貝尼托·墨索里尼

出自維基百科,自由嘅百科全書
(由墨索里尼跳轉過嚟)
其他叫墨索里尼人,睇:墨索里尼 (搞清楚)
貝尼托·墨索里尼
Benito Mussolini
第27任意大利王國大臣會議主席
任期
1922年10月31號-1943年7月25號
君主埃馬努埃萊三世意大利文Vittorio Emanuele III di Savoia
前任路易吉·法克塔意大利文Luigi Facta
繼任佩特羅·巴多格里奧意大利文Pietro Badoglio
法西斯領袖意大利文Duce
任期
1921年11月9號-1943年7月25號
前任首任
繼任裁撤
意大利社會共和國領袖
任期
1943年9月23號-1945年4月25號
前任首任
繼任裁撤
最高帝國元帥
任期
1938年3月30號-1943年7月25號
前任首任
繼任裁撤
個人資料
性別
出世Benito Amilcare Andrea Mussolini
(1883-07-29)1883年7月29號
意大利王國普雷達皮奧意大利文Predappio
1945年4月28號(1945-04-28)(61歲)
意大利王國朱利諾意大利文Giulino
死因被槍決
墓地意大利普雷達皮奧聖卡西諾公墓
國籍意大利
政黨國家法西斯黨(1921年至1943年)
其他政黨
配偶雷切爾·古伊迪意大利文Rachele Guidi(1915年-1945年結婚)
伴侶
仔女
父母
專業
  • 政治人物
  • 記者
  • 小說家
  • 先生
宗教信仰無神論[1][2]
羅馬天主教(1927年受洗[2][3]
簽名
軍事背景
服役意大利皇家陸軍
服役時間1915年至1917年
軍銜
部隊第11狙擊兵團
參戰

貝尼托·阿米爾卡雷·安德烈亞·墨索里尼意大利文Benito Amilcare Andrea Mussolini1883年7月29號1945年4月28號)係意大利政治人物記者思想家意大利王國第27任「大臣會議主席」(總理),法西斯主義創始人。墨索里尼喺1925年獲得「領袖意大利文Duce」同政府首腦稱號,並由嗰年一直至1943年7月25號喺意大利實施獨裁統治,1938年3月30號得到意大利最高軍銜—「最高帝國元帥」。1943年7月,墨索里尼失勢落台,之後被納粹德國派出嘅特種部隊救出,改任德國嘅傀儡國—意大利社會共和國嘅政府總理。

早年[編輯]

少年墨索里尼喺當地小學過徂三年(1889年至1891年),之後被送到法恩扎一間慈幼會開嘅寄宿學校(1892年至1894年),後來同同學打交被踢出校。之後又喺福林波波利意大利文Forlimpopoli卡爾杜奇意大利文Giosuè Carducci師範學校繼續學業。1898年9月墨索里尼攞到初級技術文憑,同年,佢同同學再起衝突,呢次佢做徂旁聽生,但係都喺1901年以良好成績攞到畢業文憑[4]。喺阿爸嘅影響下,墨索里尼由細對鬥爭同社會主義有興趣,佢成日喺學校發起反抗運動而且勸極唔聽,甚至喺校長派佢喺當地戲院紀念歌曲作家威爾第嘅慶典上公開演講時,佢居然發表針對該人物時代社會狀況嘅批評同指責,有份米蘭嘅報紙就嗌佢「學生同志墨索里尼」。

墨索里尼自學校畢業後,考到一張小學先生證書,去徂瑞吉艾米里歐(Reggio Emilia)教書,一年之後就因為行為不檢被解聘。之後佢搵嘢做相繼碰壁,呢段日子佢非常窮,好妒忌同厭惡有錢有勢嘅人。後來,墨索里尼機緣巧合做徂「意大利砌磚師傅及砌磚助理工會」嘅秘書,開始投身政治集會,並喺L'Avvenire del lavoratore(《勞動者嘅未來》)發表徂佢頭一篇文章。由於墨索里尼參加當地嘅社會主義運動積極過頭,冇幾耐就引起徂當地警方嘅注意被遣返意大利。後來佢又返到瑞士,呢次由於瑞士社會黨人議員嘅干預,令佢唔使再畀人遣返[4]

