北京路 (廣州越秀)

出自維基百科,自由嘅百科全書
Jump to navigation Jump to search

座標: 23°7′32.51″N 113°15′49.34″E / 23.1256972°N 113.2637056°E / 23.1256972; 113.2637056

北 京 路
BEIJING LU
GZ rd sign N.svg Guangzhou rd middle.png GZ rd sign S.svg
北京路嘅路牌
北京路嘅路牌
性質: 一般馬路
全長: 1.194公里
行車線: 雙向3車道
北京路步行街呢截唔畀行車。[1]
地區: 廣州市越秀區
起點: 沿江中路
終點: 廣衛路
主要建築: 廣州大廈
廣州百貨大廈
新大新百貨
廣東省財政廳
太平館西餐廳
聯合書店
陳李濟藥廠舊址
永漢電影院
廣廈國際旅行社
文明大酒店
潮樓
南關電影院
天字碼頭

北京路粵拼bak1 ging1 lou6)係中國廣東廣州嘅南北走向馬路,喺越秀區。南邊從沿江中路開始,一直向北去到廣衛路

概要[編輯]

全長大概1194米,闊16米,雙向3車道。雙行綫,其中大南路同埋文明路嘅交界北邊到中山五路同埋中山四路嘅交界嘅南邊呢橛係唔畀行車嘅。

[編輯]

其實「北京路」呢笪繁華嘅商業區域,係有段古嘅。喺明朝同埋清朝嗰陣,惠愛街(依家係中山六路到中山四路嗰橛)係舊陣時廣州嘅東西骨幹,而條街南北兩邊冚唪唥都係啲衙門嚟嘅,佢重係個政治中心區添。而雙門底(依家係北京路)嗰截就係從城南邊直通去到天字碼頭(專門畀官員登陸入嚟廣州城用嘅)嘅主幹道。所以喺嗰陣時,喺今日中山五路、中山四路交界北邊嗰截北京路係衙門官員、小人、家屬嘅住處。因為官家消費,呢度形成咗廣州城嘅繁華商業中心。

雙門底[編輯]

從清兵開始睇實廣州到1920年,廣州係重未拆城牆嘅,而北京路嗰邊都凈係一條大街啫,而街嘅中間就有兩棟城門。呢兩個城門好耐就有,係唐末古建築,當時叫「清海軍樓」,後來到宋代改建爲雙門城樓,因為條街穿過呢兩棟門,所以得出「雙門底」呢個地名。元明清三代,呢棟樓都係廣州嘅報時樓,元延祐三年(1316年)整咗個「銅壺滴漏」安喺城樓做計時,清順治十年(1653年),呢棟樓又改建,不過保持雙門特色,改名做「拱北樓」。

而「雙門底」有個民間古仔,就係喺清朝嗰陣,因為有兩個一樣官階嘅官員同一時間嚟咗廣州,如估按照嗰陣時嘅習慣係一個官員凈係可以行一個城門入去。由於兩個官都想過城門,結果呢兩隻官你爭我搶噉,差啲搞咗個大頭佛出嚟。嗰陣時嘅廣州政府唔想畀啲人鬧,搞到失嗮禮,結果特登將棟門拆開成2個。而呢棟門嘅原名係嗌「永清門」。

整闊咗條馬路[編輯]

1920年整闊咗之後嘅永漢路

喺民國9年(1920年),廣州市政府就將呢條馬路整闊咗,重將「永清路」改名「永漢路」。而改呢隻名係因為清政府已經畀孫中山推翻咗[2]。而拱北樓亦係整路嗰陣拆咗。

改咗4次名[編輯]

呢條馬路以前唔嗌「北京路」嘅,以前嗌過「永漢路」同埋「漢民路」。

  • 永漢路

究竟點解呢條路以前嗌過「永漢路」呢隻名?一般認爲係爲咗表示反清排滿而改「清」爲「漢」。

另外有個噉嘅古仔。係因為清朝嗰陣嘅廣東省省長係楊永泰,佢就想將自己嘅名留喺廣州嘅路名入面嚟畀啲後人記得佢係邊個嘅,但係嗰陣時嘅路名改名規矩係,凈係得死咗嘅人先至有呢份套餐。結果搞到楊永泰諗到頭都爆埋都重未諗到,結果佢就將個「永」字同埋個「泰」字嚟拆開咗。就將條「漢民路」改咗名嗌「永漢路」,又將距離萬福路冇幾遠嘅路改咗名嗌「泰康路」。就係噉啫,佢就將「永泰」呢兩個字用嗮喺呢兩條路嘅名入面喇。[3]

  • 漢民路
喺民國嗰陣時嘅永漢路。

到咗辛亥革命之後,呢條馬路就改咗嗌「漢民路」。呢隻名係紀念國民黨元老——胡漢民喺1936年死咗嘅事。到咗1949年10月14號之後又改返嗌「永漢路」。

  • 北京路

呢隻名其實喺文化大革命之前係冇嘅,不過到咗1966年由於受到極左思想影响,呢條馬路就改咗名嗌「北京路」就一直用到依家[4]

車水馬龍鬥恆大[編輯]

喺成條北京路入面,有好多間舖頭響度,佢哋所做嘅業務同依家都差唔多。有300幾年嘅老藥房――「陳李濟」就響呢度,重有幾處中國老牌出版社舊址。「王氏宗祠」(依家嘅廣州青年文化宮)嘅西邊冇幾遠就係「拱北茶樓」喇,佢哋重係用緊以前城樓嘅舊名。而附近重有條越秀書院街(依家係禺山路),就係因為入面有間越秀書院響度,到咗1912年嗰陣就起咗間學校。而喺越秀書院街嘅街口重有間「市師雞」呢間斬白切雞出嗮名嘅飯檔。

