西遊記第壹佰零壹回之月光寶盒

出自維基百科,自由嘅百科全書
跳去: 定向搵嘢
《西遊記第壹佰零壹回之月光寶盒》嘅 VCD 封面,係由美亞娛樂發行

西遊記第壹佰零壹回之月光寶盒》(A Chinese Odyssey - Part One ~ Pandora's Box)係香港1995年出品嘅電影之一。

電影資料[編輯]

制作[編輯]

出品機構:

  • 彩星電影公司
  • 西安電影制片廠(協助拍攝)

監製:楊國輝

導演:劉鎮偉、江約誠(執行導演)

編劇:技安(劉鎮偉嘅筆名)

主演:周星馳吳孟達羅家英朱茵藍潔瑛蔡少芬莫文蔚……等。

背景及簡介[編輯]

套戲係改篇自中國文學名著《西遊記》嘅電影故事,分上下兩集,呢套係第一集,而第二集叫做《西遊記大結局之仙履奇緣》。成個故事係講述主角孫悟空經過重新修煉,喺做一個普通人嘅過程中獲得「道」嘅啟悟,終於由邪變正,忠心咁陪唐憎去西天取經。劇情除咗有笑之外,劇中嘅主要道具「月光寶盒」所帶出嘅種種因果,同埋對於人世間恩怨愛恨嘅描寫,都暗暗帶有令人反思咀嚼嘅意味。

劇情大綱[編輯]

喺一晚嘅沙漠上面,孫悟空力抗觀音大仕嘅追捕,就係因為佢覺得佢師父唐僧成日吱吱噚噚咁煩到頂唔順,於是寧願夾埋牛魔王嚟食佢師父嘅肉都唔再去取西經,不過最後悟空始終未夠道行,終於俾觀音大仕收服;正當觀音大仕想消滅孫悟空嘅時候,慈悲為懷嘅唐僧唔忍心睇住徒弟受死,為咗求大仕放悟空一條生路,於是實行以命抵命,喺觀音大仕面前用羅漢金剛杖自盡。

五百年之後,一個烈日酷熱嘅沙漠之下,一條包住披紗嘅瘦長身影騎住隻仔慢慢咁行到去一個山寨,而呢個山寨其實係山賊斧頭幫嘅賊竇;寨入面成班兇神惡煞嘅山賊見到嚟嘅係一個女人就色心起,但係呢個女人氣定神閒完全唔驚,賊匪嘅二當家覺得唔妥,於是質問女人嘅來歷,點知呢個女人露出桃花嘅紋身,原來佢就係江湖上令人聞風喪嘅女賊春三十娘,班賊匪知道佢身份之後就即刻走夾唔抖,但係春三十娘用武力威脅住佢哋,要班賊匪一人頂住一戙銅錢,如果銅錢落地就人頭不保。班山賊個個頂住戙銅錢去搵佢哋幫主至尊寶話俾佢知有件咁嘅事,於是至尊寶親自落寨睇吓係咩人咁巴閉可以控制住佢班手下,但係當見識過春三十娘上乘嘅功夫之後,至尊寶都不得不甘拜下風,屈服喺淫威之下。

春三十娘此行嘅目的係要搵出板底有三粒嘅人,佢收到風話有三粒痣嘅孫悟空托世將會喺呢度出現,搵到孫悟空托世就可以知道再世唐三藏嘅下落;佢知道呢班山賊入面冇佢想要嘅人,於是指使佢哋幫佢截劫過路人,檢查吓佢哋腳板底有冇三粒痣,搵到嘅話就交畀佢處理。

