中國猶太人

出自維基百科,自由嘅百科全書
Jump to navigation Jump to search

呢篇文係
猶太文明
系列一部分

Star of David.svg   Menorah7a.png
宗教/語言
猶太教經典制度一神論
希伯來文亞拉米文
重要典籍與文獻
塔納赫(妥拉先知書聖錄)、
塔木德米德拉什拉比文獻
其他文獻613條誡律
派系(古代)
撒都該人法利賽人奮銳黨人
艾賽尼人特拉普提派卡拉派
派系(現代)
正統派保守派改革派
重建派世俗猶太人
猶太教思想
猶太教神秘主義默卡巴神秘主義
喀巴拉
歷史
歷史年表古代拉比時期
中世紀現代
先祖
亞伯拉罕以撒雅各約瑟
十二支派摩西大衛所羅門
曆法/節日
猶太曆逾越節除酵節
羅什哈桑納贖罪日住棚節
妥拉節修殿節摩西誕辰日
普珥節舍巴特節安息日
大屠殺記念日奧默爾節
耶路撒冷節沙夫幼特節
悲哀日新月節
猶太聖地
耶路撒冷馬薩達
重要事件
馬卡比起義猶太人大屠殺
以色列國成立反猶主義
現代宗教運動
錫安主義
      

猶太人粵拼jau4 taai3 jan4)好早就移民到中國,而家學界認為唐代時就有大批猶太人來中國,有啲學者就認為漢朝、甚至周朝就有猶太人過來,不過呢個就無相關考古證據支持到。猶太人來中國之後散居喺各個地方,譬如西安、洛陽、敦煌、開封、廣州、杭州、寧波、北京、泉州、揚州、寧夏、南京都有猶太人定居過嘅紀錄、痕跡。到咗宋代,先至喺開封形成一個大規模嘅猶太社區,開封猶太人係紀錄得最完整嘅中國猶太族群[1]。不過到近代,呢啲世居中國嘅猶太人大多都畀唐人同化咗,唔再信猶太教,祗不過生活習俗上重有啲猶太痕跡,所以近代到而家都有啲國際猶太組織幫佢哋恢復傳統。

喺開封猶太人唐化同時,19世紀到20世紀又有新一批嘅西方猶太移民來中國,主要集中喺哈爾濱天津上海,分別有兩批,之後呢啲猶太人大多散曬,得小部分人留低。而家中國發展緊,亦都吸引咗啲外國猶太人來中國。

家下喺中國,猶太人唔係法定嘅中國民族,在於中國猶太人總體上同漢族回族差唔多,所以猶太裔分攤喺呢兩個族之中,亦有人喺民族欄度填「猶太族」,不過官方唔承認。

前史[編輯]

猶太人起源於今日伊拉克地方[2],據《舊約》講,佢哋曾經入埃及之後又出埃及,前1270年喺今日嘅以色列地方立國。以色列地方位置特殊,係亞非歐嘅三大洲交通要衝,係兵家必爭之地。於是猶太人多次受外族入侵。70年,以色列首都耶路撒冷羅馬帝國攻毀,猶太人自此離散流亡。佢哋有部分人向西流浪到歐洲,另一部分向東,經伊拉克、伊朗阿富汗,大約200年後去到印度孟買定居。

中國古代[編輯]

絲綢之路興盛,猶太人又識做生意,於是喺宋代之前就有零碎嘅猶太人行陸路來中國做生意,新疆甘肅出土過唐代來中國嘅猶太人留低嘅希伯來文書件。

到北宋時,因為政策寬鬆,商業繁榮,開封係當時世界上最繁華嘅都會之一,因為經濟繁榮,吸引咗大批猶太人行海上絲綢之路來中國定居開封。

1000年,宋真宗召見一批猶太人,話「歸我中華、遵守祖風、留遺汴梁」,意思係喺歸順中國唔造反嘅前提下,可以世居開封,重能夠保有自己嘅宗教、習俗。猶太人同回民一樣,唔食豬肉,同時佢哋戴嘅帽係藍色嘅,所以當地人嗌佢哋做「藍帽回回」。又因為佢哋劏牛羊時要先挑開腳筋,紀念佢哋嘅祖先雅各同神鬥力時扭親腳筋,所以猶太教又畀當地人嗌「挑筋教」。