從以前一直到1949年10月初嗰陣,每年嘅迎春花會都係喺永漢北路嗰邊舉辦。依家嘅新大新百貨係以前成個廣州入面,四大百科公司中嘅其中一間。重有就係之前嘅美華百貨商店。而陳李濟藥房嘅隔籬就係禺山路,入面有禺山市場。相傳喺舊陣時嘅廣州入面有「番山」同埋「禺山」呢兩座山仔,所以起成呢個路名。而市場嗰邊以前係笪空地嚟添,而個市場係到咗20世紀30年代初先至出現嘅。從大南路文明路口一直向南行,就到咗聞名中國嘅商業大街——「高第街」。而北京路喺以前嗰陣就有巴士行㗎喇,喺廣州開始有巴士嗰陣,第一部巴士就係從黃沙去到東山嗰埞,而呢部巴士就經過北京路呢度,直到今日條綫都未變過。

高第街地段[編輯]

內文: 高第街許地 (廣州)

喺高第街入面最出名嘅就係許氏家族喇(所以又嗌做「許地」),佢哋係來自潮汕西邊嘅巨族,喺呢百年嚟就出咗好多猛人(甚至連寫過《千秋家國夢》呢本小說嘅小說家都出過)。

千年古道[編輯]

內文: 千年古樓遺址
舊陣時嘅路面遺跡,依家用玻璃嚟冚住保護。

喺2002年嘅7月份,北京路步行街嘅北邊就發現咗從唐朝到中華民國嗰陣共計11層嘅路面,而南邊發掘咗從宋朝嘅拱北樓基。而出土嘅文物就有大量嘅石條同埋牆磚,重有宋朝嗰陣嘅拱北樓基、明朝嗰陣嘅拱北樓抱鼓石。家陣呢啲遺跡都係喺原地用玻璃冚住保護(除咗抱鼓石露天)[5]

飲食娛樂一條街[編輯]

步行街[編輯]

內文: 北京路步行街

喺1997年2月份,北京路正式開通咗條雙休日步行街,喺嗰陣時即使係雙休日都凈係可以行人同埋巴士啫;到咗1998年到2001年,北京路但凡節假日嗰陣,都唔畀任何車行入而家步行街嘅呢截路;到咗2002年1月1號,北京路正式變成依家嘅步行街喇[6]。依家北京路係百年老店同埋廣州老字號嘅集中地,入面嘅舖好多,加上規模又大,經營嘅嘢又齊,有好多種嘅商舖賣場、酒樓食肆、文化娛樂場所同埋銀行,夾夾埋埋都已經超過咗500間喇[7]。入面嘅舖頭有賣衫、鞋、珠寶首飾,亦有百貨同埋餐飲。而依家有嘅時裝檔、皮具專賣檔夾埋都差唔多300幾間喇;而賣衫、鞋、精品同埋百貨嘅綜合商場,就有成廿間[7]

2014年10月16號,北京路步行街向北延伸到而家嘅廣東省財政廳附近。[8]

飲食[編輯]

北京路入面都有好多唔同層次嘅飲食消費,從比較低價嘅小食檔同埋快餐檔、一直到高級餐廳都有。呢啲餐飲嘅種類都幾多下,有古色古香嘅廣州地道西關美食;重有中國各地嘅菜;又有意大利、法國呢啲西餐,亦有迴轉壽司、鐵板燒呢啲日本料理,重有韓國菜、印度菜同埋東南亞美食[9]。而呢啲新嘅食檔,主要集中喺惠福東路附近,距離光明廣場冇幾遠啫。而惠福東路係喺2010年開始先至搞成條食街。

娛樂[編輯]

北京路入面有兩間電影院響度,分別係青年文化宮電影院同埋永漢電影院

經過嘅道路[編輯]

惠福東路同埋北京路嘅交界位
西湖路同埋北京路嘅交界位

條路順序從南到北排,加粗咗嘅字係主幹道:

特色[編輯]

千年古樓遺址

根據史書同埋專家考察,家陣北京路、教育路西湖路一帶已經有、同埋已經挖出嚟嘅遺址:秦番禺城遺址秦漢造船工地遺址西漢南越國宮署遺址唐清海軍樓遺址南漢御花園明大佛寺明城隍廟、明清大南門遺址、清廬江書院、廣州起義紀念館。呢啲遺蹟文物涵蓋十幾個朝代,好有歷史文化價値。

到依家為止,呢笪地雖然話過咗2000幾年,但係佢嘅地位始終都冇變過。喺全球範圍內,噉嘅嘢好少見,所以呢度好有歷史文化內涵嘅。喺1978年之後,呢條路重多咗廣州百貨大廈(1995年完工開放)、新大新百貨呢啲市級嘅商檔同埋一堆比較出名嘅時裝商場。

[編輯]

  1. 大南路同埋文明路嘅交界北邊到廣衛路嘅財廳嗰頭
  2. (語體中文)道不盡的北京路,喺2009年4月15號搵到
  3. 永汉路以前的路名细分
  4. 文化大革命中的改名浪潮
  5. (語體中文)千年古道現繁華北京路,《人民日報》華南新聞,2002年09月12日第一版
  6. (語體中文)千年古道,繁華盛世--廣州北京路今貌,喺2009年4月16號搵到
  7. 7.0 7.1 (語體中文) 廣州步行街指南,喺2009年4月15號搵到
  8. 北京路北段今起变身步行街 羊城晚报 2014年10月16號 A9版
  9. 北京路美食新體驗,喺2009年4月16日搵到

連出去[編輯]