雪糕駁船

提及雪糕駁船嘅1945年廣告

 雪糕駁船（粵拼：syut3 gou1 bok3 syun4） （英文：ice cream barge）係二戰時期美國海軍旗下嘅船隻，專門供應雪糕畀其他艦艇去激勵士氣。雪糕駁船一共斥資一百萬美金改造，每七分鐘可以整十個美制加侖（約莫38公升）嘅雪糕出嚟。二戰後期派駐西太平洋，之後下落不明。

背景

禁酒令

1914年，時任美國海軍部長Josephus Daniels發出咗一般命令第九十九號，海軍開始全面禁酒。幾年之後美國政府再修憲，由1920年起全國實施禁酒令。美國嘅酒廠一係執笠一係轉型，唔少好似Yuengling同Stroh's噉嘅都轉咗行做雪糕廠。加上冷藏技術嘅發展，雪糕好快就取代咗酒精嘅地位喺全國興起，喺海軍入面亦成為咗幫啲水兵紓壓解困、提升士氣嘅甜品 。

雪糕廠遊說

美國農業部嘅Basic 7食物表

1941年，為咗應對二戰時期物資短缺，美國政府同其他盟軍一致將雪糕歸類做非必要食物。但係喺國際雪糕製造商協會（英文：International Association of Ice Cream Manufacturers）同國家乳業委員會（英文：National Dairy Council）嘅強烈反對同遊說之下，政府唔單只撤回咗呢個決定，仲將雪糕列入農業部嘅Basic 7七樣基本食物表，建議國民每日都要食奶製品。

海軍之後亦列咗雪糕做激勵士氣、安穩軍心嘅必要軍需。海軍部長James Forrestal更加喺部下報告話陸軍無限量供應雪糕而佢哋一個禮拜派得兩次之後，將雪糕列咗做最優先事項。有講法話呢個就係海軍決定使成一百萬整雪糕駁船嘅緣由。

建造

另一隻混凝土駁船USS YOG-42

因應造船業鋼材短缺嘅問題，美國到咗太平洋戰爭後期焗住要用鋼筋混凝土嚟整駁船，當中就包括改造前派咗去陸軍嘅雪糕駁船。有唔少中文媒體聲稱雪糕駁船叫做「石英號」（英文：USS Quartz），但呢個講法好大機會係誤傳。雖則石英號同樣係混凝土駁船，但冇記錄顯示佢有專責派過雪糕。其實雪糕駁船並冇正式改過名，編制上淨係叫做BRL（全稱：Barge, Refrigerated, Large，大型冷藏駁船）。

美國海軍係喺1945年同陸軍運輸隊借駁船嚟改裝嘅，工程合共使咗一百萬美金。不過呢一百萬究竟整咗幾多隻雪糕駁船出嚟就眾說紛紜。新啲嘅參考資料普遍話得一隻 ，亦有講法話有兩隻，反而當時某啲業內資料就提到有三到十一艘不等，呢個情況可能係源於數法嘅差別。綜合各方講法，專門供應雪糕俾其他艦艇嘅駁船應該只得一艘，其他幾架雖然配備咗整雪糕嘅功能，但仲要送埋凍肉之類嘅其他冷藏物資。

運作

雪糕駁船有「浮動雪糕工廠」嘅稱呼。船上面配置咗整雪糕嘅設備，每七分鐘可以整到十個美制加侖（約38公升）嘅雪糕出嚟，即係每更整成五百美制加侖（約1900公升）。另外仲有位擺多二千美制加侖（約7600公升）嘅雪糕，方便運送。雪糕駁船會定時定候派雪糕畀啲冇位擺雪糕機嘅細船，亦有講法話啲雪糕會供應畀一啲叫做「雪糕船」（英文：ice cream ship）嘅船仔，再由佢哋分派畀官兵。

雪糕駁船並冇摩打，要靠其他船拖住先郁到。二戰後期派駐咗喺西太平洋，據講泊咗喺密克羅尼西亞嘅烏利西海軍基地（英文：Naval Base Ulithi），喺另一隻供應可樂嘅駁船側邊。不過有水兵憶述喺所羅門群島嘅瓜島嗰度食過雪糕駁船嘅雪糕，未知係咪同一隻船。雪糕駁船最後下落不明，或者係同其他混凝土駁船一樣喺某個港灣擱淺咗。