Portal:法國/開頭

法國國旗	法國國徽

法國 (法文：France)，正式叫做法蘭西共和國 (法文：République française)，係一個本土位於西歐嘅國家，不過同時亦都有一個好龐大嘅海外領域。法國係喺歐盟入面，以面積嚟排最大嘅成員。

喺歐洲本土，法國以巴黎為首都；東面黐住德國、瑞士、同意大利，同時以阿爾卑斯山同萊茵河嚟做邊界；東南邊連住地中海，西南邊以比利牛斯山同西班牙分隔。喺西面，法國對出係大西洋，西北面以英倫海峽同英國相隔；喺北面，法國對住北海，又褦住比利時同埋盧森堡。

喺所有歐洲嘅大國之中，法國係歷史上最悠久嘅，由5世紀法蘭克王國成立一直到家下。自從17世紀嘅啓蒙時期開始，法國更加喺全世界嘅科學發展上面有好重要嘅影響力。除此之外，法國經過1789年嘅法國大革命，亦都設立咗早期對人權同共和制嘅根基。到19世紀，法國成立咗法蘭西殖民帝國，喺世界各地成立殖民地，將佢嘅影響力帶到歐洲以外嘅地方。自從1960年代，雖然大部分呢啲地方都已經去殖民化，不過仍然保留住文化嘅痕跡，例如講法文、食法國餐、同用民主制度等等。到今時今日，大家一般都認為法國係屬於西方世界嘅大國之一。