Portal:香港鐵路運輸/精選文
利東站（粵拼：lei6 dung1 zaam6；英文：Lei Tung Station）係香港一鐵路車站，喺香港島鴨脷洲東北利東邨附近，歸港鐵南港島綫，2016年12月28號啟用。呢個站係目前港鐵系統入面最南端嘅車站（呢個站開通之前係柴灣站），亦曾經成為中國最南嘅地鐵站（2019年俾澳門輕軌蓮花口岸站取代）。呢個站最高點比海平面高70米，係港鐵系統當中海拔最高嘅地底車站。
由於車站大堂距離利東邨地面約50米，港鐵用四部雙門升降機取代扶手電梯接駁兩層，升降機運作同港島綫香港大學站、西營盤站嘅升降機相若，乘客喺其中一邊入升降機，升降機到達另一層之後，另一邊升降機門就會打開，等乘客離開後另一邊嘅升降機門隨即打開畀樓層乘客進入。
另一邊車站大堂距離鴨脷洲大街地面嘅垂直距離大約係10米，港鐵用一條長大約200米嘅坡道接駁。
呢個車站嘅特色係以「溫暖嘅橙色」作為主色，嚟自上蓋商場原有嘅深啡色，但係建築師解釋唔想位處地底嘅港鐵站顯得太暗，所以最後揀咗鮮橙色。而站裏面亦都設有描繪南區漁港景緻嘅藝術品。