青衣游泳池

出自維基百科,自由嘅百科全書
Jump to navigation Jump to search
青衣泳池

青衣游泳池英文Tsing Yi Swimming Pool)係香港青衣島一個泳池,近藍巴勒海峽,響青衣城青衣運動場青衣海濱公園同埋青敬路之間。個池響1980年代中已經劃好響現址起,不過要去到1996年,由舊時區域市政局起成,交畀區域市政總署管。2000年區域市政局解散之後,就由康樂及文化事務署接管[1]

青衣泳池佔地成1.76公頃,係葵青區三公眾泳池之一,另外兩個係葵盛游泳池北葵涌賽馬會游泳池。青衣泳池係區裏面至新至多人嘅泳池,好早就埋家庭更衣室設施[2]

社區地位[編輯]

雖然1970年代尾開始,青衣島人口就起勢咁飊,1980年代都規劃好晒,但係一直都無公眾地方畀島民游水。所以,未起青衣泳池之前,呢處嘅人都會去葵盛游泳池同之後嘅荔枝角游泳池。要到1996年青衣先至有自已嘅公眾泳池,個泳池好受島民歡迎。

因為咁受歡迎,葵青區議會議員就提過不如將青衣泳池改成暖水泳池,等島民冬天都有得用。不過,康文署話暖水池要起鍋爐,改裝費好貴,不如叫人去隔籬區嘅荔枝角泳池,深水埗公園游泳池同埋城門谷游泳池[3]

咁啱泳池起好嗰時,青衣西面東涌新市鎮又開始起勢咁起。雖然東涌同青衣都幾遠下,但係青衣泳池已經係東涌人最方便去嘅泳池,所以個泳池都要兼顧埋東涌人口。2006年計東涌有成8萬人住,不過政府就根據《香港規劃標準與準則》,話東涌人口比例唔夠數,一直都唔肯起泳池。不過《2006至2007年施政報告》,政府先決定起東涌游泳池,最快響2011年完工[4]。起好之前,康文署響2006年夏天搞過「跳出東涌齊暢泳」游泳同樂日,安排埋旅遊巴,送東涌居民來回青衣泳池,以解東涌居民無水游之苦[5]

設施[編輯]

  • 主池
  • 習泳池
  • 戲水池
  • 嬉水池
  • 974個座位觀眾看台
  • 電子計分板
  • 家庭更衣室

青衣泳池同好多香港公眾泳池一樣,係預咗位有間餐廳,家下青衣泳池餐廳係新生餐廳,係新生精神康復會打理。泳池餐廳開初曾經公開招標,搵人頂來做,後尾區域市政總署檢討過﹐自動飲品售賣機或者小食亭都夠晒﹐加上附近有好多食肆﹐所以就索性將地方改做多用途活動室,搞訓練班講座、或者畀學校搞水運會嗰陣做指揮中心[6]。最尾,呢處又改餐做餐廳,畀新生精神康復會,精神病康復者學員做餐飲,等佢吔可以重投社會[7]

開放時間[編輯]

  • 第一節:上晝6:30至中午12:00
  • 第二節:下晝1:00時至6:30
  • 第三節:晚上7:30至10:00

(暫停開放時段:中午12:00至下晝1:00;下晝6:30至7:30)

附近公共設施[編輯]

青衣泳池交涌好方便,因為隔籬就係地鐵機鐵青衣站,兼巴士總站同小巴站,穿過青衣城就到。青衣泳池同其他康樂設施係連成一氣。除咗隔籬青衣海濱公園同青衣運動場兼球場,過馬路重有青衣公園青衣綜合大樓裏面嘅青衣體育館

大清潔日[編輯]

逢禮拜四(如果大清潔日係公眾假期,游泳池會照常開放,而大清潔日會改喺嗰個禮拜嘅禮拜二進行)

參考[編輯]

  1. 葵青區議會 (2005年). 葵青—舊貌新顏·傳承與突破增訂版. 香港: 葵青區議會. 第 74頁頁.  External link in |title= (詳情)
  2. 葵青區議會康樂及文化委員會第三次會議記錄(二零零五/零六)
  3. 葵青區議會康樂及文化委員會第一次會議記錄(二零零六/零七)
  4. 東涌泳池2011年竣工,香港政府新聞網,2006年7月5號
  5. 康文署辦東涌游泳同樂日,香港政府新聞網,2006年7月21號
  6. 區署僅按環境需求轉變 更改屬下泳池餐廳用途,《成報》,1999年6月20號
  7. 衛生福利及食物局局長巡視葵青區,政府新聞署,2006年8月4號

出面網頁[編輯]