墨索里尼早年信社會主義同無神論,1900年加入激進左翼意大利社會黨。1908年2月墨索里尼去到奧匈帝國控制嘅意大利城鎮特倫托,被當地社會黨人介紹到《勞動者嘅未來意大利文L'Avvenire dei lavoratori》做記者。冇幾耐,墨索里尼聯繫到意大利民族統一運動意大利文Irredentismo italiano人士巴蒂斯蒂意大利文Cesare Battisti,並開始喺巴蒂斯蒂創立嘅Il Popolo(《人民》)報擔任記者。1910年,人民報連載墨索里尼寫嘅愛情小說Claudia Particella, l'Amante del Cardinale: Grande Romanzo dei Tempi del Cardinale Emanuel Madruzzo(中文翻譯:《克勞迪婭·帕提瑟拉,主教嘅情人:關於以馬內利·瑪諸佐主教嘅偉大小說嘅連載》),但小說內容因涉嫌詆毀羅馬天主教會[5] 攪到佢之後畀報社炒魷魚。墨索里尼因而越嚟越激進同公開反君主專制梵蒂岡,冇幾耐再畀人遣返意大利。

1911年因為反對意大利喺利比亞鄂圖曼帝國軍事行動坐徂五個月監。1912年,佢成為意大利社會黨嘅領導成員同黨報《前進!意大利文Avanti!》嘅記者。1914年第一次世界大戰嘅爆發將墨索里尼嘅思想由極左變成極右,由反干涉主義變成戰爭狂熱,1914年11月5號墨索里尼喺米蘭創建徂右翼干涉主義報紙《意大利人民意大利文Il Popolo d'Italia》。墨索里尼思想上嘅轉變亦導致佢喺1915年退出意大利社會黨。

第一次世界大戰,英國驚意大利會繼俄國之後退出大戰,暗中以每個星期100英鎊高額收買墨索里尼喺佢主編嘅報上繼續鼓吹參戰[6]

第一次世界大戰[編輯]

1917年,作為協約國士兵嘅墨索里尼

1915年4月,意大利改加入協約國加入戰爭,墨索里尼報名參戰,後來墨索里尼喺前線一次地雷爆炸度受徂重傷,醫生喺佢身上攞出44嚿炸彈碎片,其後退役。

法西斯主義同「革命」[編輯]

內文:法西斯主義

第一次世界大戰完徂之後,墨索里尼主張全民團結同埋維持體制,並喺1919年3月23號喺米蘭重新建立徂一個法西斯組織,展開以武力鎮壓農民同工人運動,後喺選舉中獲得25個議席。

1921年,墨索里尼建立徂國家法西斯黨,喺戰後政治同經濟動蕩嘅意大利,具有民族主義反共產主義同反工會特點嘅國家法西斯黨得到中產階級、地主同工業資本家嘅支持。

向羅馬進軍[編輯]

內文:向羅馬進軍
1922年「向羅馬進軍」

1922年10月28號墨索里尼號召全國四萬武裝部隊發動「向羅馬進軍政變,但係意大利嘅警察軍隊都喺事件上保持中立,實際上只得一萬四千人參加。1922年10月27號國家法西斯黨逼法克塔意大利文Luigi Facta交出權力,而墨索里尼獲得軍隊、國王埃馬努埃萊三世意大利文Vittorio Emanuele III di Savoia、商界、反共人士同埋右翼保守派嘅支持,取代被逐嘅法克塔。10月30號,國王埃馬努埃萊三世任命墨索里尼為總理。墨索里尼開始實行法西斯統治,展開佢廿幾年嘅獨裁統治。

