Portal:香港鐵路運輸/精選文/20

調景嶺站（粵拼：tiu4 ging2 leng5 zaam6；英文：Tiu King Leng Station）係港鐵觀塘綫同將軍澳綫嘅一個地底車站，係觀塘綫嘅上行尾站，位於新界西貢區調景嶺翠嶺路旁邊，於2002年 8月18號啟用，係觀塘綫唯一一個位於新界區嘅車站。

調景嶺站係座落喺維景灣畔同彩明苑側邊。佢嘅主入口響翠嶺路。呢個站出面有個交通交匯處，可以接駁其它公共交通工具到另外一啲地方。

調景嶺站啟用初期，由於四周只有彩明苑同維景灣畔兩個屋苑，因此車站出入閘人流一直比較少。但由於呢個站係觀塘綫同將軍澳綫嘅轉車站，因此，大部份利用呢個站嘅人流都係轉車嘅乘客，當時成為前香港地鐵系統中出入閘人流較少車站之一。直至鄰近屋苑（如都會駅）同埋學校落成後，車站人流開始上升，並帶動車站商店嘅生意。

另外，由於本站設有調景嶺渡綫，當本站有列車故障或者有將軍澳綫嘅列車臨時需要用本站做總站時，車站月台會出現大量人流。另外，每日亦有港鐵列車用位於本站嘅渡綫進行同方向嘅車務調動，康城站穿梭列車亦會用渡綫調頭。