一個黑媽媽嘅山窿,入口上面啲係咁流落嚟形成一幅水簾阻隔住,至尊寶穿過水簾入到山窿裏面,突然一把女人聲問佢搵唔搵到三粒痣嘅人,搵到嘅話就可以救到……至尊寶一紥醒,原來係發,忽然聽見夜深人靜嘅外面有人大嗌,至尊寶以為班手下幫佢殺咗春三十娘,正高興咁要去睇吓,點知畀佢見到一隻好巨型大過個人嘅蜘蛛喺度張牙舞爪,佢嚇到掉頭係咁走,隻巨蛛就係咁追想吐絲嚟捉住佢,卒之至尊寶跌咗入隻巨蛛預先佈好嘅蛛網陷阱,黐咗喺上面甩唔到身,隻巨蛛正要埋身襲擊佢嘅時候,好彩手下盲炳及時趕到救咗佢;跟住成班山賊群起出動要用火燒呢隻巨蛛,巨蛛唔夠打就掉頭走。

趕走咗隻怪蜘蛛,至尊寶就命令手下出動要殺埋春三十娘;至尊寶偷偷咁潛入春三十娘嘅房想趁夜偷襲,班手下就喺樓下做後援,點知冇幾耐班手下見到至尊寶客客氣氣恭恭敬敬咁由間房度退返出嚟,原來三十娘個師妹白晶晶都嚟咗,至尊寶對佢一見鍾情,於是就突然改變態度想博好感。

至尊寶走咗之後,白晶晶直接向佢師姐道明來意,佢知道三十娘想獨霸再世唐僧肉,想分返一份,於是兩師姐妹一言不合就要開片,白晶晶化身成為有好大個白頭骨嘅白骨精,而三十娘亦都化身變成之前出現過襲擊至尊寶嘅蜘蛛精,呢個場面當堂嚇親喺外面偷睇嘅二當家,於是連爬帶滾咁週圍搵掟暱埋,兩隻妖精追到出去牛欄都搵唔到人,於是三十娘警告白晶晶唔好將唐僧嘅事週圍揚,跟住就行咗去,點不知佢哋嘅對話就俾牛欄入面隻聽到,隻牛拿拿林去搵佢大王稟告消息。二當家見到妖怪,又拿拿林去報告畀至尊寶知,佢一輪咀講見到妖怪嘅情形,點知見兩師姐妹喺背後出現即刻改口風;出到屋外,三十娘就用移魂大法迷魂咗二當家,要佢做臥底監視班山賊嘅一舉一動。

至尊寶想令到白晶晶對佢產生好感,於是剃晒啲鬚改變形象,點知白晶晶一見到佢,就誤會以為佢係孫悟空,重用三味真火燒佢隻手,當搞清楚係一場誤會時就發脾氣走咗去,令到至尊寶一頭霧水。原來白晶晶當年同赤煉神君訂咗婚約,點知佢鍾情嘅孫悟空話要娶佢,於是就冇成親嚟等悟空,之但係三年後悟空反口,重交帶班子猴孫俾返塊定情玉佩俾佢,令到白晶晶一路深心不憤唔肯再成親。

又嚟到呢個黑媽媽嘅山窿,再次穿過水簾入到去山窿入面,又係有把女人聲同至尊寶講嘢……又係發夢。跟住至尊寶又再出動去劫腳板底,但始終都係冇發現有三粒痣嘅人,重俾揪葡提子仆親個頭;返到山寨嘅茅屋入面,盲炳洗乾淨揪提子擺喺張上面,點知至尊寶一轉身,揪提子忽然變咗個老和尚,原來佢就係神仙菩提老祖,佢特登化身嚟到就係想話畀至尊寶知佢哋俾妖怪入侵,重畀咗塊照妖鏡至尊寶自己去求証,咁啱白晶晶敲門,至尊寶好開心咁開心招呼,點知唔覺意一望塊鏡入面就見到白晶晶嘅真身,嚇到即刻閂埋度門;菩提老祖畀咗一叠隱身符同埋兩個用嚟收妖伏魔嘅乾坤袋至尊寶,而佢就將叠符畀咗二當家叫佢派畀班手足,叫佢哋夜晚出動除妖,着咗魔嘅二當家轉個頭將叠符掉晒入火爐。