出於對內戰同社會主義者反君主制特點嘅擔憂,國家法西斯黨得到國王嘅支持,重得到同年大選壓倒性勝利,攞到三分之二多數嘅議席。繼而墨索里尼喺1925年1月宣佈國家法西斯黨係意大利唯一合法政黨,從而建立徂法西斯主義獨裁統治。

征服埃塞俄比亞[編輯]

內文:第二次意阿戰爭

墨索里尼上台後,一直憧憬建立一個新羅馬帝國[7],同埋懷住對1896年第一次意阿戰爭意大利戰敗嘅復仇心理,意大利以1934年12月一次意屬索馬里埃塞俄比亞嘅邊界衝突為藉口,拒絕埃方嘅所有和解請求,喺1935年10月3號入侵埃塞俄比亞[8][9]

由於意大利有軍事優勢,又違反《日內瓦協議》用芥子毒氣[10],所以埃塞俄比亞軍隊好快輸澌,首都阿迪斯阿貝巴喺1936年5月5號畀意大利軍隊佔領,國王海爾·塞拉西一世流亡英國,5月7號意大利國王埃馬努埃萊三世宣布吞併埃塞俄比亞帝國使之成為意大利帝國嘅一部份。

西班牙內戰[編輯]

內文:西班牙內戰

西班牙內戰喺1936年7月17號爆發,德國同意大利都支持佛朗哥嗰邊。戰爭初期,西班牙本土嘅國民軍處於不利狀態,於是向德國同意大利提出支援請求,德國派出禿鷹軍團,意大利派出自願軍團,以協助西班牙國民軍。因德意喺西班牙內戰嘅立場一致,使得兩國關係更加緊密,亦使意大利喺軍事同盟嘅傾向性從傳統嘅英法開始偏向德國。獲得內戰勝利嘅西班牙佛朗哥政權雖然喺意識形態上同軸心國接近,而且亦暗中支持軸心國,但因為內戰已經消耗澌西班牙嘅實力,加上盟軍嘅海上封鎖同西班牙喺經濟上對同盟國嘅依賴,西班牙佛朗哥政權喺第二次世界大戰始終保持中立[11]

第二次世界大戰[編輯]

1941年墨索里尼(左)同希特拉喺畀軸心國佔領嘅南斯拉夫王國

意德關係[編輯]

睇埋:鋼鐵條約同埋軸心國

1935年,墨索里尼開始同德國總理希特拉接觸,意德喺1939年5月22號簽訂《鋼鐵條約》。1940年6月10號意大利正式加入軸心國進入第二次世界大戰,同年9月27號,意大利、德國、日本簽署《三國同盟條約》。

慕尼黑會議同戰爭序幕[編輯]

內文:慕尼黑協定意大利入侵阿爾巴尼亞

捷克斯洛伐克喺第一次世界大戰結束後根據《聖日耳曼條約》由奧匈帝國獨立,並同法國簽徂軍事同盟條約[12],一旦捷克斯洛伐克畀德國攻擊,英法根據呢條條約同《羅加諾公約》有義務提供協防,捷克斯洛伐克亦同蘇聯簽徂類似條約,但規定必須喺法國履行條約後蘇聯先至有義務提供軍事支持[13]

德國喺1938年3月12號實現德奧合併後,將注意力轉向有300幾萬日耳曼人住嘅捷克斯洛伐克蘇台德地區,要求嗰度進行「民族自決」,對捷克斯洛伐克作出領土要求。但英法都唔想再爆發戰爭,同時德國軍事實力被大大高估[14],意大利亦未有一場全面戰爭嘅準備,亦對德國嘅擴張感到憂慮。喺呢種情況下,墨索里尼做徂德國同英法嘅中間人。喺一連串外交努力失敗後,德國提出要求軍事佔領蘇台德地區,畀捷克斯洛伐克政府拒絕,1938年9月24號,法國宣佈局部軍事動員,呢次係第一次世界大戰後法國頭一次軍事動員。第二日,捷克斯洛伐克宣佈全國軍事動員,將呢次危機推向頂峰。9月28號,墨索里尼向希特拉建議德、英、法、意四國開會解決爭端,希特拉接受。9月29號,張伯倫達拉第法文Édouard Daladier、希特拉同墨索里尼喺慕尼黑商討點樣解決呢次危機,捷克斯洛伐克代表被排斥喺會議外,蘇聯亦冇被邀請。9月30號凌晨作出最終決議,要求捷克斯洛伐克政府喺10月1號開始撤離人員,德國軍隊將喺同一日進駐[15][16]。喺英法德嘅強大壓力下,捷克斯洛伐克政府最終屈服。

