Portal:香港鐵路運輸/精選文/Archives

出自維基百科,自由嘅百科全書

1

紅磡站外觀

紅磡站粵拼hung4 ham3 zaam6英文Hung Hom Station),以前叫過做九龍車站(Kowloon Station),係喺香港紅磡嘅一個港鐵車站,同時亦係香港嘅城際客運鐵路總站,位於九龍九龍城區紅磡西南,行政上屬於油尖旺區。呢個站係西鐵綫車站中,唯一一個未裝月台幕門嘅車站。

現時紅磡站係東鐵綫同埋西鐵綫嘅共同總站。月台1號月台4號月台往羅湖/落馬洲,月台2號月台3號月台就去屯門。由於西鐵列車車廂少過東鐵列車,所以如果搭較前/後嘅車卡,就要行多幾步去轉車。車站係全線唯入三島式月台設計,共分月台,中層月台及大堂。月台隔離有個紅磡貨場,紅磡體育館起係上面。東鐵綫西鐵綫兩個島式月台上面設有洗手間,係而家港鐵網絡中少數喺月台上設有洗手間嘅車站(另外嘅係欣澳站迪士尼站)。

自紅磡站啟用以來一共有7個月台,北面外牆寫有P1至P7,1號同4號月台畀東鐵綫用,而2號同3號月台畀西鐵綫用;至於5號同6號畀來往中國內地城市嘅城際直通車用,所以呢兩個月台都係禁區;另外7號月台係貨運月台,畀貨運列車裝卸貨物用,唔對外開放做客運用途。

隨住兩鐵合併九鐵營運近100周年,東鐵綫大部分車站進行翻新,其中本站月台用咗嶄新嘅白色同地板翻新。其後九龍南綫通車,月台內更採用多個先進嘅LCD顯示屏,方便乘客知道過對面月台定係過大堂先可以轉到較快開出嘅列車。另外留意東鐵綫列車長過西鐵綫,東鐵綫入站時嘅頭2卡同尾3卡乘客,要行去月台中間位置轉西鐵綫。

2

大圍站2號月台

大圍站粵拼daai6 wai4 zaam6英文Tai Wai Station)係港鐵東鐵綫屯馬綫一個架空車站,喺富嘉花園對開嘅位置,喺1983年8月15號開。

大圍站中央大堂連接A、B、C、D 出口,另外喺1及2號月台南端亦設有出入閘口分別連接F,G 出口及E 出口。

車站設有4個側式月台,位於大堂上面。當中2號同3號月台設有4條斜道連接,令屯馬綫南行轉東鐵綫南行(同埋掉轉)嘅搭客唔使上落樓,斜道設計更方便傷殘人士用。但係其他轉綫乘客就要先經過大堂。要注意嘅係,為方便乘客轉東鐵綫屯馬綫唔同香港其他嘅鐵路系統,係右上左落嘅。所以位於右邊嘅4號月台係屯馬綫嘅北行月台。

大圍站以南設有一個大型公共運輸交匯處,乘客可利用地面行人通道進出車站。另有一條廿四小時全日開放嘅行人隧道,連接村南道同埋公共運輸交匯處。

大圍站共設七個出入口,新設嘅出入口有五個,其中三個位於擴建嘅車站大堂,兩個位於美田路以南連接東鐵綫北行大堂。原有位於美田路以南連接東鐵綫南行大堂,以及位於村南道嘅出入口將會保留。

3

沙田站4號月台

沙田站粵拼saa1 tin4 zaam6英文Sha Tin Station)係香港一個鐵路車站,喺港鐵東鐵綫之上。個站喺沙田排頭圍田寮隔籬。呢個站係兩鐵合併之前係九廣東鐵嘅一個車站。沙田站早喺1910年開站,佢同埋粉嶺站係現時香港用緊嘅港鐵車站之中,用得最耐。

沙田站有4個月台,以兩個島式月台並排。一、二號月台,泊東鐵綫羅湖落馬洲方向嘅列車;而三、四號月台,泊東鐵綫去紅磡方向嘅列車。大部份時間,北行泊1號月台,南行泊4號月台。當有城際客運列車經過沙田站,北行會泊2號月台,南行會泊3號月台。而沙田站開出南行嘅特別班次,亦會泊3號月台。另外,沙田站一號月台側邊,有多條路軌,係臨時軌道工場,泊工程車同維修車,部面放咗唔少路軌零件同維修工具,亦設有沙田貨場,供上落貨卡之用。因為何東樓車廠有上蓋建築工程,路軌保養基地曾經搬過嚟呢度,家下已經搬返走。

沙田站係東鐵綫嘅中途站。另外,每逢馬場站開放,沙田站會做一個臨時轉綫站,往羅湖落馬洲方向列車嘅乘客要去馬場站,必須喺沙田站等候經馬場站嘅列車。而去火炭站嘅乘客,就要喺沙田站等經火炭站嘅列車。

4

大學站1號月台

大學站粵拼daai6 hok6 zaam6英文University Station)係位於香港沙田區嘅港鐵東鐵綫車站,之前叫馬料水站,喺1966年改名做大學站,以車站旁邊嘅香港中文大學而得名。

大學站係一個地面車站,但主要大堂係位於2號月台側邊嘅下一層,同時有另一個較細嘅大堂喺1號月台側邊。2個大堂同埋月台由兩條路軌下嘅通道連接(一條喺收費區內,一條就喺非收費區)。收費區嘅通道喺中文大學嘅一邊設有閘機。雖然大學站望落好似同香港中文大學有一段距離,但係1號月台設有另一個西面大堂通往香港中文大學,並設有閘機方便出入。