呢一晚,成班賊赤裸裸咁淨係條腰圍住假嘅隱身符,靜靜雞去到兩師姐妹食緊飯嘅地方,兩師姐妹一早收到風,於是將計就計詐睇唔到,重玩到至尊寶着晒,終於忍唔住就「現身」同兩師姐妹攤牌,呢個時候,變咗節嘅二當家行咗去兩師姐妹身後面陰陰咀笑,跟住將兩個乾坤袋一笠,當場收服咗兩個妖精,然後一陣輕煙,二當家變返做菩提老祖。原來當時佢哋一早知道唔妥,所以將真正嘅二當家綁住,到收咗兩隻妖精之後就俾手足帶到去大廳度審問,審審吓突然發現,隻旺財居然將乾坤袋個綁繩咬爛咗放咗兩個妖精出嚟,菩提老祖即刻詐諦捉住至尊寶威脅要鍊死托世孫悟空,兩師姐妹唔敢亂嚟,跟住班手足就一擁而上去圍攻兩師姐妹,掩護至尊寶叫佢快啲走,不過茅舍裏面「打」得火熱嘅同時,外面傳嚟隆隆嘅腳步聲,原來牛魔王收到稟報,親身嚟到想搵再世唐僧;兩師姐妹夾住至尊寶就向外走佬,不過中途俾牛魔王截住,於是三隻妖精就打起上嚟,打打吓兩師姐妹唔夠揪,於是就又夾住至尊寶走人,順便夾埋二當家,四個人走到返盤絲洞度暫避。

返到盤絲洞,兩師姐妹又因為殺唔殺至尊寶嘅問題而再度鬧不和,跟住又打,不過因為師妹中咗師姐嘅盤絲軟甲毒唔夠打,於是拉住至尊寶走咗入有萬年金剛岩石封門嘅石室度暫避風頭。跟住搞吓搞吓石門又開又閂,終於至尊寶就困咗三十娘同埋二當家喺石室裏面,同白晶晶離開咗盤絲洞,而三十娘錯誤咁對住二當家施展催情大法,令到自己有咗同二當家嘅骨肉。

至尊寶同晶晶去到一處山崖頂休息,重應承會一路照顧晶晶,晶晶雖然知道至尊寶並唔係孫悟空托世,但亦都對佢產生咗好感;冇幾耐之後,至尊寶見晶晶毒發暈得一陣陣,就趁佢休息嘅時候返返去盤絲洞搵三十娘,呃佢話想知唐僧下落就要幫晶晶解毒,但係當兩人趕到返去山崖頂嘅時候已經唔見咗晶晶,地上面只係剩返嗰塊定情玉珮。

牛魔王嘅大本營入面,牛魔王正喺度幫白晶晶運功療傷,因為晶晶以為至尊寶又拋棄佢,萬念俱灰之下要跳崖自殺,點知唔死得俾班帶咗返去,於是牛魔王發功救晶晶,要佢帶路返盤絲洞搵唐僧。

至尊寶俾三十娘困咗入石室等死,至尊寶就想掘地道逃走,點知掘吓掘吓,掘到塊寫住教佢點用寶物嘅木板,同埋一嚿刻咗經文又寫住「月光寶盒」四個字嘅長方形木塊,忽然間掘出嚟嗰個窿發生強大嘅吸力吸咗佢入去……又係個黑媽媽嘅山窿,至尊寶又再穿過水簾入到山窿裏面,突然山窿四週圍發出陣陣嘅金光,呢個時候洞入面嘅情況就變得清楚好多,洞頂打橫浪咗一支好粗大嘅金色圓柱,下面一個細細石窿入面嘅檯上重擺住一框金色圓圈形嘅嘢,至尊寶行埋去另一張石檯度打開一幅畫咗觀音大仕嘅畫像時,畫像突然自己燒起上嚟,跟住同之前一樣嘅女人聲又再講嘢,講出咗五百年前孫悟空同唐僧嘅一段宿緣同埋因果;至尊寶知道呢次唔係發夢,不過亦都唔知個女人講乜,於是冇理就想搵路走返出去。

