廣福橋

國家	中華人民共和國
位處政區	大埔區、香港
	廣福橋嘅位置
	[改維基數據]
	睇; 傾; 改;

廣福橋（英文：Kwong Fuk Bridge）係香港一橋，喺大埔兩墟之間，橫越林村河，駁住南北兩岸嘅廣福道。廣福橋重建過幾次。

史

廣福橋自一八九六年，總共起過四次。

第一橋

文武二帝廟內碑

大埔墟（今日叫大埔舊墟）原本設喺林村河口以北，大埔海邊，係大埔頭鄧氏所控制。大埔七約因爲唔妥佢大埔墟唔公道，另設墟市。大清光緒十八年，即係一八九二年，大埔七約喺大埔墟西南，林村河口南邊，大埔海附近，開太和市，中間開富善街，是爲新嘅大埔墟。七約之中，泰亨約喺河北，村民南行過河趁墟，要畀二文錢坐橫水渡，極之唔方便。泰亨約文氏文湛泉，就提議喺太和市側邊，起橋搭通兩岸。光緒廿二年，歲次丙申，即係一八九六年，仲夏月，條橋就起好，叫廣福橋。廣福橋係條石橋，橋躉係石砌嘅，而橋面係石板，長方形一塊塊咁鋪成。爲咗隆重其事，喺太和市嘅廟，文武二帝廟中立碑兩塊，名爲《建造廣福橋芳名開列》。有橋之後，就打通大埔南北，太和市慢慢過大埔墟頭，越來越旺。

第二橋

一八九八年，英國同大清簽《展拓香港界址專條》，由大清手上租到新界。無耐，英國入主新界，以大埔做治所。爲咗容易控制，英軍就修橋築路，貫通各處，以便行車。廣福橋喺正大埔道上，橋亦轉成行車橋，闊到過得一部大車，而兩邊有鐵欄。到咗一九四一年十二月，日軍攻入香港，十二月九號，日軍過廣福橋，英軍撤離大埔，退守醉酒灣防綫。

第三橋

一九四五年，日本投降，撤出香港，英國重掌大埔。一九四八年，香港政府將廣福橋擴闊，重修橋躉，等廣福橋變成雙綫行車，一南行，一北行。條橋除咗加闊，兩邊都改爲石欄，更加美觀。而橋南北嘅一段大埔公路，亦叫廣福道。由於人口漸多，廣福橋亦車來車住。

第四橋

一九七零年代尾開始，大埔轉爲大埔新市鎮。開始大幅填海，林村河越來越長，廣福橋唔再喺林村河口地。一九八零年代，香港政府喺寶鄉街對出起咗條行車天橋，叫寶鄉橋。橋四綫雙程，連接南北兩岸。而有新橋之後，拆咗行車廣福橋，起過條行人橋。橋東側係行人路，橋西側係單車徑，而中間有瓦遮頭，紅柱綠瓦，以長亭。而舊橋石欗，就放喺南岸，橋口嘅廣福橋公園，用來裝飾。新廣福橋唔行得車，所以廣福道亦分成兩截，分隔兩岸。除咗廣福橋之後，林村河亦起多幾條行人橋，樣差唔多，分別係錦石橋、錦和橋同埋太和橋。

圖

家下橋面有蓋部分
家下橋面單車徑

參攷

《大埔風物志，2007再版增訂》，蕭國健撰，大埔區議會

出面網頁

呢篇文係同橋有關嘅楔位文。歡迎幫維基百科擴寫佢。