中華人民共和國航天計劃

1997年長征3B發射

中華人民共和國航天計劃喺國際上以國家航天局名義活動。佢由1955年開始發展，嗰陣中華人民共和國啱啱成立，工業基礎好薄弱，整唔到坦克、飛機，甚至連車都生產唔出，一直到毛澤東「兩彈一星」計劃出現，情況先有所改善。

1971年嘅「714工程」暫停令到中國航天計劃停咗二十年。好彩，跟住嘅「863計劃」令中國航天計劃返生。而「神舟」同「天宮」亦提高中國航天事業嘅水準。到咗2003年，中國太空人楊利偉搭住神舟5號成功飛行，中國航天技術卒之發展到載人水平。

中國未來嘅航天計劃主要包括起一座永久性嘅空間站，繼續月球載人探測，同埋做火星探測同深空探測。

發展歷程

起步

毛澤東「兩彈一星」

頭先講到，中國成立嗰陣因環境問題而整唔出坦克、飛機同車。但係十五年之後，中國迅速發展，自己研究出原子彈技術，成為繼美、蘇、英、法之後第五個掌握核武力嘅國家。

1955年1月15號，毛澤東主持召開中共中央書記處擴大會議，講到中國原子彈技術。毛澤東唔主張戰爭，只係話人哋哈佢就要反擊。冇幾耐，火箭專家錢學森由美國返去中國，佢向中央提出發展火箭同導彈嘅建議。中央即刻成立咗國防部航空工業委員會，負責醞釀、組建、開發火箭同埋導彈工程。

1957年同1958年期間，蘇聯（即而家嘅俄羅斯）同埋美國先後發射人造衞星，毛澤東亦喺八大二次會議道宣佈要研究人造衞星。聶榮瑧按照毛澤東嘅指示，叫中國科學院去做人造衞星發展規劃，成立咗以錢學森做組長嘅領導小組，負責起人造衞星、運火箭以及衞星探測儀器嘅設計研究機構。

同一年6月，毛澤東喺軍委擴大會議道話中國要用十年時間研發出原子彈、氫彈同埋洲際導彈，重話要決心搞原子彈技術。

喺中國發展嘅第一步嗰陣，蘇聯幫咗佢好多。1958年，喺蘇聯嘅幫忙下，中國起咗第一座實驗性原子反應堆；但係第二年蘇聯就陸續撤走喺中國嘅專家，毛澤東唔單止對蘇聯表示幫唔幫佢都冇所謂，重叫班工人自己喐手整，聲稱用8年時間就可以造出原子彈。

中國航天事業急速發展

中國第一粒核彈——A2923

1958年夏天，中國原子能研究所需嘅反應堆同埋迴旋加速器等等嘅設備初步完成。

1960年2月，中央軍委確定咗「兩彈（原子彈、導彈）為主，導彈第一嘅方針，又注重研製火箭。

為咗加快火箭、原子彈嘅研製速度，毛澤東請咗開國功臣——上將張愛萍嚟，叫佢去管「兩彈一星」嘅嘢。張愛萍受命去做前線總指揮。佢帶住班人去鬼影都冇個嘅戈壁灘起原子彈發射基地，喺嗰陣，佢哋成日連肚都填唔飽，後來經周恩來批准，每個人每日加二兩嘢食，可以睇得出嗰陣中共盡佢所能提高科研人員嘅待遇。

1960年11月5號，中國第一粒地對地近程導彈發射成功。

經過開發員不懈嘅努力之後，喺1964年嘅秋天，中國嘅第一粒原子彈終於研製成功。但係，究竟點樣做試驗，係當時嘅一個大問題。面對咁多次美國攻打中國核基地嘅威脅，有關部門提出咗兩個方案：一係發展核技術但係暫時唔做試驗，二係唔怕美國嘅威脅，盡早試驗。方案報告交畀毛澤東，佢一錘定音，即刻決定要盡早試驗。

1964年10月16號，中國第一個原子彈終於爆炸。過多7個月之後，中國做咗飛機空投原子彈空爆試驗。冇幾耐，中國第一粒氫彈爆炸成功，做咗第四個掌握氫彈嘅國家。

同時間，中國嘅火箭技術亦突飛猛進。1966年9月27號朝頭早9點，中國自己研製嘅第一粒地導彈由甘肅同內蒙古交界嘅巴丹吉林沙漠打到去新疆嘅羅布泊，核彈頭打中紅心，代表「兩彈結合」試驗成功。1988年9月15號，中國潛地導彈由潛艇喺海底發射成功。

由第一粒原子彈發展到第一粒氫彈，美國用咗七年零四個月，蘇聯用咗三年零十一個月，英國用咗四年零六個月，法國用咗八年零六個月，而中國淨係用咗兩年零八個月。

中期

「東方紅一號」衞星升空

「東方紅一號」衞星

1957年10月，蘇聯射咗第一粒人造衛星上天。三個月之後，美國亦射咗第二粒人造衞星。正因為咁，毛澤東喺中共八屆二次會議度表明中國要研發人造衞星嘅目標，佢重話要由一兩萬公斤開始整，唔好整美國嘅小型人造衞星。呢次之後，研發人造衞星列為嗰陣時科學院嘅第一焦點任務，代號「581工程」。

1959年，三年自然災害搞到中國經濟接近崩潰，中共中央總書記鄧小平就改咗個戰略，將重點搬去火箭研究度。而過多一排，中程運載火箭試驗成功，意味中國已經有能力發射人造地球衞星。一年後，中國科學院提交《關於發展中國人造衞星工作的規劃方案建議》畀中央。1965年8月9號至10號，中央討論過之後，原則上批準咗呢個規劃方案，同時亦都確定由國防科委負責組織協調，將「581工程」改做「651工程」。

