南度藍姆·高德西

南度藍姆·維納亞克·高德西 Nathuram Vinayak Godse
出世	Ramachandra Vinayak Godse (1910-05-10)1910年5月10號 印度孟買管轄區馬哈拉施特拉邦巴拉馬蒂
死	1949年11月15號(1949-11-15)（39歲）  印度東旁遮普邦（即依家嘅哈里亞納邦）安巴拉監獄
死因	絞刑
出名原因	行刺印度國父甘地（主謀）
政黨	印度教大齋會
親屬	維納亞克·R·高德西（老豆） 戈帕爾·高德西（細佬）

南度藍姆·維納亞克·高德西（馬拉提文：नथुराम गोडसे，英文：Nathuram Vinayak Godse，1910年5月10號—1949年11月15號）係印度馬哈拉施特拉邦人，印度民族主義者，傳統印度教婆羅門世家出身。1948年，響新德里一場晚禱會上面，成功行刺印度國父甘地，之後佢本人當場畀人拉咗。佢響1949年11月畀人以謀殺罪同埋共謀罪判以絞刑，同月15號處決。

早年

響1910年5月10號，佢響屋企出世，嗰時佢原本叫「Ramachandra」。老豆維納亞克·R·高德西係個響郵政部打工嘅小職員，經常要搬嚟搬去。由於佢三個大佬都夭折咗，佢老豆老母為咗佢可以生存落嚟，所以佢由啱出世開始就畀佢哋當係女仔咁養，重為佢戴上一種叫「納特（Nath）」嘅女式鼻環，佢因而得名「Nathuram」，意思即係「戴鼻環嘅公羊」。直至到佢細佬戈帕爾·高德西出世之後，佢父母先至改用男仔嘅方式養大佢。正因為係咁，佢好早就係一個虔誠嘅印度教信徒。

佢響巴拉馬蒂讀完小學之後，隨即寄宿響浦那嘅姨媽屋企，響嗰度，佢接受咗英文教育。當時，佢好崇拜因為倡議印度獨立而畀人拉咗嘅甘地，同後嚟嘅睇法完全唔同。不過，佢響十六歲嗰年輟學，冇讀到高中畢業。

政治生涯

輟學之後，佢被逼要做一啲低賤嘅工作，生活越來越艱難，重幾次做生意都失敗。之後，佢畀當時興起嘅印度民族主義吸引。響1930年，佢加入右翼政黨印度教大齋會，重識咗佢嘅政治老師維納亞克·達莫德爾·薩瓦卡，之後佢又加入響桑格利嘅軍事組織國民志願服務團。期間，佢睇咗好多有關傳統宗教、歷史、政治同埋社會學嘅書，其中佢睇得最多嘅係甘地作嘅書。睇完呢啲書之後，佢對蒙兀兒汗國同埋當時嘅大英帝國對印度人民嘅壓迫好不滿，重對班穆斯林同埋基督徒等等嘅不滿日益增加，後嚟佢重話「印度係印度教嘅印度」。因為佢認為國民志願服務團好軟弱，所以佢選擇退出。

跟住，佢識咗同佢政治觀點一樣嘅政治學者納拉揚·安普特，佢哋重一齊出版《前沿報》，但就因為論點太過偏激而畀當時政府禁止出版。之後，佢將《前沿報》改名叫《印度民族報》出版。響報紙入面，佢大力批評穆斯林、英國人同埋甘地，重話甘地提出嘅甘地主義係對印度教徒嘅「閹割」。而南度藍姆佢提出嘅論點響孟加拉邦同埋馬哈拉施特拉邦嘅中產階級同高級種姓階層入面盛行。