1939年3月14號,傾向法西斯主義嘅斯洛伐克喺德國嘅影響同壓力下,宣佈由捷克斯洛伐克獨立。德國武裝佔領徂殘留嘅捷克,並喺3月15號建立波希米亞同摩拉維亞保護國嘅傀儡政權,捷克斯洛伐克實際上已經畀德國吞併。

德國吞併奧地利同逼到捷克斯洛伐克割讓蘇台德地區之後,意大利感覺自己已成為軸心國嘅二流角色[17]。希特拉喺冇預先知會墨索里尼嘅情況下佔領徂剩低嘅捷克斯洛伐克,使墨索里尼決定吞併阿爾巴尼亞以提升意大利喺軸心國入面嘅地位[17]。1939年3月25號,意大利對阿爾巴尼亞發出最後通牒,要求包括畀意大利軍隊佔領阿爾巴尼亞戰略要地、畀意大利農民喺阿爾巴尼亞以公民身份定居、要求意阿兩國成立關稅同盟,並要求喺4月6號前作出答覆[18]。4月5號,阿爾巴尼亞政府秘密作出一份反建議,被意大利置之不理,並喺4月7號開始經亞得里亞海登陸阿爾巴尼亞,佔領過程中未遇到強烈抵抗[18]。4月10號,阿爾巴尼亞大部分地區被意大利軍隊佔領,國王索古一世流亡海外,4月12號,阿爾巴尼亞新政府成立,標誌住阿爾巴尼亞正式被意大利王國吞併[18]。由此意大利攞到一塊由陸路進入巴爾幹半島嘅跳板,為1940年入侵希臘埋下伏筆。

進入戰爭[編輯]

納粹德國喺1939年9月1號發動白色方案作戰計劃入侵波蘭,同日,英法大使向柏林發出最後通牒要求德國即刻撤軍[19],喺冇答覆嘅情況下,英國同法國喺9月3號對德國宣戰[20]其他國亦相繼加入[21]第二次世界大戰歐洲戰事爆發,意大利王國繼續保持中立[22]

1940年5月10號,法國戰役爆發,意大利重係置身事外。喺德軍贏徂法國戰役之後,墨索里尼確信呢場全面戰爭好快就會完,6月10號,意大利對英國同法國宣戰,加入對法作戰[22]。6月22號,德法停戰協定《貢比涅停戰協定》簽署,法蘭西第三共和國政府宣佈投降。6月24號,意法停戰協定簽署,意大利佔領徂小部份法國東南部接壤地區,吞併徂尼斯科西嘉島,直到1943年9月8號意大利王國向盟軍投降。同年9月27號,意大利、德國同日本簽《三國同盟條約》。

1940年10月28號,意大利冇提前知會德國就單獨向希臘宣戰,希臘-意大利戰爭開始。1941年,意大利同希臘喺阿爾巴尼亞境內嘅作戰陷入戰略僵持,德國喺意大利嘅請求下介入。1941年4月6號,德軍發動「瑪莉塔作戰」,與羅馬尼亞保加利亞巴爾幹半島南部發動攻勢,希臘戰役開始。雖然意大利軍隊喺人數同裝備上佔優,但係都係打輸戰事,經過一個星期嘅戰鬥傷亡一萬二千人。最後,墨索里尼決定停止攻勢,12日之後離開阿爾巴尼亞