大學站設有兩個側式月台,月台只有中央部份設有上蓋,兩端都係露天。本站係三個設有「空隙黑點」提示嘅車站之一(另外兩個係九龍塘站旺角東站),兩個月台都喺急彎之上(列車限速係每小時55公里),空隙係港鐵中最闊嘅,可達34厘米,因此乘客較易發生墜軌意外。

大學站隔離就係香港中文大學,遠少少有香港科學園馬料水碼頭。車站隔離有個巴士總站,有巴士同小巴去馬鞍山同科學園。

5

黃埔站唯一嘅月台

黃埔站粵拼wong4 bou3 zaam6英文Whampoa Station)係香港港鐵觀塘綫嘅車站。因為黃埔花園好多人,所以想設站;呢嗰站亦係因為黃埔花園得名,喺2016年10月23號通車。

由於單月台設計容納唔到所有觀塘綫嘅車,所以觀塘綫喺好多人嘅繁忙時間嘅列車服務,會用梅花間竹嘅方式,一班用黃埔站做終站,另一班喺何文田站終止服務並且用何文田站底層隧道返去何文田站載客,好似家下青衣站東涌綫)繁忙時間嘅列車服務。因此,黃埔站喺繁忙時間嘅班次會係4分鐘一班,而唔係觀塘綫其它站嘅2分鐘一班。

由於車站選址周圍都係大廈樁柱又滿布公共設施同喉管電線,能夠施工嘅空間有限,所以只有1個側式月台畀乘客上落,情況類似現時寶琳站、迪士尼站同博覽館站單月台設計,乘客落車之後,列車就會改為相反方向,畀乘客進入列車前往調景嶺方向。

由於車站鄰近黃埔天地、黃埔花園、黃埔新邨、海濱南岸、海逸豪園等多座住宅、商場同百貨公司,亦有喺紅磡工業區嘅上班族使用,因此每日有唔少乘客進出,大部份使用車站出入閘嘅人流都係住喺黃埔同紅磡嘅居民、返工人士、中小學生、食客、娛樂同購物人士。

6

何文田站1號月台

何文田站粵拼ho4 man4 tin4 zaam6英文Ho Man Tin Station)係港鐵觀塘綫嘅車站,響香港九龍城區老龍坑。個站喺2011年7月25號開始起。未來將會同沙中綫屯馬綫)連接。

何文田站設喺老龍坑忠孝街漆咸道北/仁風街之間,原本係山谷道邨嘅地。喺合併方案建議下,個站會發展成港鐵全港最大嘅轉車站,包括上下兩層月台,分別畀東西綫同埋觀塘綫列車停站,兩層月台呈十字型交叉。車站結構複雜,高低落差有成70米,乘客由大堂入閘到觀塘綫月台要搭4條扶手電梯,大約要用3分鐘。

服務對象主要係居住喺鄰近嘅居民、返班人士、鄰近學校學生、香港公開大學學生同香港理工大學宿舍學生。由於現時只係開通咗觀塘綫,從L2層嘅車站大堂需要落4層先能夠到達L7層嘅觀塘綫月台,所以開通初期除咗上下晝繁忙時間因為鄰近嘅漆咸道北塞車而吸引乘客乘搭之外,整體嘅出入閘人流會較少。每日夜晚、星期六、日同公眾假期,人流會更加少。所以,何文田站係港鐵觀塘綫17個車站當中其中一個人流較少嘅車站。

由於巴士受港鐵影響而削減班次,故此現時已吸引部分市民改用呢個站出行。另外,由於車站出入口係免費使用,所以亦吸引部分市民利用升降機、扶手電梯等來往山上同紅磡。

7

鑽石山站2號月台

鑽石山站粵拼zyun3 sek6 saan1 zaam6英文Diamond Hill Station)係港鐵觀塘綫屯馬綫地下鐵站,喺香港黃大仙區鑽石山,係最近大老山隧道鐵路站,同附近嘅荷里活廣場相連。全個站用黑色做主要色調,並用銀色石塊點綴,代表鑽石

鑽石山本身只係一個石礦場,冇出產過鑽石。「鑽」本身係動詞,而「石」先至係名詞,代表呢度係個石礦場。一般人相信,係港英政府嘅錯譯。所以「鑽石山」英文畀人錯譯做「Diamond Hill」而唔係「Rock Digging Hill」。約定俗成之下,鑽石山站英文名叫做「Diamond Hill Station」。

車站開幕初期,人流一直偏低,返工時間以外人流更冷清。大老山隧道啟用之後,部份沙田區大埔區嘅公共巴士開始途經此站,人流開始有所增加。當此站上蓋物業星河明居同大型商場荷里活廣場開幕,使用情況已經大大改善。加上屯馬綫喺2020年2月14號通車後,新界東部及北部居民可以用此站轉觀塘綫往返九龍東部,預料本站客流量會進一步上升,並有助分流九龍塘站嘅轉車客流。

8

彩虹站4號月台

彩虹站粵拼coi2 hung4 zaam6英文Choi Hung Station)係香港車站,喺港鐵觀塘綫上。佢特色一層四月台,站有三軌道,四月臺,並排而行。外側兩軌道觀塘線來回,而中間軌道,通去九龍灣港鐵車廠。觀塘線尾班車到達後,會條軌落客,然後返車廠。

彩虹站附近有多個公共屋邨,並有多間中小學,因此人流一直穩定。另外來往西貢及清水灣嘅公共交通好似巴士、小巴等,都以彩虹站做總站或經呢個站,故此有唔少西貢居民,或假日去清水灣遊覽嘅市民,都會喺呢個站落車轉其他公共交通。亦有香港科技大學公共交通經彩虹站,故此喺返學放學時間,好多科技大學師生會取道彩虹站轉巴士或小巴往返科技大學。另外,四順區居民亦會喺彩虹站,轉由彩虹站開出嘅專線小巴往四順區。

