香港報紙

香港每日都會出版好多份報紙，係全球按人口比例計，最多中文報紙嘅地方。香港報紙主要用中文正體字出，亦有用英文出。香港報紙主要特點係版數多同埋彩色印刷，用對開紙，左開本形式出。

主要嘅香港中文報紙有：《星島日報》、《東方日報》、《明報》、《成報》、《大公報》、《文匯報》、《香港商報》等。而英文報紙就有《南華早報》。

香港報紙史

香港第一份報紙係1841年5月1號創報嘅《Hong Kong Gazette》（香港公報），呢份係一份英文報紙。而第一份中文報紙就叫《遐邇貫珍》，1853年8月1號創報，由馬禮遜教育學會（The Morrison Education Society）出版，香港中環英華書院印刷，創辦人係麥都思（W. H. Medhurst）。呢份報紙其實原本係教會刊物，不過由於內容有涉及一啲時事、政治、文化科學知識，所以都可以算係一份報紙。《遐邇貫珍》出到1856年5月1號停刊。

至於第一份正式中文報紙，就係1858年（咸豐八年）創嘅《中外新報》，呢份原本係英文報紙《孖喇報》（Daily Press）嘅附刊，嗰陣時因為編中英字典而整咗套中文活版鉛字，編輯伍廷芳就建議出一份中文附刊，慢慢受落，後來就獨立做一份正式中文報紙。呢份唔單止係香港第一份中文報紙，重係中國第一份中文報紙。

不過一直以來報紙都係由西人出錢搞，直到1874年2月4號王韜創辦《循環日報》，係第一份由中國人出錢出力搞出嚟嘅中文報紙，而且係每日出版，喺嗰陣時報紙多數都唔係日日出，多數隔日出或者一個禮拜出一次。

1905年鄭貫一出版《有所謂報》，《有所謂報》全名《唯一趣報有所謂》，呢份報紙特點係夾埋文言、語體同粵語一齊寫，首創用廣東話寫文嘅報紙。

1925年6月5號出版《華僑日報》，1995年停刊，但仍然重保持住最長報齡中文報紙記錄。1945年開始有左派報紙出，好似《大公報》、《文匯報》。相對左派報紙，亦有代表中華民國立場嘅《南華日報》、《國民日報》。1976年開始有馬經出。

1960年11月1號韋基澤創辦《天天日報》，首創彩色印刷，唔單止係香港第一份彩色報紙，重係全世界第一份彩色報紙。

1995年6月20號生意人黎智英創辦《蘋果日報》，無論喺編採方針同版面設計都唔同傳統香港報紙，結果其他報紙都跟風，影響香港報業發展好大。

2021年6月24號《蘋果日報》結束營運。

銷售方式

香港報紙傳統上都放喺報紙檔賣，後來便利店都有報紙賣，搶咗報紙檔唔少生意。香港報紙多數賣$10份，而且買報紙通常都送紙巾。

市場

而家香港報紙嘅市場主要都係香港市民同海外華人。不過早期，即係早到清朝咸豐年嗰陣，香港報紙，即係三大中文報好似《中外新報》、《華字日報》（Chinese Mail）、《循環日報》嘅市場係賣到全中國，不過後來因為好多政治變化，例如國共內戰、文化大革命等等，香港報紙已經唔畀入大陸，一路到而家都重有限制，例如《蘋果日報》就當係違禁品唔畀帶返大陸，不過一啲親中報例如《大公報》、《文匯報》，就過到關。

而家一份報紙通常賣10蚊，其實唔夠圍皮。香港報紙嘅主要收入有8成係來自廣告，登一次全版廣告最小都要收十幾萬。

立場

香港報紙立場曾經分成左中右三類，各佔唔少市場份額。而家，由於市論自由消逝，大部分都會歌頌中共，中立嘅已經冇嗮；僅餘幾份極之反共嘅；都經常受到暴力同司法攻擊。

左派（親中派）報紙

所謂左派其實係喺冷戰時期，擁護左派立場例如共產主義嘅意識形態。但全世界好多共產黨都企唔住，中國共產黨都唔再講共產主義，左派慢慢變成擁護中國共產黨政權嘅立場，所以後期啲人已經改叫呢類報紙做「親中」（「親中」指親中共，「親台」指親民國，「親華」指親以上兩者之一或之二）而好少再叫左派。家陣共產黨自稱行緊社會主義，又實踐民主（靠民主集中制），不過外界一般認為嗰套係官僚資本主義，同國民黨敗走台灣前實行嘅制度類似。

現時親中收費報有《大公報》、《文匯報》、《星島日報》、《東方日報》，立場親中同時撐商界嘅有《經濟曰報》同《商報》，相對低調嘅親中報亦都有《香港01》。

知識份子報

知識份子報即係由一啲知識份子報人辦嘅報紙，即係所謂「文人辦報」，呢類報紙嘅特點係強調中立同學術性，賺錢係其次，最重要係使命，着重創報人理念，不過呢類報紙難賺錢，近年呢種色彩幾乎無晒，而且都唔再咁堅持，開始市場主導，論調亦逐漸接近中共嘅。