1941年6月22號,巴巴羅薩作戰開始,德國同意大利等軸心國對蘇聯宣戰。

1941年12月11號,即珍珠港事件之後第四天,墨索里尼喺羅馬威尼斯廣場發表宣戰演講[23]。當日,德國同意大利對美國宣戰[24][25],美國亦喺當日對德國同意大利宣戰[26][27]

落台同被捕[編輯]

1943年夏天以嚟,意大利嘅戰爭形勢越嚟越弊,墨索里尼喺國內嘅聲望亦跌到谷底[1]。5月13號,軸心國喺突尼斯戰役嘅徹底失敗令意大利喪失澌對北非嘅控制。緊接住7月9號,盟軍發動嘅西西里島登陸戰役更讓形勢雪上加霜。7月19號,墨索里尼最後一次以意大利王國總理嘅身份同希特拉喺費爾特雷會談,會談期間羅馬受到盟軍猛烈轟炸。7月24號下晝至第二日凌晨,喺政治氣氛空前沉重嘅背景下,大法西斯議會召開第187次會議,迪諾·格蘭迪意大利文Dino Grandi等人猛烈抨擊墨索里尼,重提出徂對墨索里尼嘅不信任動議,動議以19票贊成同7票反對通過徂,但係呢個投票結果並冇實質意義,因為根據當時嘅意大利憲法,得國王有權罷免總理。第二日(7月25號)朝早,國王埃馬努埃萊三世召見墨索里尼,同墨索里尼講會解佢職,由巴多格里奧意大利文Pietro Badoglio接替佢,同時應承保證佢人身安全。未搞清楚國王真正企圖嘅墨索里尼喺跟住離開時就畀意大利國民憲兵隊包圍,畀一部紅十字會救護車帶走徂,話噉係為徂佢嘅安全起見。實際上國王埃馬努埃萊三世為徂挽救自己嘅王權,親自落徂逮捕墨索里尼嘅命令。墨索里尼最初被困喺羅馬一個意大利國民憲兵隊兵營,為徂唔畀德國發現,佢喺7月27號被轉移到蓬扎,8月7號又被轉移到馬達萊納(La Maddalena)嘅海軍基地,最後喺8月27號被轉移至大薩索峯意大利文Gran Sasso帝王臺意大利文Campo Imperatore一間別墅軟禁[28]。此後巴多格里奧隨即宣佈:「意大利將繼續同德國盟友並肩作戰」,以避免喺意大利嘅德軍報復。而事實上,意大利王國嘅法西斯政府正係暗中同盟軍傾停戰[28],停戰協議喺9月3號簽徂,為避免德國知道停戰協議之後迅速佔領意大利半島,直到9月8號,盟軍發動登陸意大利半島薩萊諾雪崩行動,先至正式對外宣佈[22]。但喺宣佈停火協定嘅同時,又冇落命令畀意大利軍隊,埃馬努埃萊三世國王同巴多格里奧就逃出羅馬,攪到各地嘅意大利軍隊亂澌龍,德軍迅速佔領大片意大利領土,大批意大利軍人被殺或者被俘虜,有尐就加入德軍,呢次失誤最後亦攪到意大利君主制喺戰後1946年嘅全民投票入面被廢除[1]

1943年9月12號,納粹德國發動橡樹行動嘅營救計劃,黨衛隊奧托·斯科爾茲內指揮嘅特種部隊用滑翔機空降突襲軟禁墨索里尼嘅別墅,將佢解救至德軍控制下嘅羅馬,跟住轉機至維也納。9月14號,墨索里尼同希特拉喺「狼穴」會面,受希特勒邀請喺意大利北部組建一個受納粹德國保護嘅共和國,即係之後嘅意大利社會共和國,同南部已被盟軍佔領嘅意大利王國分庭抗禮。9月18號,墨索里尼喺德國通過慕尼黑電台宣告重建一個嗌法西斯共和黨嘅新法西斯政黨。

經過一段無政府狀態後,恢復過嚟嘅意大利王國終於喺1943年10月13號對德國宣戰[22]

意大利社會共和國[編輯]

