修殿節

呢篇文係 猶太文明系列一部分
宗教/語言
猶太教、經典、制度、一神論 希伯來文、亞拉米文
重要典籍與文獻
塔納赫(妥拉、先知書、聖錄)、 塔木德、米德拉什、拉比文獻、 其他文獻、613條誡律
派系(古代)
撒都該人、法利賽人、奮銳黨人、 艾賽尼人、特拉普提派、卡拉派
派系(現代)
正統派、保守派、改革派、 重建派、世俗猶太人
猶太教思想
猶太教神秘主義、默卡巴神秘主義、 喀巴拉
歷史
歷史年表、古代、拉比時期、 中世紀、現代
先祖
亞伯拉罕、以撒、雅各、約瑟、 十二支派、摩西、大衛、所羅門
曆法/節日
猶太曆、逾越節、除酵節、 歲首節、贖罪日、住棚節、 妥拉節、修殿節、摩西誕辰日 普珥節、舍巴特節、安息日、 大屠殺記念日、奧默爾節、 耶路撒冷節、七七節、 悲哀日、新月節
猶太聖地
耶路撒冷、馬薩達
重要事件
馬卡比起義、猶太人大屠殺、 以色列國成立、反猶主義
現代宗教運動
錫安主義

修殿節¹（Hanukkah [ חנוכה]），又叫獻殿節、光明節、燭光節、馬卡比節、哈努卡節，呢日喺猶太曆嘅基斯流月第25日一路到提別月第二日，一連八日慶祝呢個節日，紀念馬卡比光復猶太地同聖殿。

呢日即係大約喺西曆11月至12月期間，以2006年計就喺12月15號日落至12月23號，而2007年就會喺12月4號一路到12月12號。

背景

公元前 165 年，塞流古王朝既安提阿古四世率軍入到耶路撒冷，強行推行希臘化，佢哋攻入猶太人嘅聖殿，喺入面安放宙斯神像，立宙斯祭壇，又喺宙斯壇上獻猶太人認為唔潔淨嘅豬畀宙斯，又迫猶太人食豬肉。對於猶太人嚟講，呢啲行為全部都係嚴重褻瀆，咁搞法令猶太人焮過火屎，於是激起咗猶太人反塞流古王朝起義。

於是，一個叫哈斯蒙尼（Hasmonean）嘅祭司家族就發起反抗，最後喺哈斯蒙尼領袖馬卡比²長達二十二年嘅抗爭之後，終於起義勝利。建立咗猶太人獨立時期嘅哈斯蒙尼王朝。之後馬卡比就下令整返乾淨聖殿，整返走晒啲異教嘢，重建返猶太人嘅祭壇。

但係馬卡比士兵因為起義而慶祝唔到住棚節，於是就整呢個節日出嚟補返數。另外又有一個傳說咁話，喺起義成功之後，猶太人要執返正個聖殿，但點知無油點燈，得返一細罐，一日唔夠就點晒，整又整唔切買又買唔切，但竟然有奇蹟發生，呢一細罐一點就點咗8日，啱啱好夠時間喺以色列北部加利利買油返嚟，因為咁呢日就一連慶祝8日。

習俗

一到咗修殿節，猶太人都會喺屋企放一個叫做「九臂燭臺」（Chanukkiyah）嘅金燈臺，不過九臂燭臺同猶太教傳統金燈臺有啲唔同，傳統金燈臺點7支蠟燭，而九臂燭臺就點9支蠟燭。

九臂燭臺係一個可以點九支蠟燭嘅燈臺，而中間一支特別放得高小小。喺修殿節嗰陣，猶太人會喺八日慶祝入面嘅第一日先點着佢最高一支蠟燭，因為呢一支叫做「仆人」，然後用呢一支燭燈嚟點另外8支，每日點一支，8日點晒9支。

喺修殿節第一日，猶太人會去猶太會堂一齊唱詩。之後會請晒啲親戚朋友返屋食晚餐，晚餐前要先點蠟燭。傳統上呢餐會有啲特定食品例如土豆絲餅，用嚟記念上帝嘅神蹟。

光明節陀螺

晚餐之後，啲細路會玩一樣類似一種陀螺咁樣嘅玩具叫做Dreidel，如果喺以前，大人重會拎啲錢畀啲細路，呢啲錢叫做哈努卡錢（Chanukkah geh），同時又會畀一啲硬殼果細路，但係而家已經改為送禮物畀細路，每日送一份，總共送8份。

睇埋

• 馬卡比起義

註

• 註 1: 喺大部份中文猶太教或者以色列歷史、文化嘅書，都將 Hanukkah 譯做「修殿節」，另一個比較多人用嘅譯法，係跟發音譯做「哈努卡節」，例如黃陵渝寫嘅《猶太教學》（ISBN 7801152999），即台灣版嘅《多難之路-猶太教》，就跟音譯做「哈努卡節」，但內文亦有用「修殿節」，不過跟音有另一個譯法叫做「漢努迦節」，所以無一個比較一致嘅音譯，除此之外，上海辭書出版社出嘅《猶太教小辭典》（ISBN 753261241）就譯做「獻殿節」，不過普遍計都係以「修殿節」最多人用，所以呢度就揀咗「修殿節」做 Hanukkah 中文標題

• 註 2: 馬卡比（Maccabees）原名應該叫「猶大」（Judah 或者 Judas），馬卡比係佢嘅外號，意思係「錘仔」，不過多數史書都將呢次起義稱呼做馬卡比起義（Maccabean revolt），而佢亦寫過一本經典叫《Book of Maccabees》，所以馬卡比就變成佢正式嘅名

參考

• 猶太教學 當代世界出版社 ISBN 7801152999
• 天擇-猶太人的故事 臺灣商務印書館 ISBN 957051695x