代表有《信報》同《南華早報》。

中間派報紙

所謂中間派係指呢啲報紙立場較為中立客觀，唔至於過份偏激，通常呢啲報紙有乜新聞就報乜嘢新聞，報導較為全面，講究資訊來源嘅可信性，提供讀者需求嘅資訊，亦有啲中間派報紙以市場導向為依歸，缺乏鮮明立場。不過香港報紙主要收入來源係廣告，喺97回歸之後，中資機構或者親中機構嘅廣告成為香港報紙主要收入來源，令部分呢類報紙立場亦開始傾向親中。

不過，亦有部分呢類報紙堅持自己立場，直到有人事異動，例如《明報》。

右派報紙

右派報紙同親中報立場啱啱相反，共通點係大家都立場鮮明，親中報就支持親中政黨，而右派報紙就係抱持反中共嘅立場。另外有右派報紙焦點喺香港民主——商業掛帥，支持泛民主派嘅《蘋果日報》（已停刊）、宗教主導嘅《公教報》。重有主題喺大陸，激進反共嘅《大紀元時報》同《成報》。

種類

• 大報：即係一啲大規模報社出版嘅報紙，呢啲報紙通常多人買，所以印量多，版數亦多好多。代表有《蘋果日報》、《東方日報》
• 細報：即係一啲細規模報社出版嘅報紙，呢啲報紙比較無咁多人買，版數都無咁多。代表有《信報》、《成報》
• 英文報：用英文寫嘅報紙。代表有《南華早報》、《英文虎報》
• 免費報：即係喺街免費派嘅報紙，通常喺地鐵站攞到。代表有《頭條日報》、《睛報》
• 求職報：以搵工請人資訊為主嘅報紙，通常每份一個禮拜出一至兩次，通常唔係免費派就係要畀錢。代表有《Recruit》、《Job Market》、《Classified Post》、《招職》
• 馬經：以賽馬資訊為主要內容，通常唔係日日出，有馬跑前幾日先出，例如當香港賽馬會出咗排位之後就會出排位版，賽日前一晚就會出賽日版或者賠率版。代表有《賽馬消息》、《騎師日報》
• 地區報：以地區資訊為主，唔會周圍有得買，只係喺返嗰區入面先有。代表有《星島日報─地區報》
• 晚報：黃昏時出嘅報紙，而家已經無晒。代表有《新晚報》（已停刊）、《星島晚報》（已停刊）

內容

• 港聞：又叫做A版，通常放喺頭版，專報導香港新聞
• 兩岸：專報導中國大陸同台灣新聞資訊
• 國際：專報導世界各地新聞資訊
• 娛樂：專報導藝能界明星名人八卦新聞資訊
• 體育：專報導運動新聞資訊，近年加入波經，分析球賽同賭波賠率
• 經濟：專報導財經新聞資訊，例如股票價格上落
• 社評：又或者叫社論，即係時事政治評論，通常代表份報紙嘅立場
• 副刊：趣味性資訊，又或者係一啲名人寫嘅專欄、時事分析
• 廣告：分類廣告、招聘、招標、法律公告、訃聞等等
• 馬經：專報導賽馬資訊。不過馬經版唔係份份報紙都有
• 風月：鹹濕資訊，風月場所或者性知識、性感女郎相。不過風月版唔係份份報紙都有

印刷

以前嘅香港報紙係用活版印刷，即俗稱「執字粒」，後來電腦技術提升，再始改晒用電腦排版。電腦排版之後，成本同制作時間都減省咗，一啲大報開始全彩色印刷。

每間報社流程唔同，不過通常一份報紙最先印係副刊，因為副刊無咁強時間性，大約下晝四點到六點就截稿。跟住係娛樂版同經濟版，一般大約下晝五點到八點就會截稿。再之後係國際同體育版，一般夜晚八點到十點左右截稿。最後係港聞，一般凌晨兩點前就會截稿，不過如果喺截稿之後有突發大鑊新聞，就會即時改版，最多等到凌晨四點，四點之後再有突發大鑊新聞，就改唔切要出號外。截稿之後就會出菲林然後拎去印，通常朝早五點前就可以送到去報販手上。

參考

書

• 《香港報業雜談》 李家園著 三聯出版 1989年 ISBN 962-04-0693-1
• 《香港報業縱橫》 陳昌鳳著 ISBN 750362120
• 《香港報壇回憶錄》 馬松柏著 商務出版 ISBN 962-07-6295-9

睇埋

• 香港報紙一覽

出面網頁

• 香港開埠初期的報業市場
• 香港報業的幾個誤解