意大利社會共和國軍旗
意大利社會共和國士兵
內文:意大利社會共和國

新建立嘅意大利社會共和國其實係一個受納粹德國控制嘅傀儡政權。1943年9月,希特拉出動軍隊迅速將意大利嘅東北部分省份同意大利半島外嘅地區佔領並納入德國嘅直接控制。此外希特拉亦確保徂意大利社會共和國嘅軍隊亦喺德軍指揮嘅掌控下。喺1943年嘅9月23號至9月27號,意大利社會共和國政府轉移到薩羅,因而意大利社會共和國有個別名嗌「薩羅共和國」。

1943年11月14號喺維羅納召開嘅第一次法西斯共和黨集會起草同發佈徂維羅納宣言。呢部臨時憲法性質嘅宣言確立徂從國家法西斯黨脫離出嚟嘅法西斯共和黨對意大利社會共和國嘅統治同墨索里尼作為國家首腦繼續統治。墨索里尼宣佈國家大選會延遲到打完仗,並暗示到時將會制定意大利社會共和國嘅憲法草案。

逃亡同被俘[編輯]

1945年4月25號,意大利社會共和國就嚟崩潰,墨索里尼諗住化裝成德國軍人,經意大利北部嘅瑞士乘機逃亡去法西斯西班牙。1945年4月27號,墨索里尼同佢嘅情人克拉拉·貝塔西意大利文Clara Petacci喺逃去瑞士途中俾意大利抵抗運動共產黨游擊隊第五十二Garibaldi旅截住,並俾一名游擊隊政治委員烏爾巴諾·拉賽羅意大利文Urbano Lazzaro發現佢嘅身份。

[編輯]

墨索里尼喺朱利諾意大利文Giulino被槍決嘅地方
內文:it:Morte di Benito Mussolini

喺墨索里尼被俘嘅第二日(1945年4月28號),意大利抵抗運動嘅共產黨游擊隊喺未經審判嘅情況下,喺科莫省梅澤格拉鎮嘅朱利諾意大利文Giulino村槍決徂墨索里尼同佢嘅情人克拉拉·貝塔西。據官方版本嘅事件解釋,執行槍決嘅Valerio上校(Colonnello Valerio)真名係Walter Audisio意大利文Walter Audisio。墨索里尼被處決嘅具體原因同過程有非常多唔同嘅解釋,歷史學界對此仍有爭議。比較普遍嘅解釋係都靈大學Sergio Luzzatto教授喺The Body of Il Duce一書指出墨索里尼同貝塔西係喺1945年4月28號下晝喺朱利諾畀共產黨游擊隊槍決[29]。一齊被處決嘅重有意大利社會共和國15名內閣官員同顧問。

屍體[編輯]

墨索里尼(左二)同其它法西斯份子嘅屍體

4月29號,包括墨索里尼嘅15具屍體被運到米蘭,其中墨索里尼同佢嘅情人克拉拉·貝塔西同另外5人共7具屍體被倒吊喺洛雷托廣場一個加油站頂上示眾。經過驗屍後,墨索里尼嘅屍體被掩埋喺米蘭郊外一個村莊嘅地方墳場墳墓編號384,為徂避免墨索里尼嘅屍體被發現,冇立墓碑。但事與願違,墨索里尼嘅屍體冇幾耐就畀人發現徂。

1946年4月23號至24號嘅夜晚,3名法西斯主義支持者掘走徂墨索里尼條屍。最初條屍收埋喺當地嘅修道院入面,5月7號,屍體被轉移收埋喺帕維亞卡爾特修道院意大利文Certosa di Pavia直到8月畀意大利警方發現。出於政治因素考慮,意大利政府將墨索里尼嘅屍體秘密扣押喺Cerro Maggiore意大利文Cerro Maggiore嘅修道院十年,直到1957年,喺墨索里尼遺孀雷切爾·墨索里尼意大利文Rachele Guidi嘅多次請求下,先至還返墨索里尼條屍並同意喺佢鄉下普雷達皮奧意大利文Predappio落葬。