另外,由於本站接近九龍灣車廠,每當繁忙時間之後,部份觀塘綫列車喺本站中央路軌嘅2號月台清客後,會停止服務返車廠。

喺1984年,《邵氏》電影為咗拍《緣份》而喺呢度攞景。

9

中環站荃灣綫月台

中環站粵拼zung1 waan4 zaam6英文Central Station)響香港中環遮打道畢打街同埋德輔道中一帶,係港鐵站之一,車站有4個月台。

呢個站係荃灣綫香港島嘅總站同港島綫中途站,響環球大廈干諾道中交易廣場地底以行人通道同東涌綫機場快綫香港站相連。呢個站採用磚紅色為主要顏色,而荃灣綫月台就用深咖啡色作為主要顏色。

中環站有5層,地面係車站出口,車站大堂同商店主要響中環站嘅L1、L2層。L2同L4層分別係港島綫3號月台(往柴灣)同4號月台(往堅尼地城),而L3層就係荃灣綫嘅1號同2號月台(往荃灣)。

另外,響L1層嘅遮打道大堂同車站出口之間重有一層閣樓,用嚟通去車站出口,地鐵公司響車站嗰層開放咗「藝術管道」,為藝術家提供一個展覽場地。而響L2層嘅畢打街大堂設有行人隧道連接香港站東涌綫大堂。

10

金鐘站4號月台

金鐘站粵拼gam1 zung1 zaam6英文Admiralty Station)係個香港鐵路站,喺香港島中環東面,站色係深藍同埋,有荃灣綫港島綫南港島綫同埋東鐵綫行過,遞時重會有東鐵綫沙中綫過海段)經過,形成大型綜合轉車站。

金鐘站有6層,地面係車站出口同埋公共運輸交匯處,車站大堂、商店同埋客務中心等主要設施喺L1層。

L2層係荃灣綫4號月台(往中環方向)同埋港島綫3號月台(往柴灣方向),主要畀乘客由荃灣綫轉港島綫去香港島東面;L3層係港島綫2號月台(往堅尼地城方向)同埋荃灣綫1號月台(往荃灣方向),主要方便乘客由港島綫轉荃灣綫去九龍同埋新界等地。L6層係南港島綫5號同6號月台,去港島南部嘅地方。

原來嘅車站大堂向東擴建咗,即係而家夏慤花園地底。計劃喺兩層地下月台嘅下面再起新嘅轉車大堂畀南港島綫同埋南北走廊使用。轉車大堂會以扶手電梯連接大堂嘅擴建部份,與及荃灣綫同港島綫嘅月台。

11

荃灣綫1號月台

美孚站粵拼mei5 fu1 zaam6英文Mei Foo Station)係香港一個鐵路車站港鐵荃灣綫西鐵綫都經過本站。荃灣綫大堂同月台,喺美孚新邨萬事達廣場地底,而西鐵綫嘅大堂同月台,就響荔枝角公園入面,兩邊大堂有條喺閘內嘅路連埋,方便人轉車。

成個美孚站可分做荃灣綫同埋西鐵綫兩個部分,其中荃灣綫嘅大堂同埋月台分別喺L2同埋L3層,L1層係通往西鐵綫大堂嘅通道。條通道伸延去到喺荔枝角公園嘅地面出口,同埋西鐵綫大堂位處嘅C層,西鐵綫嘅月台喺地面(P層)。兩個大堂都設有票務設施同埋車站商店。美孚站嘅車站出口主要喺地面,同埋荔枝角公園嘅平台上。

美孚站有荃灣綫同埋西鐵綫大堂兩部份,並設有行人隧道連接兩個車站大堂。後嚟因兩鐵合併,部份行人隧道改做收費區通道,以方便轉乘兩條路線嘅乘客。喺荃灣綫大堂同埋轉乘通道(近西鐵綫大堂)都設有車站商店,而西鐵綫大堂更加設有郵箱。

本站設有四個月台,各月台都設有月台幕門。荃灣綫1號(往荃灣)同埋2號月台(往中環)共用一個島式月台,位於美孚新邨地底,介乎荔灣道至到美孚巴士總站之間。西鐵綫1號(往屯門)同埋2號月台(往紅磡)係兩個側式月台,喺荔枝角公園貼近呈祥道嘅地面,側式月台佈置同上環坑口站一樣。1號月台西面設有預留管道畀未來港口鐵路線嘅貨運列車用。

12

荔景站L3月台層

荔景站粵拼lai6 ging2 zaam6英文Lai King Station)喺香港新界葵青區荔景山,係港鐵荃灣綫同埋東涌綫嘅轉車站。個站有4個月台,以兩個島式月台排列,全部月台都裝咗月台幕門。

荔枝角站一樣,由於鐵路最初起嗰時係由日本嘅西松建設起,而且當時香港嘅製版機都用日本嘅字型,所以站入面嘅名用咗日文漢字「茘」(艸部下面3個刀字),而唔係香港常用嘅「荔」字(艸部下面3個力字)。

又有另一種講法係地鐵早年根據康熙字典茘係正體,荔係俗體,所以地鐵系統內所有帶茘字嘅站名同出口指示都用刀而唔用力。

荔景站本來係一個喺荔景山嘅架空同埋地底嘅混合模式車站,但係由於原有月台外牆完全密封,一般人唔會察覺呢嗰站係架空車站,以為係地底車站,不過可以喺葵涌道睇到車站係興建喺山坡上面。