1163年,開封猶太人起咗間猶太會堂做宗教場所,佢哋就聚居喺會堂附近,形成規模幾大嘅猶太社區。呢間會堂喺清代時因為黃河水災而毀。今日開封市區有條巷叫「教經胡同」(舊名叫「挑筋胡同」,後來馮玉祥主政開封,覺得個名唔好聽就改成噉),標誌當年猶太街區嘅位置。

唔似得西方,猶太人喺中國並未淪為「下等公民」,一切權利同唐人一樣,亦可以參加科舉去做官。有人分析,正因中國無歧視猶太人,唔似西方噉刺激猶太人嘅族群意識,加之最後200年中國猶太族群無聯絡到其他同胞,於是佢哋就逐漸畀當地同化。而家開封照樣有猶太後裔,當中大部分人因為習俗相近就填民族欄做「回族」[3]

1605年,明朝猶太舉人艾田喺北京搵着咗基督傳教士利瑪竇,話同利瑪竇信嘅教一樣。利瑪竇以為佢係當時中國唔多嘅基督徒,就帶佢睇教堂啲聖母、耶穌、聖若望嘅畫像,不過佢反而認成咗係利百加、以掃、雅各。利瑪竇同佢傾耐咗,發覺佢好熟《舊約》,又話雅各係佢先祖,自稱自己嘅教係「一賜樂業教」。「一賜樂業」其實係當時中國對「以色列」嘅音譯,於是利瑪竇知道佢其實係猶太人,之後開封猶太人嘅名揚咗出去,西方文獻第一次正式紀錄中國猶太人。

近代[編輯]

晚清之後,又有兩批猶太人來中國。第一批主要係俄國猶太人,集中喺哈爾濱;第二批係西歐猶太人,集中喺上海。

第一批[編輯]

哈爾濱一間猶太會堂

19世紀末,沙俄憑住地理位置將中國東北劃做佢嘅勢力範圍,修築以哈爾濱爲中心、連通西伯利亞中東鐵路。西伯利亞嘅猶太人就行呢條鐵路去哈爾濱。當時哈爾濱係東亞最大嘅猶太人聚集地,最多時有2萬幾猶太人定居,佢哋嘅生計主要係商人、醫生、建築師[4]。今日哈爾濱有名嘅馬迭爾賓館就係當年猶太人嘅產業。

此外當時中國各大商埠都有來自其他國家嘅猶太人。

第二批[編輯]

二戰時,歐洲嘅猶太人畀納粹種族清洗,想四方求助,不過當時好多國家驚領嘢上身,有啲由得佢死(1938年7月6號嘅國際難民會議中,有32國拒受猶太難民),有啲限制猶太難民入境,而中國就庇護佢哋,結果中國庇護嘅猶太難民超過加拿大、澳洲、紐西蘭、南非、印度五國所受嘅總和。[5]其中時任中國駐維也納總領事何鳳山曾經發畀猶太難民兩千幾份去上海嘅簽證,譽為「中國舒特拉

據統計走難上海嘅猶太人達3萬人,大多數聚集喺虹口,當地嘅摩西會堂做咗上海猶太人嘅宗教中心。呢啲猶太人大多數喺二戰之後就返歐洲,亦有啲去以色列參與復國運動,有少數人留低落來。而家摩西會堂變成上海猶太難民紀念館,入邊保存咗啲當年猶太難民嘅資料。

[編輯]

  1. "猶太人在中國". (原先內容喺2009年6月3號歸檔). 喺2014年1月3號搵到. 
  2. 據《創世紀》,話佢哋原住兩河流域,後來西遷去迦南
  3. "開封猶太後裔的現狀". (原先內容喺2016年3月5號歸檔). 喺2014年1月3號搵到. 
  4. 猶太人在哈爾濱
  5. "永記中國的恩情". (原先內容喺2009年6月3號歸檔). 喺2014年1月3號搵到.