屋企[編輯]

墨索里尼出世嘅地方,而家係一間博物館

1883年7月29號,墨索里尼喺意大利費拉拉省小鎮普雷達皮奧(而家屬費利省出世。阿爸亞歷山德羅·墨索里尼意大利文Alessandro Mussolini係一個鐵匠,亦係一個無政府主義[30]、社會主義運動活躍分子[4] 同無神論者。佢幫個仔改嘅名Benito Amilcare Andrea源於:

  • Benito Juárez(貝尼托·華雷斯西班牙文Benito Juárez):反抗法國入侵嘅墨西哥總統
  • Amilcare Cipriani,社會主義者同意大利愛國者
  • Andrea Costa,社會主義者,意大利社會黨嘅創始人之一。

墨索里尼阿媽羅莎·瑪羅托尼意大利文Rosa Maltoni係一名羅馬天主教徒,喺弗利附近做小學先生。墨索里尼重有一個細佬阿諾德意大利文Arnaldo Mussolini同妹妹艾薇芝意大利文Edvige Mussolini

墨索里尼第一任老婆伊達·達爾塞意大利文Ida Dalser,兩人嘅仔貝尼托·阿爾比諾(Benito Albino)喺1915年11月11號出世[4][31]。達爾塞喺1926年被困入精神病院,1937年12月11號死徂,阿爾比諾嘅命運亦一樣,1942年死徂[31]

墨索里尼第二任老婆係雷切爾·墨索里尼,兩人有5名仔囡,分別係大囡埃達·齊亞諾意大利文Edda Ciano(Edda Ciano)、大仔維托里奧意大利文Vittorio Mussolini(Vittorio)、二仔布魯諾意大利文Bruno Mussolini(Bruno)、三仔羅馬諾意大利文Romano Mussolini(Romano)同孻女安娜·瑪麗亞意大利文Anna Maria Mussolini(Anna Maria)[28]。羅馬諾嘅老婆Maria Scicolone意大利文Maria Scicolone係演員蘇菲亞羅蘭嘅妹妹,佢哋兩個囡其中一個亞歷山德拉意大利文Alessandra Mussolini(Alessandra)曾經係歐洲議會極右翼政黨成員代表。

影響[編輯]

戰後嘅意大利憲法取締徂國家法西斯黨,但崛起嘅新法西斯主義運動繼承徂墨索里尼時代嘅思想。前意大利極右翼政黨社會行動黨嘅黨魁係墨索里尼嘅孫女亞歷山德拉。該黨一路同貝盧斯科尼領導嘅右翼意大利力量黨關係密切,其後更加喺2009年併入貝盧斯科尼領導嘅右翼自由人民黨

諺語[編輯]

意大利有句講話:「你點樣批評墨索里尼亦好,起碼佢讓火車準點發車」。

參考[編輯]