由於香港機場核心計劃地鐵公司揀咗呢個車站作為荃灣綫同埋東涌綫嘅交匯點,因此將車站改建做跨月台轉車站設計,興建新嘅L3月台,荃灣綫荃灣列車改行呢個月台;而原有嘅L5月台層就擴闊,保留原有荃灣綫中環方向軌道同埋加建東涌綫香港方向嘅軌道。而下層月台喺興建東涌綫嗰時被擴闊,而家可以睇到原有嘅1號月台邊緣(而家係東涌綫4號月台)。而家下層月台中間由車頭至車尾嘅無柱空間就係車站未擴建嗰陣一號月台嘅位置。

13

堅尼地城站1號月台

堅尼地城站粵拼gin1 nei4 dei6 sing4 zaam6英文Kennedy Town Station)係香港鐵路車站,喺香港島堅尼地城。堅尼地城站係港島綫總站,2014年12月28號啟用。

因爲起站要佔用堅尼地城泳池,所要另覓新址重建。

地鐵公司2006年8月發表西港島綫修訂建議方案,堅尼地城站位於科士街臨時遊樂場地底,即爹核士街及士美菲路一帶。車站分為兩層,地底一樓係車站大堂,地底二樓係兩個側式月台,月台設計近似上環站。而車站地面出口,即舊堅尼地城游泳池個位,設有公共運輸交匯處,方便鐵路乘客轉乘其他公共交通工具。

車站鄰近只有住宅、辦公室同社區綜合大樓,鄰近並無大型購物商場同百貨公司。因此,服務對象主要係居住於鄰近嘅堅尼地城居民同上班人士。所以,除咗上下班嘅繁忙時間外,整體嘅出入閘人流較少。因此呢個站係港鐵港島綫17個車站當中其中一個人流較少嘅車站。不過,有部分往返南區西部或者瑪麗醫院嘅市民亦會選擇使用呢個站轉乘其他交通工具,故此本站仍然有一定人流支持。

14

香港大學站1號月台

香港大學站粵拼hoeng1 gong2 daai6 hok6 zaam6英文HKU Station)係香港一個鐵路車站,喺香港島石塘咀,屬港鐵港島綫南港島綫西段。喺早期設計,位置唔同,初名卑路乍站bei1 lou6 zaa3 zam6;Belcher Station)、後名屈地站wat1 dei6*2 zam6;Whitty Station),都係用附近馬路來起名。如今座落香港大學以北山腳。個站可步行往來石塘咀同香港大學一帶。2008年8月10號動工,2014年12月28號啟用。

地鐵公司二零零五年九月,發表港島綫西延初步設計方案,香港大學站喺港島綫西延啟用時,有上下兩個側式月台構成,港島綫路軌,會置喺車站月台北面,而月台設計,計埋南港島綫轉車流量;起南港島綫嗰陣,先至將南港島綫西段路軌,加建喺月台南面,成為兩層島式月台,就似北角站順方向跨月台轉車站:去堅尼地城方向嘅搭客,只要行過對面月台,就可以轉南港島綫西段列車,反之,南港島綫西段嘅搭客,可行過對面月台,搭港島綫去柴灣方向。至於來往堅尼地城站嘅乘客想喺此站轉車,就要坐電動扶梯,往來上下兩層,到啱月台。然而,由於南港島綫西段,興建時間尚未明朗,因此地鐵公司二零零六年八月,發表修訂建議方案,無留位畀南港島綫西段,以務求降低成本。

15

灣仔站2號月台

灣仔站粵拼waan1 zai2 zaam6英文Wan Chai Station)係一個港鐵站,有港島綫嘅車喺度停,服務灣仔,喺軒尼詩道下面,有五十幾個閘機同埋八個出入口,連住柯布連道條行人天橋,通到去灣仔北。呢個站東行管道出咗站之後曾經裝過動畫廣告。

灣仔站一共有4層,地面層係繁忙嘅軒尼詩道同商廈群,車站大堂、商店同埋客務中心等設施位於C層同P1層。P1層係港島綫往柴灣方向月台,並設有下層大堂,設有售票機及客務中心等設施,以便疏導繁忙時間龐大嘅人流。至於P2層係港島綫往堅尼地城方向月台。嗰兩個月台係疊住嘅,一號月台喺正二號月台上面。

灣仔站嘅車站大堂設喺修頓中心地底,車站設有10條扶手電梯連接大堂同埋月台、50幾部出入閘機。地鐵公司(家陣叫港鐵公司)為咗解決擠迫嘅問題,灣仔站喺落成之後多次擴建。

現時,灣仔站共分為上、下層大堂,上層大堂主要係出入閘同設置車站商店之用,而下層大堂就放置售票機畀乘客買單程票,同往柴灣方向嘅1號月台同一層。由於下層大堂係後期由收費區改建而成,故此往返上層大堂嘅非收費區通道只有原本通往各月台及大堂嘅樓梯,冇任何扶手電梯升降機連接,所以少人用啲。

16

鰂魚涌站3號月台

鰂魚涌站粵拼zak1 jyu4 cung1 zaam6英文Quarry Bay Station)係港鐵港島綫將軍澳綫轉車站,喺香港島東區鰂魚涌寶馬山之間嘅地底。本站設有四個月台,並以兩個島式月台排列,所有月台都裝咗月台幕門。本站係最接近東區海底隧道鐵路車站,亦曾經係全港鐵系統中最深嘅車站(深42米)。

鰂魚涌站地面有2個唔相連嘅車站大堂,分別位於英皇道太古坊地底嘅英皇道大堂以及位於模範邨旁嘅模範里大堂。鰂魚涌站啟用嗰時,淨係得一個英皇道大堂畀乘客出入車站,但因應東區海底隧道嘅鐵路延綫興建,鰂魚涌站擴建嗰時另外喺模範里一帶起咗另一個售票大堂畀乘客往返模範邨一帶。模範里大堂喺欣澳站未啟用前,曾經係全香港最細嘅地鐵車站售票大堂。