二戰之後，當時英國政府決定畀印度自治權，但係印度獨立之後應該係點嘅政治形態，印度國內起咗好大分岐。信印度教、以尼赫魯為首嘅印度國民大會黨主張起一個統一兼民主嘅印度，而呢個睇法已經得到英國政府同埋蒙巴頓勳爵支持；而信伊斯蘭教、以穆罕默德·真納為首嘅全印穆斯林聯盟就主張由印度分裂一個屬於伊斯蘭教嘅國家，重威脅會以內戰嚟迫佢哋應承。甘地見到呢個情況，雖然佢響意見上係比較偏向印度國民大會黨（因為佢都主張起一個統一嘅印度），但係佢更加唔想見到印度教同穆斯林呢對「印度嘅阿媽嘅左右手」互相殘殺，所以甘地佢周圍去，想解決紛爭。1947年，響「直接行動日」發生之後，甘地唔驚死，都仲要去直接行動日嘅爆發地加爾各答，號召班印度教徒同埋穆斯林重新團結，重以長達廿一日嘅絕食嚟迫雙方讓步。響1948年，印度同巴基斯坦正式分裂之前，甘地佢為咗說服印度政府將5.5億盧比畀返新起嘅巴基斯坦政府，搞咗一個長121個鐘嘅絕食，最後印度政府讓步。

甘地嘅做法徹底激嬲咗南度藍姆，佢認為甘地已經出賣咗印度人嘅利益（其實佢都係主張起一個統一嘅印度，呢樣嘢同甘地本意一樣），已經開始想殺咗甘地。當佢哋聽到甘地以絕食迫政府讓步得咗，細佬戈帕爾好嬲咁話：「甘地對人民產生咗好惡劣嘅影響。我哋一定要殺咗佢！」而南度藍姆自己都話：「甘地冇做好自己身為國父應該要做嘅野。佢嘅所作所為證明咗佢係偏幫巴基斯坦。而我作為一個對國家盡責嘅人民，當我知道呢個人指揮住我地國家一步一步走向解體個陣，我認為自己要即刻殺咗佢。」於是，佢同安普特快速搞咗一個響馬哈拉施特拉邦、旨在刺殺甘地嘅組織，拜老師維納亞克·達莫德爾·薩瓦卡做精神領袖，而手下就有維什努·卡凱爾、馬丹拉爾·帕瓦、迪格姆貝·旁齊等人。行動日期定響1948年1月20號。

刺殺甘地

1948年1月30號，南度藍姆就係響呢度開槍殺死甘地

響1月20號當日，南度藍姆佢跟住甘地嚟到甘地發表演講嘅地方。響人群入面，手下迪格姆貝·旁齊擲出一個手榴彈，嚇到個個都走佬，剩低甘地依然企響演講台上面。而原本計劃係要迪格姆貝再掟多個手榴彈，但係迪格姆貝臨陣退縮，佢冇依照原計劃去掟第二個手榴彈，而係混入群眾入面走佬。第一次行刺甘地失敗。而差佬捉咗馬丹拉爾，仲順藤摸瓜，知道嗮組織嘅所有資料。南度藍姆佢見到咁樣，就諗咗條計仔，用300盧比買咗支貝瑞塔M1934半自動手槍同埋20粒9毫米子彈，做最後一擊。

響同月30號，甘地去新德里參加一場晚禱會，南度藍姆知道之後就扮係聽佢演講嘅人，混入人群入面。當甘地走到祈禱台前面嘅時候，南度藍姆撞開啲人，嚟到甘地面前，向甘地行咗大禮，而甘地都向佢回禮。同甘地同行嘅侄孫女、十九歲嘅摩奴·甘地見到佢彎低腰，以為佢係要向甘地行摸腳禮，就行上去叫佢離開：「先生，巴布已經遲咗到啦，點解你都仲要嚟打攪佢？」（巴布響印度嘅意思係指老豆，而呢到係指對甘地嘅尊稱）但係南度藍姆佢突然推開摩奴，趁住甘地去攞返眼鏡嗰陣，佢拔出貝瑞塔M1934半自動手槍，近距離向甘地開咗三槍，之後甘地即刻扑底響地上，有人立即抬佢入去比爾拉大廈急救，但係三十分鐘之後證實死亡。聽講響南度藍姆開槍個下，甘地細細聲咁講「He Ram！（呀，神啊！）」

南度藍姆響殺死甘地之後冇走到佬，反而仲大聲咁喊差佬。美國駐印度外交官赫伯特·賴納第一個有反應，佢即刻捉住南度藍姆，將佢交畀差佬。呢件事令到全印度人民好震驚。響佢畀差佬拉咗之後，組織成員相繼落網，最後一個成員安普特都響同年2月14號畀差佬拉到。

