Talk:魷魚遊戲

反對搬文到「魷魚遊戲 (電視劇)」

1. 粵語講「魷魚遊戲」四字，絕大多數情況下都係指呢套劇。
2. 韓國傳統遊戲個名係叫「魷魚」（오징어），而唔係「魷魚遊戲」（오징어 게임）。
3. 英維、韓維同絕大多數語言都將電視劇篇文叫「魷魚遊戲」，遊戲篇文叫「魷魚 (遊戲)」。

總結：唔應該盲目跟從中文維基做法，喪失粵文維基自主。--Kwgulden (傾偈) 2021年10月20號 (三) 12:11 (UTC)

我唔係盲目跟從中文維基，我認為係有呢個遊戲之後好耐先有呢套電視劇，呢套劇都係因為呢個遊戲產生，要對讀者有一個清晰嘅指示。好似點指兵兵 (電影)都係有遊戲先，中文維基都冇「電影」兩個字。Pokman817 (傾偈) 2021年10月20號 (三) 13:18 (UTC)

單獨講加後綴嘅字眼，照返粵文習慣係咪用返(劇集)會好過依家呢個講法？再話埋搬文嘅話，依家就粵文圈啲認知度，開文可能未話係一定要加多字整埋搞清楚（版）咁。 Longway22 (傾偈) 2021年10月20號 (三) 13:29 (UTC)

「點指兵兵 (電影)」個例子唔可以同「魷魚遊戲」直接比較：

1. 粵語講「點指兵兵」四字，絕大多數情況下都係指遊戲而唔係套電影。
2. 遊戲個名真係叫「點指兵兵」。

所以遊戲叫「點指兵兵」，電影叫「點指兵兵 (電影)」，我認為係合理。

假如（只係假如）韓國傳統遊戲個名都叫「魷魚遊戲」嘅話，我未必會企硬想畀電視劇用「魷魚遊戲」，但事實上個遊戲只係叫「魷魚」，所以嚴格嚟講，「魷魚遊戲」（오징어 게임 / Squid Game）只係得一個意思，就係套劇。--Kwgulden (傾偈) 2021年10月20號 (三) 13:37 (UTC)

「電視劇」呢隻字喺粵文圈都係常用，無謂用乜嘢習慣嚟扣字眼。仲有「劇集」有分電視劇同網絡劇，參考類:韓國劇集入面嘅細類，用「電視劇」反而更加清晰。特克斯特 (傾偈) 2021年10月20號 (三) 13:44 (UTC)

Wikidata我搵唔到魷魚遊戲搞清楚版項目可以連，即係其他語言（包括有「魷魚 (遊戲)」嘅文嘅語言）暫時都無開過搞清楚版。網民上網查「魷魚遊戲」四隻字，都應該係查套劇，所以我認同「魷魚遊戲」個標題比較適合畀返套劇。另外，上面提到「電視劇」字眼嘅問題，因為套劇Netflix呢個網絡平台而唔係電視台出品，如果話「劇集」有分「電視劇」同「網絡劇」，呢套劇應該歸類「網絡劇」。--Mikedou (傾偈) 2021年10月21號 (四) 08:35 (UTC)

可能簡稱嘅話就「網劇」啩？同時非常多謝Mikedou君留低睇法！呢度係講到咗一個現代嘅媒介差別，若果係其他關聯文案要再度過嘅話，都有啲諗頭。 Longway22 (傾偈) 2021年10月21號 (四) 09:24 (UTC)

個人認為係遊戲出先之後先再到Netflix既呢套，如果係咁加上「電視劇」我覺得冇錯。另外我見極多維基都主要係跟英維為準 (就連韓文維基都係跟英維)，本人認為Kwgulden君唔單止考慮中維大一統、而且都要小心因為太過英維化而變成半中半英嘅感覺。Akai 博士 (傾偈) 2021年10月21號 (四) 15:05 (UTC)

不明所以點解跟返英維就有問題，跟中維就咩都pass，呢個世界真奇異。 Longway22 (傾偈) 2021年10月22號 (五) 09:50 (UTC)

遊戲係出先，但人哋遊戲個名係叫「魷魚」。另外大多數語言同英維做法一樣，並唔代表佢哋純粹係因為「跟英維」。就今次改名爭議，我亦唔覺得同英維（以及絕大部份語言）一樣將套劇叫「魷魚遊戲」會出現「太過英維化而變成半中半英」嘅情況。--Kwgulden (傾偈) 2021年10月30號 (六) 05:55 (UTC)

Wikidata嘅《魷魚遊戲》呢一刻有73個語言版本，69個語言版本都直接用「魷魚遊戲」，得阿塞拜疆文、希伯來文、中文同粵文4個語言係用有加括號嘅名：

1. 阿塞拜疆文嘅「魷魚遊戲」唔存在，為套劇個名加括號純粹係佢嘅固定格式。
2. 只有希伯來文1個語言係將「魷魚遊戲」個名畀個遊戲。
3. 中文嘅「魷魚遊戲」整成一個跳轉。跳去「魷魚 (遊戲)」。
4. 粵文呢一刻就選擇將「魷魚遊戲」整成搞清楚版。

雖然而家個處理手法唔係完全同中文維基一模一樣，不過我都覺得將「魷魚遊戲」整成搞清楚版係無必要。編寫百科應該要以人為本，由讀者嘅角度去諗。究竟讀者上網搵「魷魚遊戲」，係想搵啲乜嘢：

1. 如果大多數人係想搵遊戲，可以仿照希伯來文咁將「魷魚遊戲」個名畀個遊戲；
2. 如果搵遊戲同劇集兩邊都無明顯優勢，可以整成搞清楚版（即係粵文現狀）；
3. 如果大多數人係想搵劇集，應該仿照各語言咁將「魷魚遊戲」個名畀套劇集。

我就覺得而家係第3種情況，大多數人係想搵劇集，所以我係贊成將「魷魚遊戲」個名畀套劇集。--Kowlooner (傾偈) 2021年10月24號 (日) 13:37 (UTC)

根據維基百科守則，而家呢篇文我係普通用戶，要搬版應該要由另一位管理員去處理，如果其他管理員認為呢篇文搬版係合理嘅話，請行動。Pokman817 (傾偈) 2021年10月24號 (日) 15:01 (UTC)

有勞其他管理員幫手確認呢個請求（將電視劇篇文嘅標題還原返做10月20號之前用緊嘅「魷魚遊戲」）嘅合理性。--Kwgulden (傾偈) 2021年10月30號 (六) 05:55 (UTC)

我支持搬返去魷魚遊戲。@Pokman817：《魷魚遊戲》同《點指兵兵》嘅分別係，「點指兵兵」喺粵語地區已經流行，跟住再有《點指兵兵》劇。但係「魷魚」呢個遊戲係韓國文化，喺《魷魚遊戲》劇集全世界風行之前，喺粵語地區冇乜人識。所以兩個情況，啲文嘅擺位會唔同。 翹仔 (傾偈) 2021年11月1號 (一) 19:42 (UTC)

見到「魷魚 (遊戲)」近排嘅編輯，醒返起呢次爭議唔知搞成點，過嚟望望。個討論原來已經大半個月無新意見，但依然未結到案。期間中維已經響11月8號將標題由「魷魚遊戲 (電視劇) 」改返做「魷魚遊戲」。而家原作者Pokman817講到明自己唔會搬版，交畀其他管理員定斷，希望有管理員真係可以幫手處理。--Kowlooner (傾偈) 2021年11月21號 (日) 11:20 (UTC)