鰂魚涌站下層嘅3號及4號月台以西原本有一段掉頭隧道畀觀塘綫列車用,觀塘綫列車喺本站3號月台(現時嘅4號月台)落客後,就會駛入條隧道,掉頭入4號月台(現時嘅3號月台)上客。但當「紓緩鰂魚涌轉車站擠塞工程」完工後,觀塘綫喺2001年9月27號起改以北角站為總站,掉頭隧道喺同年11月封閉。

鰂魚涌站嘅車站出口設計同上環站設計一樣,由兩個獨立大堂組成,兩者冇通道連接。

17

香港站外觀

香港站粵拼hoeng1 gong2 zaam6英文Hong Kong Station)係港鐵機場快綫同埋東涌綫東面嘅總站,喺中環民祥街地底,車站設有3個月台同9個出口,成個車站結構同香港國際金融中心連住,另喺干諾道中環球大廈地底設有一個南大堂通往德輔道中同埋中環商業中心區一帶。收費區內有兩條隧道去中環站

呢個站喺環球大廈、干諾道中同埋交易廣場地底用行人隧道連接中環站,乘客可以行去中環站轉荃灣綫或者港島綫。另外,呢個站有市區預辦登機服務,亦都有免費穿梭巴士服務去中環同埋灣仔嘅酒店。

本站共設有3個月台同1個預留月台,各月台都設有月台幕門。而家1號月台係機場快綫月台,以側式月台設計排列,機場快綫列車到達香港站後,必須喺呢個月台同時進行上落客及行李嘅工作,屬港鐵系統中較罕有嘅設計。

1號月台嘅北面,設有1條路軌側線,畀列車調動同停泊之用,同時預留畀第時嘅2號月台用,2號月台開嘅日期要等中環第三期填海工程及香港站延展掉車隧道工程完成之後,先至可以進行機場鐵路二期嘅擴建工程,所以而家列車只可以用1號月台上落。

另一方面,位處成個香港站建築群嘅底層設有3號同4號月台畀東涌綫使用,月台以島式月台排列。東涌綫列車喺非繁忙時間同假日主要停3號月台,而繁忙時間往青衣列車主要停3號月台,往東涌列車就主要停4號月台。由於月台響東涌綫大堂下層,即係成個香港站建築群嘅底層,加上東涌綫同機場快綫收費系統唔同,因此由東涌綫月台往返機場快綫月台要兜半個車站。

18

機場站2號月台

機場站粵拼gei1 coeng4 naam4英文Airport Station)係港鐵機場快綫嘅一個車站,喺香港赤鱲角香港國際機場地面運輸中心入面,亦係機場主要嘅聯外車站。

由於機場站採用側式月台設計,因此車站大堂嘅主要設施位於月台旁邊。港鐵公司為咗方便旅客,機場站係機場快綫中唯一一個冇閘機嘅車站,乘客可以直接將機場入面嘅行李手推車推入車站月台。亦因為咁,乘客可能會由機場站搭車遊覽一轉後喺機場站落車,從而搭「霸王車」,因此港鐵職員會隨機喺列車到機場站之前喺車廂查票,或喺博覽館站及香港站強制乘客落車畀車費。

由本站搭機場快綫嘅乘客,需要喺其他車站出閘時畀車費;而由市區或者博覽館站前往該站嘅乘客,可以將用咗嘅機場快綫車票棄置喺車站內嘅車票收集箱,亦可以拎返張車票留念。除咗機場快綫車站嘅售票機外,其他所有港鐵售票機都買唔倒機場快綫車票。

機場站設有3個側式月台,1號同2號月台都位於一號客運大樓旁邊地面運輸中心,而3號月台則位於二號客運大樓(翔天廊)旁邊地面運輸中心;而1號同3號月台都係去博覽館站方向列車專用嘅月台,並共用同一條路軌,當列車進入機場站後,兩邊車門都會打開,並會提醒乘客用左邊車門落車去一號客運大樓,用右邊車門落車去二號客運大樓同翔天廊。翔天廊目前運作階段只向離境乘客開放,所有前往市區嘅乘客都只可以用往香港方向嘅2號月台(位於一號客運大樓),但亦都有預留有關結構作日後月台擴建之用。

19

油塘站4號月台

油塘站粵拼jau4 tong4 zaam6英文Yau Tong Station)係港鐵觀塘綫同埋將軍澳綫嘅一個反方向跨月台轉車站,喺九龍觀塘區油塘,由2002年8月4號開始啟用。本站亦係最接近東區海底隧道嘅鐵路車站,亦係將軍澳綫中唯一一個位於九龍區車站。本站設有四個月台,所有月台都設有月台幕門。本站用鮮黃色做主要色調。

雖然本站屬於地面車站,亦同時係觀塘綫唯一一個純地面車站,但係為咗避免對附近居民造成滋擾,成個車站俾石屎封住,令裏面嘅人以為身處地底。

本站有3層,車站出口、大堂同商店位於U4層,並設有平台。而月台位於U1同埋U2層,畀乘客由觀塘綫同將軍澳互相轉車。

喺車站頂部,有一條預留通道,原本係用嚟畀市民來往鯉魚門廣場同喺B出口外面嘅商場,及後計劃改做購物街。但由於該商場未有發展,預留空間一直未有使用。

縱使油塘站有唔少出入閘嘅人流,但大部分都集中用A1同A2出口,相反B1同B2出口則極少人流。因此地鐵公司曾經將B1出口暫停使用,並喺B2出口加上自動門,減少車站大堂冷氣流失

