錫伯族

錫伯族 ᠰᡞᠪᡝ
開荒嘅錫伯軍人，1882年亨利·蘭斯斗（Henry Lansdell ）嘅畫
總人口
188824人（2000年）
分佈地區
中華人民共和國（新疆伊犁察布查爾、遼寧、吉林）
語言
錫伯文、中文
宗教信仰
藏傳佛教、薩滿教、多神信仰
相關種族
滿族、鮮卑、赫哲族、柯洛人、鄂溫克族

錫伯族（粵拼：sek3 baak3 zuk6；錫伯文：ᠰᡞᠪᡝ／，穆麟德：Sibe；中國標準羅馬字：Xibe）係中國嘅少數民族，人口18.8萬（2000年），喺中華人民共和國政府認證嘅56個民族中排第31大，而家分居中國東北、新疆兩地。

錫伯人本來係住喺滿洲嘅通古斯民族，後來努爾哈赤統一曬啲部族，將佢支配嘅土地嗌做滿洲，建立後金，錫伯人編咗入八旗。當時錫伯係女真族嘅一個支族，佢哋就係起源自呢個氏族嘅人。之後後金建立清朝，18世紀中葉時錫伯軍人分派去中國西北，於是形成而家喺兩地嘅分佈。

錫伯人講錫伯話，寫嘅錫伯文改良自滿文。錫伯話同滿洲話好接近，基本相通，係珍貴嘅滿洲語言遺存，不過由於同滿族嘅民族區分，錫伯話有自己嘅ISO碼，唔睇成滿文嘅方言。而家錫伯話有三萬人到講（2000年），有錫伯話嘅新聞、廣播等媒體，亦有小學敎錫伯文，不過而家錫伯話有承傳壓力，狀況評級屬於受威脅（Threatened）。

族源

關於錫伯族嘅來源，有人認爲佢哋係女真人後裔，係東海女真嘅支族，叫錫伯部。另外重有一種學說認為佢哋源自鮮卑。呢種學說話，「錫伯」係「鮮卑」嘅轉音，由Simbei轉變成Sibe（或者Sibo），之後進一步論證出西伯利亞個名其實係「鮮卑利亞」。而歷史上鮮卑屬東胡，興於鮮卑山（大興安嶺），後來南下，喺遼東、中原立前燕、北魏，後經孝文漢化逐漸變成唐人。而佢哋當年可能留咗啲部族駐守祖地（大興安嶺北部嘅祖廟嘎仙洞），後來演變爲錫伯族。不過呢種學說因為無文獻佐證，無咁易證實。

史

錫伯人原本係漁獵、遊牧民族，所以同滿族一樣有騎射傳統。明朝中後期，錫伯人由興安嶺搬到嫩江、松花江流域，歸蒙古科爾沁部管轄。行出大興安嶺後，佢哋開始耕田，出產當時好有名嘅錫伯米。

1593年努爾哈赤征服科爾沁部，錫伯人跟住科爾沁臣服佢，編入咗蒙古八旗。之後清兵入關，大量八旗兵丁南下關內，於是東北防務空虛。1692年，康熙爲咗東北防務，將錫伯壯丁從蒙古八旗度抽出做高級兵士，叫做「披甲」，編入滿洲八旗，於是錫伯人分屬兩邊嘅八旗。呢班披甲分駐而家黑龍江齊齊哈爾、吉林省扶餘縣同埋吉林市呢三處。幾年之後整頓八旗，有啲錫伯人分咗去遼寧、北京、山東德州呢啲地方。雖然分散各地，但係總體上依然分佈喺東北，其中集中喺遼寧。

18世紀中葉，平咗準噶爾亂同大小和卓之亂之後，統一咗天山南北。但因爲戰亂，伊犁地方人口減少、軍防空虛，呢陣時沙俄又想滲透新疆，於是1762年開始調兵過去駐守，不過未夠，於是1764年將錫伯官兵、軍屬一齊西遷戌邊，於是今日錫伯族人分居東北同新疆兩處。目前新疆嘅察布查爾錫伯自治縣係唯一嘅錫伯自治地方。

當時嘅皇帝係乾隆，之所以揀錫伯人去新疆，就在於錫伯人有騎射傳統，同時又識耕田，軍事、經濟都有好處。派去戌邊嘅錫伯人都係當時駐守盛京（而家瀋陽）及週邊嘅官兵，按照文獻，佢哋係1764年農曆四月出發嘅，有一千個兵丁、20個官、3275個家眷，夾埋有4295人。但實際更多人，因爲有啲親屬唔想分離，明明無佢份都跟埋去，呢部份有405人。另外啲兵丁都係後生仔，發伍前嗱嗱聲結埋婚，費事過咗去無同族女人；呢支隊行咗成年先到伊犁，行軍過程中生咗350幾個臊蝦，到1765年7月抵達伊犁、清點人數去編牛錄時，發覺有軍民5050人。

後來闖關東嘅移民潮，令東北地方變成漢地，東北嘅錫伯人都漢化曬，滿洲話亦都變成瀕危語言，但新疆嘅錫伯人反而保留咗錫伯話，而錫伯話同滿文好似，成為滿洲語言爲數唔多嘅遺存。

參考資料

• 《對有滅絕危機嘅阿爾泰語言嘅實地調查》（絶滅危機의 알타이言語 現地調查/절멸 위기의 알타이언어 현지 조사），韓國阿爾泰學會（韓國알타이學會/한국알타이학회），2006年
• 《消失緊嘅滿洲語》（消えゆく満州語），石田耕一郎，2013年12月10號～11號，《朝日新聞》（大阪本社夕刊）

連出

• 錫伯族，中華人民共和國中央人民政府
• 錫伯族，中國網
• シボ族，（日文），中國網日文版