呢個時候白晶晶已經俾牛魔王同一眾牛兄弟脅持住帶咗返嚟盤絲洞,同一時間三十娘亦生咗個男嬰,二當家見三十娘咁想搵唐三藏,就索性改個仔嘅名叫三藏;晶晶甩開咗牛魔王,嚟到見到三十娘抱住個蘇蝦仔,三十娘就呃佢話係同至尊寶生嘅,激到晶晶一口真氣洩出就暈咗。牛魔王聽到蘇蝦聲就同班牛兄弟一齊要搵再世唐三藏,因為要應付牛魔王,三十娘就交咗個蘇蝦畀二當家,然後獨自去應戰。

至尊寶終於走出咗個山窿返返去盤絲洞,但係一出到嚟就見到滿身鮮垂死嘅晶晶,側邊重有把染咗血嘅,為要搵出晶晶之死嘅真相,至尊寶一次又一次咁借助用月光發動嘅月光寶盒去穿梭時空返返之前嘅時間,終於俾佢發現晶晶係自殺死嘅,而佢亦都順利咁救返晶晶,重解釋返之前唔見咗人係一場誤會,於是兩人冰釋前嫌,不過當前問題未解決,因為牛魔王重喺度同三十娘打緊,佢哋重開動咗斷龍石機關,石閘一落就再開唔返,於是晶晶就踢咗至尊寶出盤絲洞外,留喺洞裏面同師姐一齊大戰牛魔王,而洞外面兩個男人係咁隔住塊落緊嘅石閘大叫「娘子」。

至尊寶唔甘心,於是再一次動用月光寶盒要返去救晶晶,爆響一聲之後,至尊寶又返到入盤絲洞入面,不過呢次個洞入面就靜英英咁冇晒人;至尊寶扭開石閘機關,石閘徐徐打開,出到外面天已經光晒,但重係一個人都冇,唔明點解之際唯有又拎出月光寶盒,不過因為日頭日白冇月光就用唔到月光寶盒;呢個時候,一個少女拖住隻驢仔滋滋油油咁入到嚟洞口嘅狹道,佢冇理到個望住自己嘅傻男人,一直行到去洞口想入洞睇吓,點知俾至尊寶喝止叫佢唔好亂闖盤絲洞,但係抬頭一望,原本寫住盤絲洞嘅石碑竟然係寫住水簾洞,呢個少女覺得個新名唔錯,於是向住塊石碑揮一揮手,將水簾洞嘅字變成盤絲洞,重即時改自己個名叫盤絲大仙(即係三十娘同晶晶嘅師父),除咗要霸佔呢個洞,重搶埋至尊寶嘅月光寶盒,再喺佢腳板底下打上三粒點嘅記號,要至尊寶做佢奴隸

至尊寶劇痛過後突然諗起一啲嘢,於是拎出塊照妖鏡照吓自己個樣……

!!

(上集喺呢度完結,續集就要睇《西遊記大結局之仙履奇緣》)

主要出場人物同埋演出者[編輯]

主題歌[編輯]

  • 「人生的天與地」(上集主題曲)
作曲:盧冠廷/填詞:唐書琛/主唱:盧冠廷
  • 「一生所愛」(下集主題曲)
作曲:盧冠廷/填詞:唐書琛/主唱:盧冠廷
  • 「未了情」(上集完場曲)
作曲:賀緣汀/填詞:唐書琛/主唱:莫文蔚
  • 「追月」(下集完場曲)
作曲:侯湘/填詞:唐書琛/主唱:朱茵
  • 「ONLY YOU」(下集插曲)
作曲:BUCK RAM & ANDO RAND/填詞:劉鎮偉/主唱:羅家英