แมงลัก），顧名思義，佢嘅香味同味道都有檸檬嘅底調。檸檬羅勒係泰國菜所用嘅三種羅勒當中，最唔常用嘅羅勒。 佢亦都係泰國檸檬羅勒，同另一種品種叫 Mrs. Burns' Lemon basil（學名：Ocimum basilicum var. citriodora）嘅檸檬羅勒唔同。

烹飪

金不換廣泛用喺東南亞菜，包括泰國菜、越南菜、老撾菜同柬埔寨菜。金不換嘅葉係泰國綠咖喱同紅咖喱嘅常見食材，雖然喺泰國，用喺醉貓炒河（drunken noodles）同好多雞肉、豬肉、海鮮菜式嘅羅勒係聖羅勒。 不過喺西方，呢類菜式通常都係用金不換代替，原因係喺西方，金不換比起聖羅勒容易買到好多。金不換亦都係好受歡迎嘅台菜三杯雞嘅重要食材，不過喺歐洲唔容易揾到金不換，所以啲廚師會用味道無咁強烈嘅歐洲甜羅勒代替。金不換用嚟做越南菜嘅調味料，好多越南菜式，例如越南河粉（越南文：phở）、順化牛肉粉（越南文：bún bò Huế）、 越南煎餅（越南文：bánh xèo）等，通常會配埋一碟生嘅金不換葉，等每個人都可以用有茴香味嘅金不換葉嚟調味。

種植

金不換係一種嫩滑嘅多年生植物，但係喺泰國通常都會當佢哋係一年生植物咁樣種。作為一種熱帶植物，金不換只係喺好暖、唔會落雪嘅氣候之下生長。 金不換嘅最低生長溫度係美國農業部植物耐寒區10（USDA plant hardiness zone 10；即係30°F到40°F；-1.1°C到4.4°C）。金不換可以由種子或者插枝種植，需要肥沃、排水良好嘅泥土， pH 值介乎6.5至7.5，同埋每日有6至8個鐘嘅全日照。 如果金不換開咗花，要將啲花搣走，如果唔係嘅話，啲葉會變苦。如果一次只係攞幾片葉，金不換可以重複收割，而且應該要定期收割，咁佢先至會生得快同埋好。