20

調景嶺站2號月台

調景嶺站粵拼tiu4 ging2 leng5 zaam6英文Tiu King Leng Station)係港鐵觀塘綫將軍澳綫嘅一個地底車站,係觀塘綫嘅上行尾站,位於新界西貢區調景嶺翠嶺路旁邊,於2002年8月18號啟用,係觀塘綫唯一一個位於新界區嘅車站。

調景嶺站係座落喺維景灣畔彩明苑側邊。佢嘅主入口響翠嶺路。呢個站出面有個交通交匯處,可以接駁其它公共交通工具到另外一啲地方。

調景嶺站啟用初期,由於四周只有彩明苑維景灣畔兩個屋苑,因此車站出入閘人流一直比較少。但由於呢個站係觀塘綫將軍澳綫嘅轉車站,因此,大部份利用呢個站嘅人流都係轉車嘅乘客,當時成為前香港地鐵系統中出入閘人流較少車站之一。直至鄰近屋苑(如都會駅)同埋學校落成後,車站人流開始上升,並帶動車站商店嘅生意。

另外,由於本站設有調景嶺渡綫,當本站有列車故障或者有將軍澳綫嘅列車臨時需要用本站做總站時,車站月台會出現大量人流。另外,每日亦有港鐵列車用位於本站嘅渡綫進行同方向嘅車務調動,康城站穿梭列車亦會用渡綫調頭。

21

屯門站1號月台

屯門站粵拼tyun4 mun4 zaam6英文Tuen Mun Station)係香港港鐵西鐵綫新界總站,響屯門杯渡路屯門河交界。此站可以接駁輕鐵屯門站同埋河田站。喺早期規劃嗰時,曾經叫屯門中心站(Tuen Mun Centre Station)。

屯門站起喺屯門河上,設有1個島式月台,每個月台可以容納一列9卡嘅列車。2號月台西面設有一個預留月台,而屯門站北面,往紅磡方向路軌旁邊亦設有預留位置,以便客量增長時可以擴建多一條路軌同加多一個島式月台。

屯門站而家有8個出口,近住屯門公園新墟同屯門工業區,亦喺C2出口設有公共運輸交匯處,畀市民轉其他交通工具2010年3月14日,原位於F2出口嘅公共運輸交匯處停用,搬去屯門站C2出口上蓋物業地下嘅新址。

由於屯門站係輕鐵轉車站,再加上近住屯門區主要地點(如:新墟、屯門市中心、屯門公園等),因此由朝到晚有唔少乘客用本站,係西鐵綫新界西北區使用率第二高嘅車站(最高係天水圍站)。

22

天水圍站外觀

天水圍站粵拼tin1 seoi2 wai4 zaam6英文Tin Shui Wai Station)係香港一個鐵路車站,響港鐵西鐵綫之上,個站連接輕鐵天水圍站。站響新界屏山北便,響天水圍市鎮南便,係元朗區西鐵四站之一。

天水圍站設1個島式月台。設有月台幕門。另外喺車站西面設有側線,畀車務調動用。

天水圍站位於天水圍同埋屏山之間,高架於天福路同屏廈路之上,並同輕鐵天水圍站交匯。車站大堂同埋月台都係架空設計,車站北面嘅地面係輕鐵天水圍站。車站全長460米,闊30米,係西鐵綫車站中最長嘅一個。

天水圍站係天水圍新市鎮內唯一重鐵車站,星期一至五嘅繁忙時間都有唔少學生喺度搭港鐵往返元朗屯門區,同埋上班一族喺度搭港鐵往港九市區。而星期六同假日亦有唔少乘客經本站轉車往返深圳灣口岸流浮山香港濕地公園福田口岸等。天水圍站亦係輕鐵嘅轉乘站,每日有好多人搭輕鐵轉西鐵綫,所以天水圍站係西鐵綫車站中最多人用嘅車站。

23

尖東站2號月台

尖東站粵拼zim1 dung1 zaam6英文East Tsim Sha Tsui Station)係個港鐵西鐵綫嘅中途,以前東鐵綫嘅南行總站,響香港九龍油尖旺區尖沙咀中間道兒童遊樂場地底,近住尖沙咀東部

尖東站係當時東鐵綫第一個地底站,有全世界最長嘅月台幕門,亦係東鐵綫唯一有冷氣同月台幕門嘅站。尖東站有行人隧道系統連接周圍同荃灣綫尖沙咀站。喺尖東站轉做西鐵綫嗰時,因為西鐵綫列車比東鐵綫短,尖東站月台頭尾非站體架構嘅部份被玻璃門封閉停用,並且喺裡面加裝信號同埋月台閉路電視。由於以前尖東站按照東鐵綫排列上下行方向,同而家西鐵綫啱啱相反,所以月台編號喺西鐵綫伸延之後調轉。

呢個站最初由九廣鐵路公司(九鐵公司)管理。至2007年12月2號即係兩鐵合併後,尖東站嘅車站結構,由九鐵公司租畀港鐵公司營運用,同埋合併成為一個車站管理。2009年8月16號,港鐵公司伸延西鐵綫,由南昌起至紅磡,而尖東站亦會變成西鐵綫其中一個站。因此,東鐵綫乘客需要喺紅磡站西鐵綫至去到尖東站。1號月台會改為去屯門站,2號月台就改為去紅磡站。

24

啟德站1號月台

啟德站粵拼kai2 dak1 zaam6英文Kai Tak Station)係港鐵屯馬綫一個地下鐵站,2020年2月14號啟用,成為該綫南行終點站。到屯馬綫全綫貫通之後,啟德站會變返做中途站。