審判同埋處決

至中間、坐底個嗰就係南度藍姆

1948年5月27號，響德里紅堡組成嘅印度特別法庭，開庭審理全部組織成員（其中三人缺席，實際被告有九個）同埋甘地刺殺案。由於佢哋覺得呢單案太過複雜，所以冇用到陪審制，而主審法官係阿特瑪·查蘭。法庭指控組織成員由1947年到1948年期間響浦那、孟買同埋德里等地策劃行刺甘地嘅非法行動，最終仲做咗出嚟。之後法庭由目擊者入面抽查咗149人，證詞寫滿咗720張紙，用咗八十幾日先至寫完。

響1948年11月，審判進入第二階段，開始對班組織成員做好多審問。

響1948年12月1號，審判進入第三階段，檢察長根據證供同埋證詞，正式指控組織成員犯謀殺罪同埋共謀罪。而呢個時候，南度藍姆佢唔再好似平時講嘢咁鈍，變得好冷靜。佢響庭上面用英文咁話行刺甘地呢件事完全係佢自己一個人搞，嘗試將罪行完全由自己一個人孭鑊。好多旁觀人士都對於佢嘅行為好感動，就連法官科斯拉都認為：「如果呢單案設有陪審團，並負責對佢嘅上訴作出裁決嘅話，佢哋一定會判佢『無罪』。」

終於響1949年2月10號，法庭作出咗判決。判決指除咗薩瓦卡之外，其他人都至少有一項控罪成立，所以有八個人被判坐監，而南度藍姆同埋安普特就被判以絞刑，所有人都會響安巴拉中央監獄服刑。全部人都提出要上訴。響1949年11月8號，法庭作出二審裁決，其中有兩個人上訴得直，當場無罪釋放，而其他人就上訴被駁回（包括南度藍姆）。聽講甘地兩個仔曾經為南度藍姆佢求情，希望法官可以判輕啲，但就畀當時嘅總理尼赫魯、副總統兼內政部長帕特爾同埋印度聯邦總督拉賈戈巴拉查理拒絕。

響1949年11月15號，佢同安普特響安巴拉中央監獄處決，終年三十九歲。聽講佢響處決之前，佢大聲咁喊「希望印度團結一心，天長地久。」佢死之後，按照佢生前嘅諗法，佢嘅遺體按照薩拿塔那教義式火化。

死後影響

響1949年11月8號二審宣判嘅時候，南度藍姆佢曾經響法庭上讀咗一篇水蛇春咁長嘅自辯書，大概係表示自己好尊敬甘地，而自己刺殺佢嘅原因完全係為咗印度嘅未來。雖然法庭一直都查禁呢本書，但呢篇自辯書都一直響民間私底下流傳。

響1977年，坐完15年監之後出獄、南度藍姆嘅細佬戈帕爾將呢本書翻譯做英文出版，書名係《May It Please Your Honour》。而響1993年，戈帕爾重新出版過呢本書，當中佢加咗一段叫做《Why I Assassinated Mahatma Gandhi》（中文即係《我點解要刺殺聖雄甘地》）嘅結言。後嚟印度右派將呢本書尊封做經典，甚至有人將南度藍姆講做一個「真正嘅愛國者，真正嘅印度人」。

響2014年印度大選，由偏右派政黨印度人民黨領導嘅聯盟響大選入面攞到壓倒性勝利，擊敗偏左派嘅印度國民大會黨。而印度教大齋會響呢個時候開始為南度藍姆翻案，將佢講成係一個烈士，仲曾經同總理莫迪提出要為南度藍姆起一座胸像，不過最後莫迪冇應承。

2015年1月30號甘地遇刺六十七周年嗰日，印度教大齋會發佈一段由佢哋拍嘅紀錄片，片名係《愛國人南度藍姆·高德西》。條片出街之後，隨即惹嚟好大爭議。而浦那地方法院仲曾經收到一份民事訴訟，上面要求法院頒佈禁止呢條片發行。

除此之外，印度教大齋會為南度藍姆起廟同埋拜祭佢，仲將每年嘅1月30號定做「勇敢日」。