喺嗰陣，中國已經研製出導彈同原子彈。錢學森指出，可以用中國嘅火箭嚟做人造衞星嘅運輸工具，計劃1970年至1971年發射中國第一粒人造衞星。兩年之後，衞星研製工程嘅單位實施咗軍事管制，喺接近三百個單位入面調走咗千三個人去負責研究衞星同火箭，而領隊係錢學森。佢建議搞衞星總體設計部，由孫家棟全權負責。

喺研製火箭、衞星嘅同時，好多趣事等住班研究班底，例如啲釘咁，佢哋係由班友一手一腳揼落去㗎。

12月，國防科委開會確定中國嘅第一粒人造衞星改名做「東方紅一號」，佢哋又話中國應該後來居上，比蘇聯、美國嘅更加重、更加長命、技術更加先進。國防科委亦同時定立咗個目標：「上得去，捉得住，聽得到，睇得到。」「上得去」係指衞星成功升空；「捉得住」係指衞星成功發放數據；「聽得到」係指地球人可以聽到「東方紅一號」發出嘅聲；「睇得到」係指地球人可以睇到「東方紅一號」衞星。

經過試驗之後，最後班班底用咗電子線路產生嘅複合音模擬鋁板琴播歌，用高穩定音源振盪機取代音鍵，用程序控制線路產生嘅節拍嚟控制音源振盪器發音，效果好好、好滿意，解決「聽得到」嘅問題。至於「睇得到」嘅問題，工作人員裝咗啲反光板上去，上天之後打開，令人類可以睇到佢。

1969年3月，工作人員確定「東方紅一號」運作正常，而確保「上得去」嘅「長征一號」亦準備好發射。1970年4月24號凌晨，「長征一號」射上天空。廿五分鐘之後，周恩來向毛澤東報告「東方紅一號」好成功。從此之後，中國做咗繼蘇、美、法、日之後第五個掌握人造衞星技術嘅國家。

「714工程」

「東方紅一號」衞星成功升空係一件震撼民心嘅事。但係，啲科學家重未滿足，諗住搞中國嘅人類升天技術，而中國政府亦畀佢哋規劃一艘全新嘅兩艙結構宇宙飛船——「曙光一號」。1971年4月，「曙光一號」計劃全面開始，代號「714工程」。根據方案，「曙光一號」將會喺1973年年底發射。但係，載人升天係航天事業入面最難嘅，佢幾乎咩都要齊，包括好多好多錢。嗰陣時中國嘅工業基礎好水，所以毛澤東最後話先搞好地球嘅嘢，跟住先發展外太空。就係咁，「714工程」被迫暫停。而中國航天事業亦被迫暫停足足二十年。

「863工程」起錨

1986年3月3號，出名科學家王大珩、王淦昌、楊嘉墀同陳芳允向中央聯合提出《關於跟蹤世界戰略性高技術發展》嘅建議。鄧小平亦即刻批准呢項建議，唔可以延緩。而「863工程」（又叫「863計劃」）亦因而起錨。由1986年4月開始，半年之內，國務院召集全國幾百位專家，組成「863 計劃航天技術專家委員會」，對中國載人航天嘅方案做個全面論證。經過一年嘅論證之後，喺1988年7月，過百位航天專家去晒哈爾濱，討論同決定用邊種航天器好。有啲人主張用飛船，有啲人主張用航天飛機，達唔成共識。

支持用飛船同埋支持用航天飛機嘅專家各自有自己嘅主張，佢哋主要都係考慮到錢、潮流同中國工業基礎嘅問題。到咗1986年10月，中共中央政治局開會，佢哋唔單止批准「863計劃」，重畀一百億實施呢項戰略，呢個數完全超出班科學家嘅預想。楊嘉墀回憶嗰陣時有一段有趣嘅事，張勁夫叫佢哋估下中央批咗幾多錢，王淦昌話一千萬人民幣，但係，答案竟然係一百個億。佢重話佢知道嗰陣都嚇到死死下。

嗰次嘅「863」計劃，令到中國重新開始發展載人航天，亦為之後研製「神舟」系列飛船定立咗個基礎。

宗旨

「探索外太空，擴展對地球同埋宇宙嘅認識；和平利用外太空，促進人類文明同埋社會進步。」

計劃同目標

計劃

• 研製新一代無毒、無污染、高性能、低成本同大推力嘅運載火箭。
• 中國航天將會喺掌握載人航天技術之後，解決空間飛行器嘅對接技術。中國已經喺2011年發射「神舟八號」同「天宮一號」，喺太空起空間實驗室。跟住，係起20噸級嘅空間站。
• 啟動中國第一個月球探測計劃「嫦娥工程」。作為嫦娥工程計劃嘅一部分，中國已經喺2007年10月24號喺西昌衛星發射中心成功發射嫦娥一號繞月衛星。並喺2010年10月1號「中華人民共和國成立61週年國慶日」喺西昌衛星發射中心成功發射嫦娥二號繞月衛星。
• 2012年6月14號，中國探月工程首席科學家歐陽自遠院士喺中科院第十六次院士大會上話，中國深空探測而家嘅任務係做太陽系探測，要研究嘅主要科學問題包括：搵太陽系生命信息，行星嘅起源同演化乃至太陽系嘅形成同演化，太陽同小天體活動對地球嘅災害性影響，地外資源、能源同環境嘅開發利用以支持人類社會嘅可持續發展等。

參考

書

• 唐國東、華強。《中國載人航天》。中華書局。