位於地下一層,原本設計有客務中心,但係投入服務之後改為智能客務中心,唔再經常有職員駐守,其中一面設有特大天氣顯示屏。乘客需要以視像對話機向位於金鐘嘅港鐵職員詢問。同時因應反修例運動引發連串針對港鐵嘅抗議同破壞,站內加設特別保護措施,其中八達通拍卡機以防火厚膠板覆蓋,智能客務中心嘅牆身改以聚碳酸酯製作。而鄰近A出口嘅大堂有展板介紹車站同屯馬綫‎資料,售票機旁亦都有吉祥物「鐵仔」嘅互動投影裝置。

有一個島式月台,以橙黃色為主色調,月台牆身鋪設嘅焗漆板印有地鐵公司退休建築師區傑棠書寫嘅站名書法大字,係首批非屬於原地鐵系統而印有書法字嘅車站。而月台漆版會有同啟德機場或者飛機駕駛室有關嘅設計。

車站合共有10間商店,其中香港置業有兩個舖位。其中已經開業嘅商店包括OK便利店、HKTVmall、原味家作、唐包點、爭鮮、山崎麵包、恒生銀行自動櫃員機同食家優惠店等。

設有3個出入口,並預留1個出入口(C出入口)通往車站上蓋同地下街。其中A出口通道喺2020年4月尾起設「啟德回憶︰1925-1998」展覽,展出超過30張同啟德機場相關嘅歷史圖片同海報。而D出入口天幕有藝術品。

25

顯徑站1號月台

顯徑站粵拼hin2 ging3 zaam6英文Hin Keng Station)係港鐵屯馬綫一站,2020年2月14號隨住屯馬綫一期開通而啟用。

樓高2層,樓面面積為9,200平方米,係沙中綫項目當中唯一新架空車站。車站大堂位於地面,月台設喺大堂之上,而同車站相連嘅獅子山鐵路隧道沙田一端嘅通風設施就設喺車站南端。車站設有兩個月台,採用側式月台方式排列。為配合相連遊樂場嘅景觀,車站設計採用大自然概念,包括首次以循環再造嘅木屑同塑膠廢料製成嘅「再用塑料木材」建造木色外牆遮陽板,垂直同車站頂綠化。除咗可以達到自然採光之餘,亦可以減低車站室溫。

特別之處,顯徑站月台雖然採用自然通風,但係裝設月台幕門,同深圳地鐵1號線、5號線、6號線、11號線同韓國首都圈電鐵嘅架空車站相似。而港鐵其餘採用自然通風車站月台都只係安裝月台閘門或者不設月台幕/閘門。

位於地面,原設計有客務中心,但係投入服務之後改為智能客服中心,唔再有職員駐守,其中一面設有特大天氣顯示屏。乘客需要以視像對話機向位於金鐘嘅港鐵職員詢問。同時因應反修例運動,站內加設特別保護措施,其中八達通拍卡機以防火厚膠板覆蓋,智能客務中心嘅牆身改以採用聚碳酸酯。

設有兩個月台,採用側式月台方式排列,並裝設月台幕門,係採用自然通風嘅露天車站月台以及整個新界東之中唯一裝設月台幕門嘅架空車站。

26

欣澳站1、3號月台

欣澳站粵拼jan1 ou3 zaam6英文Sunny Bay Station)係一個港鐵站,喺香港新界大嶼山東北嘅陰澳打水灣填海區,2005年6月1日啟用,早迪士尼綫香港迪士尼樂園3個半月。呢個站設有一個島式月台同埋一個側式月台,本站亦係港鐵第一個設有月台閘門嘅車站。

欣澳站設有一個島式月台同埋一個側式月台,2號月台係側式月台,同車站大堂同出口相連,畀東涌綫香港方向嘅列車使用。

欣澳站屬於開放式設計,月台冇冷氣,月台上得幾部涼風機降溫,因此夏天非常炎熱,而落雨更會有雨水由天幕同地面之間嘅空隙隨風飄入。另外,由於該站用開放式設計,不適宜安裝月台幕門,所以起嗰陣改用高度較低嘅月台閘門,令欣澳站成為全港首個採用月台閘門嘅鐵路車站,呢種月台閘門嘅高度大約係其他港鐵站幕門嘅一半(約1.5米)。而為咗遷就迪士尼綫嘅列車設計,迪士尼綫嘅閘門矮東涌綫嘅大約1米。

欣澳站淨係整咗一個出入口,通往欣澳站公共運輸交匯處。呢個公共運輸交匯處原本設計喺緊急嗰時用,而家用嚟作往返愉景灣專線巴士嘅車站。

27

迪士尼站外觀

迪士尼站粵拼dik6 si6 nei4 zaam6英文Disneyland Station)喺香港荃灣區大嶼山東北部嘅竹篙灣,係港鐵迪士尼綫嘅總站,喺2005年8月1號配合迪士尼綫通車而啟用,個站淨係設有1個月台,亦都裝咗月台閘門。

車站用咗維多利亞時代風格,並且係一個開放式車站,設備及裝飾亦都仿照19世紀嘅格局,用嚟配合香港迪士尼樂園度假區嘅設計。

迪士尼站設有2層,包括喺地面嘅車站大堂同埋L1層嘅月台,1號月台係畀迪士尼綫欣澳方向嘅列車使用。本站嘅月台位置雖然低過地面水平,但仍屬於地面車站。

迪士尼站係繼寶琳站後只設1個側式月台嘅車站,因此乘客落車後,列車就會改為相反方向,畀乘客上列車前往欣澳站方向。

車站同欣澳站一樣,為咗配合該站無冷氣嘅通風系統,設有月台閘門,高度大約係一般港鐵車站月台幕門嘅一半,係全香港第2個車站採用月台閘門,月台更預留充足空間以便日後迪士尼綫增加至8卡行走。