  1. 1.0 1.1 1.2 John Pollard (1998年12月). "Mussolini's Rivals: The Limits of the Personality Cult in Fascist Italy". New Perspective (英文). 4 (2).
  2. 2.0 2.1 Manhattan, Avro (1949年) [1949年]. "Chapter 9: Italy, the Vatican and Fascism". The Vatican in World Politics (英文). C.A. Watts & Co., Limited, London. 原著喺2005年11月23號歸檔. 喺2008年4月9號搵到. {{cite book}}: Unknown parameter |chapterurl= ignored (|chapter-url= suggested) (help)
  3. Tom Behan. "Features: The resistible rise of Benito Mussolini and Italy's fascists" (英文). 原著喺2008年5月2號歸檔. 喺2008年4月9號搵到.
  4. 4.0 4.1 4.2 4.3 "Chapter 2: Italy under Fascism". Living History 2 (英文). ISBN 1-84536-028-1.
  5. Alfred Armstrong (2008年1月19號). "The Cardinal's Mistress" (英文). Old Books. 喺2008年4月4號搵到.
  6. britain_mussolini Mussolini paid well as British agent in WWI
  7. "A History of Italy in Breif" (英文). Life In Italy. 喺2008年7月8號搵到.
  8. andry. "Second Italo - Abyssinian War 1935-1936" (英文). WAR CHAT- War News and History. 原著喺2008年9月27號歸檔. 喺2008年7月8號搵到.
  9. "Second Italo-Abyssinian War 1935-1936" (英文). OnWar.com. 原著喺2010年2月6號歸檔. 喺2008年7月8號搵到.
  10. Bernard Bridel (2003年8月13號). "Les ambulances à Croix-Rouge du CICR sous les gaz en Ethiopie" (法文). Le Temps. 喺2008年7月8號搵到.
  11. "Records of the Foreign Service Posts of the Department of State (RG 84)" (英文). The US National Archives and Records Administration. 喺2008年5月14號搵到.
  12. "Franco-Czech Treaty" (英文). TIME. 1924年1月7號. 原著喺2008年5月3號歸檔. 喺2008年4月28號搵到.
  13. Lawrence Jorgensen. "From Intervention to Munich" (英文). Millenial Files. 原著喺2008年5月2號歸檔. 喺2008年4月28號搵到.
  14. Kurt Kuhlmann (1992年10月6號). ""Submit to a Humiliation" The Military Considerations of British Czechoslovakian Policy in 1938" (英文). Warhorse Simulations. 喺2008年4月28號搵到.
  15. "Munich Agreement" (英文). Ministry of Foreign Affairs Czech Republic. 喺2008年4月29號搵到.
  16. "The Munich Agreement and its Application" (英文). ibiblio.org. 喺2008年4月29號搵到.
  17. 17.0 17.1 "Albania - Italian Occupation" (英文). US Library of Congress. 喺2008年5月6號搵到.
  18. 18.0 18.1 18.2 "The Italian Invasion of Albania (1939)" (英文). The Frosina Information Network. 原著喺2008年4月23號歸檔. 喺2008年5月6號搵到.
  19. "1939: Germany invades Poland" (英文). 英國廣播公司. 喺2008年4月18號搵到.
  20. "1939: Britain and France declare war on Germany" (英文). BBC. 喺2008年4月18號搵到.
  21. "Australia at war 3 September 1939" (英文). Australian Government Department of Veterans' Affairs. 1939年9月3號. 原著喺2008年4月3號歸檔. 喺2008年4月29號搵到.
  22. 22.0 22.1 22.2 22.3 "ITALY and the ITALIAN CAMPAIGN 1943 -1945, including Sicily, Salerno & Anzio Landings" (英文). NAVAL-HISTORY.NET. 喺2008年4月18號搵到.
  23. "MUSSOLINI'S WAR STATEMENT" (英文). ibiblio.org. 喺2008年4月19號搵到.
  24. "1941: Germany and Italy declare war on US" (英文). BBC. 喺2008年4月19號搵到.
  25. "THE GERMAN DECLARATION OF WAR WITH THE UNITED STATES" (英文). ibiblio.org. 1941年12月11號. 喺2008年4月29號搵到.
  26. "US Declaration of War Against Germany" (英文). US Diplomatic Mission to Germany. 喺2008年4月29號搵到.
  27. "DECLARATIONS OF A STATE OF WAR WITH JAPAN, GERMANY, AND ITALY" (英文). ibiblio.org. 喺2008年4月29號搵到.
  28. 28.0 28.1 28.2 Josephine Cowdery (2007年). "BENITO MUSSOLINI AND HIS SURVIVORS" (英文). USM Books. 喺2008年4月19號搵到.
  29. Victor Matus. "On the Disposal of Dictators" (英文). Hoover Institution. 原著喺2008年5月15號歸檔. 喺2008年7月9號搵到.
  30. Mediterranean Fascism 1919-1945 Edited by Charles F. Delzel, Harper Rowe 1970, page 3
  31. 31.0 31.1 Richard Owen (2005年1月13號). "Power-mad Mussolini sacrificed wife and sons" (英文). The Times. 喺2008年4月4號搵到.