新大嶼山巴士
新大嶼山巴士（1973）有限公司（New Lantao Bus，NLB）係香港第三間專利巴士公司，隸屬冠忠巴士集團，服務範圍主要喺大嶼山。
佢喺大嶼山開辦咗多條路線來往梅窩碼頭、大澳、昂坪寶蓮寺、東涌等地，重有一條機場巴士線來往香港國際機場同埋梅窩。除此之外，新大嶼山巴士亦有開辦一條由紅磡碼頭開去昂坪寶蓮寺，同埋兩條分別由港鐵元朗站同埋天水圍市中心往深圳灣口岸嘅路線。
佢係香港少數提供日票嘅公共交通機構，佢所提供嘅日票適用於所有路線，但由於售票地點太少（目前只能夠喺梅窩碼頭嶼巴辦公室同東涌巴士總站買），所以買日票嘅人並唔多。
史
[編輯] |
1973年之前大嶼山嘅巴士服務
[編輯]大嶼山早期只係個未開發嘅島，主要村落散佈喺近海處，居民主要依賴水路交通。直至1950年代尾，政府要喺石壁起石壁水塘以解決當年嘅水荒，因此政府同時開始起由梅窩到石壁嘅第一條道路（大嶼山公路／嶼南道）。隨住條路起好，九龍巴士喺1960年4月22號喺大嶼山開辦第一條巴士線1號，最初係由兩架巴士[1]往來梅窩同埋長沙[2]，並隨住道路嘅落成而兩度延長至到水口同埋石壁[3]。不過由於嗰時大嶼山好偏僻，平日需求唔多，假日就因為有一大堆市民往來大嶼山郊遊，搞到當時有好多白牌車行，對九巴1號線造成好嚴重嘅競爭，結果搞到蝕大本，1965年11月1號起唔再服務。
當九巴喺1965年11月1號撤出大嶼山，離島四個鄉事委員會同埋當時白牌車嘅經營者已經有計劃喺九巴手上接手經營嗰條1號線，最後原有九巴行走大嶼山嘅5架巴士，賣咗畀鄉事委員會，並成立「大嶼山汽車有限公司」。後來大嶼山居民自行組織聯德巴士公司、昂平巴士公司同埋大澳公共巴士公司去維持島上嘅巴士服務。
新大嶼山巴士成立
[編輯]1973年，由於經營不善，三間巴士公司合併成新大嶼山巴士（1973）有限公司。1974年4月1號取得經營大嶼山巴士服務嘅專營權，成為香港第3間專利巴士公司。嶼巴成立嗰時，開辦咗多條巴士路線，由於當時大嶼山市民對外主要靠梅窩碼頭嘅船往返香港島，故此絕大部份嶼巴路線都係以梅窩碼頭做總站。
七、八十年代
[編輯]新大嶼山巴士成立初期只得單層車。去到八十年代由於渡假屋流行，一到假日就有好多渡假人士去大嶼山[未記出處或冇根據]，於是由1980年開始引入利蘭勝利二型雙層巴士，不過雙層巴士只可以行梅窩至石壁一帶。
另外，由於去昂坪嘅路好窄，初期去昂坪要喺羌山搭小巴上去，直至昂坪路擴闊至雙程行車為止。
1990年代
[編輯]嶼巴喺1992年1月俾冠忠巴士集團以4000萬港元全面收購，巴士亦開始改以日本五十鈴單層冷氣巴為主力。
1997年東涌新市鎮首期落成同埋青馬大橋通車，以及1998年地鐵東涌綫通車，大大縮短由市區來往大嶼山嘅時間同埋路程。嶼巴因此大力拓展往來東涌新市鎮至大嶼山各區嘅路線，並喺同年6月1號開辦通宵線N13來往東涌同埋梅窩。
1998年7月6號，新香港國際機場開幕，嶼巴開辦來往梅窩同埋機場嘅A35線，並喺同年11月1號將N13線延長去機場，並改叫N35線。
1999年4月1號，來往梅窩同埋大澳嘅1號線提供通宵服務，路線冧巴係N1。
21世紀至今嘅發展
[編輯]2001年，嶼巴引入德國猛獅NL263低地台單層冷氣巴，專門行走東涌逸東邨同埋東涌北嘅路線，好似37、38（其中38更係嶼巴班次最密嘅巴士線，最密2分鐘一班），係首間引入嗰款巴士嘅專利巴士公司。另外佢亦向城巴買咗5架猛獅NL262低地台單層冷氣巴。
2001年1月24號春節，嶼巴開辦由紅磡碼頭去昂坪寶蓮寺嘅假日路線1R，成為嶼巴第一條喺大嶼山以外有總站嘅巴士路線。
2002年1月2號，因應香港迪士尼樂園開始動工，嶼巴開辦P1線來往青衣機鐵站同埋香港迪士尼樂園建築工地以及36P線來往東涌地鐵站同埋香港迪士尼樂園建築工地。隨住地鐵迪士尼綫啟用，呢條線喺2005年8月21號取消。
2007年初，因應深圳灣口岸即將落成啟用，運輸署公開招標兩條來往深圳灣口岸至屯門、元朗嘅巴士路線，並喺2007年6月23號宣佈，嶼巴投得來往深圳灣口岸至元朗嘅巴士路線，冧巴係B2，於2007年7月1號挨晚起隨住深港西部通道啟用而投入服務，成為嶼巴自1974年4月1號起成為專利巴士公司以嚟，首次開辦兩邊總站都唔喺大嶼山嘅專利巴士路線，原有行走東涌逸東邨路線37、38嘅德國猛獅NL263低地台單層冷氣巴亦全部被調走，改為行B2線[4]，因此嶼巴向城巴買6架富豪B6LE，行走37、38號線。
2007年中，嶼巴引入5架配歐盟4型引擎嘅德國猛獅高地台單層巴，全部巴士都已經投入服務。
2007年尾，嶼巴引入10架德國猛獅NL273歐盟4型低地台單層冷氣巴來行走東涌逸東路線37、38以及深圳灣口岸路線B2，巴士已於2008年投入服務。
2010年，嶼巴引入9架中國製青年JNP6122G歐盟5型單層低地台巴士，係香港第一款中國製嘅專利巴士。其後嶼巴再引入十幾架同款車。
2014年初，嶼巴由城巴引入兩架前城巴機場快線嘅丹尼士三叉戟3型雙層客車，令嶼巴自1995年淘汰利蘭勝利二型之後，再一次擁有雙層巴。
因應港珠澳大橋即將落成啟用，運輸署公開招標三條來往港珠澳大橋香港口岸人工島至機場、欣澳站同埋東涌嘅巴士線，最終嶼巴投到去機場同埋東涌嗰兩條，冧巴係B4同埋B6，佢哋喺2018年10月24號隨住港珠澳大橋啟用而投入服務。