龍門冰室
| Lung Mun Cafe | |
 | |
 龍門冰室銅鑼灣分店 | |
| 開檔 | 2012年11月7號 |
|---|---|
| 執笠 | 2022年5月4號 |
| 總部地址 |  香港 |
| 舖頭數目 | 7（2020年高峰期） |
| 緊要人物 | 張俊傑 |
| 產業 | 食肆 |
| 網址 | www.facebook.com/LungMunCafe/ |
龍門冰室（英文：Lung Mun Cafe），部份分店叫瓏門冰室，係香港一個執咗嘅食肆品牌。雖然個名叫「冰室」，但佢實質係港式茶餐廳。龍門冰室曾經有兩個分支：一個係創辦人張俊傑名下嘅，而家已經全線執笠（高峰期曾經有七間），曾經係黃色經濟圈嘅頭號黃店；另一個係屬富臨集團名下嘅，曾經有兩間分店，兩個分支嘅招牌、裝修格局同餐牌都大致一樣，不過後者隨住張俊傑同富臨關係決裂已經全線執笠。隨住龍門冰室醜聞不斷，繼而宣布退出黃色經濟圈。
史
[編輯]早期張俊傑獨營
[編輯]龍門冰室喺2012年11月7號創辦，創辦人係原本做精算師嘅張俊傑。冰室開喺新界屯門龍門居，所以就用咗「龍門」個名，之後陸續喺港九新界開分店，之後更開埋中央工場[1]。
合作同分家時期
[編輯]根據創辦人張俊傑嘅講法，2018年富臨集團想同佢合作，喺佢同意下同佢合組公司，喺屯門海麗花園開分店。張俊傑同富臨分別持有合營公司三成同七成股權[2]。但之後富臨未經佢同意就喺香港仔開多間分店，又喺富臨集團嘅年報話「龍門冰室」係佢哋嘅品牌，令到張俊傑好唔滿意。對於呢啲指控，富臨集團一路都無回應過[3]。
割席同示威情況
[編輯]2019年，反修例運動爆發。8月11號港島東示威期間，有好多「福建幫」駐守喺富臨集團旗下一間酒樓入面，結果畀示威者指責富臨同「福建幫」有密切關係，呼籲杯葛富臨旗下所有食肆，龍門冰室亦受到牽連。呢個時候，龍門冰室創辦人張俊傑隨即公開割席，話富臨名下嘅2間分店係「假龍門」，同佢無任何關係。自此，張俊傑名下嘅龍門冰室開始高調撐示威者，譬如提供免費餐畀學生示威者，變成深受示威者歡迎嘅「黃店」，成日大排長龍[4]。
雖然張俊傑8月喺網上公開割席，但係要到9月13號佢先至將合營公司三成股權轉贈畀人，11月4號提出辭任合營公司董事，正式斷絕關係[5]。
兩邊陣營嘅龍門冰室都畀人破壞過。10月4號晚香港仔頭一次有勇武派搞「開花」，區內多間舖頭被破壞，富臨旗下嘅龍門冰室香港仔分店畀人打爆門口玻璃。10月24號清晨，張俊傑旗下嘅龍門冰室紅磡分店畀人幾個人揸住鐵錘打爛門口玻璃、收銀機同檯凳[6]。10月28號晚屯門示威嗰陣，富臨旗下龍門冰室海麗花園分店被開展「黑裝修行動」，畀人掟汽油彈[7][8]。11月9號清晨，再輪到張俊傑旗下嘅龍門冰室銅鑼灣分店被大肆破壞[9]。
11月上旬，富臨旗下嘅兩間龍門冰室暫停運作，舖頭出面圍咗板，同埋遮住咗舖頭名[5]。其中香港仔間舖喺2020年1月確定富臨已經棄咗租，改由「黃店」「一起果醬」承租，開設佢港島區頭一間分舖[10]。
2020年6月30號，港版國安法通過嗰日，龍門冰室喺Facebook宣布正式退出黃色經濟圈[11]。
業務收縮同全線執笠
[編輯]龍門冰室全盛時期有七間分店，不過因為財政問題等因素，2020年下半年炮台山、紅磡同屯門分店先後結業，到2021年上半年銅鑼灣同荃灣分店亦先後結業，得返尖沙嘴同沙田分店仍然運作[12]。2021年8月沙田分店結業，得返尖沙嘴唯一一間分店。2022年5月4號尖沙嘴分店都執埋，亦即係全線執笠。
參考
[編輯]- ↑ 精算師棄300萬年薪 開冰室圓創業夢 香港經濟日報
- ↑ 〈【割席】龍門冰室老闆辭「富臨龍門」董事 雙方均稱對方拒聯絡 (11:02) - 20191112 - 即時財經新聞〉。《明報財經網》 (zn-tw)。喺2021-01-03搵到。
{{cite web}}: CS1 maint: unrecognized language (link) - ↑ 〈【逆權小店】龍門冰室鬧雙胞 屯門真．龍門冰室推免費香港人加油餐 創辦人兼老闆：被過橋抽板〉。《飲食男女》。原著喺2020-08-11歸檔。喺2021-01-03搵到。
- ↑ 市況差結業潮？茶餐廳東主：「生意好到廚師發脾氣！」 香港經濟日報
- ↑ 5.0 5.1 龍門冰室老闆辭「富臨龍門」董事 雙方均稱對方拒聯絡 張俊傑：已售股權蝕60萬 明報
- ↑ 【龍門冰室】CCTV影像曝光 五蒙面漢持鐵錘 大肆破壞20秒 香港01
- ↑ 痴撚線 富臨集團開咗間「龍門冰室」 連登討論區
- ↑ 【屯門異味】示威者向富臨旗下龍門冰室掟汽油彈 中銀一地玻璃碎 香港01
- ↑ 【龍門冰室】遭刑毀復修未完 午飯時間現人龍 半百食客排隊支持 香港01
- ↑ Lee, LorLor。〈【香港仔美食】手工果醬Let's Jam Café開新分店 歎全日早餐/鬆餅/九宮格多士 | 港生活 - 尋找香港好去處〉。《HK 港生活》 (香港中文)。喺2021-01-03搵到。
- ↑ 〈龍門冰室退出黃色經濟圈 老闆張俊傑：有一連串考慮 不單因國安法 | 立場報道 | 立場新聞〉。《立場新聞 Stand News》。原著喺2021-01-26歸檔。喺2021-01-03搵到。
- ↑ 龍門冰室暫能保住尖沙咀與沙田店 指會記住味道好才可留住客人
出面網頁
[編輯]- 龍門冰室嘅facebook頁
（創辦人張俊傑名下）
