當地人

  提示：呢篇文講嘅唔係本地。

當地人，又叫地頭蟲、本地人，係喺一笪地方住開嘅人，同由外地搬過嚟人相對。當地人好熟悉自己地頭嘅語言、文化同風俗，外嚟人就需要一段時間適應同融合。

香港

睇埋：香港歷史、新界原居民同香港新移民

香港係一個「移民城市」，最早居民係越人。金朝同元朝嘅時候，漢人嘅難民大量南逃，而香港就係其中一站。香港嘅新界五大氏族——侯、鄧、廖、文、彭，都係當年南宋難民嘅後代。其他本地人就係唔同時期嚟到香港嘅漢族移民，好多係廣東四邑籍人。

第二次世界大戰期間嘅日佔時期，大量嘅香港人因爲餓死咗或者逃亡離港，人口由1941年嘅大約160萬，大跌倒1945年嘅60萬。

二戰完咗之後香港重光，跟住冇耐大陸就出現國共內戰，4年之後中國共產黨更加建立咗中華人民共和國，令到大量嘅中國大陸難民湧入香港，香港人口喺兩年之間急增3倍，到只係1947年，香港就已經有大約180萬人。

1961年，香港第一次進行大規模嘅香港人口普查，數據顯示香港有320萬人口，而其中有一半都係喺內地出世，。根據每個年齡組別嘅比例推算，當時有接近8成人口，都係內地移民或者內地移民嘅第二代（即係父母至少一個係內地移民）。

1970年之後，中國經歷三反五反運動、大躍進、三年大饑荒、上山下鄉運動、文化大革命等等嘅事件，再次令到大批嘅內地難民偷渡去香港。

港英政府因爲偷渡人數太多，所以決定實施抵壘政策。但係到70年代尾，雖然非法進入香港邊境嘅內地逃港人士仍然會被遣返，但係仍然有好多人成功進入咗九龍半島，並且攞到香港身份，令到香港人口再次壓力倍增。港府喺1980年通過法例決定改爲實施「即捕即解政策」。1982年港英政府同大陸政府達成協議，決定由內地嚟香港嘅定居者，一定要有中國政府簽發嘅「單程證」，配額係每日75個，而後期1995年之後加到150個。