此外,迪士尼站嘅月台層更設有收費區內公眾洗手間,同欣澳站,成為全港第2個港鐵前地鐵市區綫系統嘅車站於收費區內設有畀公眾使用嘅洗手間,亦係繼機場快綫之後喺車站內設有公眾洗手間嘅車站。

28

海洋公園站外觀

海洋公園站粵拼hoi2 joeng4 gung1 jyun4 zaam6英文Ocean Park Station)係香港一鐵路車站,喺香港島黃竹坑海洋公園,歸港鐵南港島綫東段,2016年12月28號啟用。

海洋公園站採用架空車站設計,去配合嗰段走線嘅高架橋設計,海洋公園擴建計劃亦有預留位置畀港鐵用。海洋公園站係南港島線唯一採用側式月台嘅車站。

海洋公園站外牆以唔同深淺度嘅藍色玻璃為主要飾面,呈波浪形。面積約2,700平方米嘅車站大廳亦以藍色為主調,柱身以海豹、企鵝、水母同海豚等海洋生物圖案作裝飾,天花板會有垂吊藝術裝置,營造海洋感覺。係繼迪士尼站後,另外一座以主題公園為主題設計嘅港鐵車站。

車站設有大型停車場,用作泊車轉乘用途。

車站位於香港海洋公園正門前方,所以有大量遊客用呢個站來往海洋公園同香港各區,加上可以接駁交通前往淺水灣、赤柱等嘅景點,因此成為南港島綫4個位於南區車站當中最多出入閘人流嘅一個。

29

利東站1號月台

利東站粵拼lei6 dung1 zaam6英文Lei Tung Station)係香港一鐵路車站,喺香港島鴨脷洲東北利東邨附近,歸港鐵南港島綫,2016年12月28號啟用。呢個站係目前港鐵系統入面最南端嘅車站(呢個站開通之前係柴灣站),亦曾經成為中國最南嘅地鐵站(2019年俾澳門輕軌蓮花口岸站取代)。呢個站最高點比海平面高70米,係港鐵系統當中海拔最高嘅地底車站。

由於車站大堂距離利東邨地面約50米,港鐵用四部雙門升降機取代扶手電梯接駁兩層,升降機運作同港島綫香港大學站、西營盤站嘅升降機相若,乘客喺其中一邊入升降機,升降機到達另一層之後,另一邊升降機門就會打開,等乘客離開後另一邊嘅升降機門隨即打開畀樓層乘客進入。

另一邊車站大堂距離鴨脷洲大街地面嘅垂直距離大約係10米,港鐵用一條長大約200米嘅坡道接駁。

呢個車站嘅特色係以「溫暖嘅橙色」作為主色,嚟自上蓋商場原有嘅深啡色,但係建築師解釋唔想位處地底嘅港鐵站顯得太暗,所以最後揀咗鮮橙色。而站裏面亦都設有描繪南區漁港景緻嘅藝術品。

30

海怡半島站2號月台

海怡半島站粵拼hoi2 ji4 bun3 dou2 zaam6英文South Horizons Station)係香港一個鐵路車站,港鐵南港島綫東段嘅南面總站,喺鴨脷洲海怡半島鴨脷洲邨一帶,2016年12月28號啟用,擁有港鐵系統中最窄嘅月台(6米闊)。

一般車站係以混凝土興建,設有防水層防止水由頂部或者牆壁滲入。不過呢個站受原有結構保護,加上受空間限制,因此B出入口頂部由防火板建造,有別於一般車站以混凝土建造嚟配合防水層。

港鐵公司曾經就車站選址提出兩個方案,原本選址喺鴨脷洲邨旁邊嘅海怡路,屬於一個半沉降式車站,特色係車站大堂同出口處於同一層,預計2015年落成。後來因為原本選址有港燈公司嘅電纜阻礙而預計需要延遲3年去到2018年啟用。所以港鐵公司提出另一個選址,就喺怡南路同利南道交界,屬於地底車站。2009年2月,有南區區議員引述港鐵將會採用後者,即係車站會如期落成,有關選址喺刊憲方案得以確認。

呢個站嘅特色有:港鐵系統當中,第一個以「非港鐵屬下私人屋苑」全名作為站名嘅車站;車站經常畀坊間人士及傳媒簡稱「海怡站」;港鐵網絡當中(輕鐵以外)第一個英文站名有「Z」嘅中重型鐵路車站;A出口指示名稱於通車初期係「鴨脷洲邨/海怡半島一及四期」,長達13個中文字(連標點),於2017年3月初縮短做「鴨脷洲邨/海怡半島1-6座」。

31

香港西九龍站外觀

香港西九龍站粵拼hoeng1 gong2 sai1 gau2 lung4 zaam6英文Hong Kong West Kowloon Station),慣稱西九龍站西九站,係香港一個鐵路車站。佢係廣深港高速鐵路南端嘅終點站。

2018年9月23號通車。西九龍站喺西九文化區附近,由呢個站可以行去九龍站東涌綫/機場快綫或者行去柯士甸站西鐵綫

香港西九龍站嘅G層設有幾個出入口大堂,B1層係票務大堂,B2層係抵港大堂,B3層係離港大堂。

車站實行一地兩檢,呢個站設有內地口岸區,區內受中國內地司法管轄,若果有乘客違反內地法律,會由中國內地執法人員執行內地法律程序。

2010年,香港西九龍站的設計攞到Cityscape Awards for Architecture in the Emerging Markets嘅Tourism, Travel & Transport Future獎。同年11月4號,香港西九龍站嘅設計攞到世界建築節嘅「年度最佳未來工程─基礎設施」獎。

而家香港西九龍站設有13個出入口畀乘客出入。E出口、K3出口同L出口係日後上蓋物業嘅出入口,暫時唔開放。