鳳園
(由鳳園老圍跳轉過嚟)
鳳園（英文：Fung Yuen，舊Fung Un）係香港一地，係一谷，亦係一村。佢喺大埔東北，近香港教育學院。佢東南隔山係下坑。
地理
[編輯]鳳園佔全個谷，有涌由九龍坑山，向東南流入鳳園，再南流入大埔海。鳳園谷口，原本就係大埔海，因爲大埔工業邨填海，谷口離海好遠。
個谷由於有涌，而谷地又平，都啱種嘢，所以舊時就開過唔少田。
歷史
[編輯]鳳園嘅村，叫鳳園圍（英文Fung Yuen Wai，舊Fung Un Wai），喺谷嘅東北，近山之處。因爲家族繁衍，亦喺谷嘅其他地方起屋，所以原本嘅鳳園圍,又叫鳳園老圍，或者鳳園老村。條村喺大清交新界畀英國之前就有。之後谷又多咗啲村，舊圍南面有麥屋，遠啲東南有流坑，再南啲有田心同狗屎圍。
生態
[編輯]鳳園係個生態價值高嘅地方，風水林生咗好多罕有草木，亦發現有蝴蝶一百八十種，佔全香港發現品種嘅七成半。
老圍北面近山，向汀角嗰邊，係個具特殊科學價值地點，係一九八零年漁農署（家下叫漁農自然護理署）所劃嘅，地有四十二公頃左右。二零零五年十一月，香港政府推行新自然保育政策，撥款喺鳳園推行土地管理協議試驗計劃。個計由大埔環保協進會，喺鳳園私人擁有嘅具特殊科學價值地點，做蝴蝶保育工作，為期兩年。
家下長實擁有鳳園谷毗鄰嘅地，而劃爲可作綜合發展用地。之不過，咁會影響鳳園生態環境，關乎蝴蝶存亡。重有係，鳳園有野戰發燒友，就算犯法，都喺到打野戰遊戲，留低垃圾，破壞自然。
交通
[編輯]鳳園有鳳園路出汀角路入大埔。新界專綫小巴有20P綫，往來鳳園同大埔墟火車站。