錦田河

錦田河近爾巒

由大刀屻望向錦田河

錦田河下游近南生圍，每年冬季都係候鳥天堂

錦田河幹流近東匯路／金水北路，可見混凝土堤圍上大型塗鴉

錦田河近元朗公路段，朝向古洞一帶

錦田河近錦上路站

錦田河（英文：Kam Tin River）係香港新界元朗區一個河流系統，主幹流源由大帽山山頂以北400米，海拔大約910米高，係香港發源地第二高嘅河流。以前嘅錦田河蜿蜒曲折，流經雷公田、大嶺進入石崗，繞過石崗機場南面流向錦田市以南，再經高埔同南生圍到達元朗山貝涌口村以北同山貝河匯合，最後流入后海灣。

由於以前錦田河多次氾濫引發嚴重水災，河道附近居民構成生命同財產威脅，政府喺1990年代展開大規模防洪工程。工程由渠務署負責進行，由中游開始將河道擴闊同拉直，同埋用混凝土修建堤圍，開鑿南生圍部份魚塘，闢建一條寬闊人工河道等。

錦田河幹流同支流防洪工程陸續喺2000年代完成，部份原本曲折嘅舊河道已被廢棄。依家嘅錦田河已經變成一條排洪河道，全長大約50公里，幹流水平長度則約13公里，而流域面積大約44.3平方公里。幹流上游進入錦田平原東部後，分別喺金錢圍同錦上路站附近同流經清潭水塘以及河背水塘嘅支流匯合，再喺高埔村同源自觀音山嘅支流（石崗河）匯合，最後喺南生圍同大生圍之間以及甩洲以南，同山貝河匯合流出后海灣。

錦田河河道改善工程完成後，下游會匯合元朗排水繞道，以及源於牛潭尾一帶嘅排水道，而喺南生圍魚塘入面一段舊錦田河，河水依然如常流動至山貝河。