大時代 (香港電視劇)
呢篇文講無綫劇集。想搵其它嘢嘅話，請睇大時代 (搞清楚)。| 大時代 The Greed of Man | |
|---|---|
| 類型 | 時裝商戰 |
| 編劇 | 關靜雯、關靜雲、方世強、陳寶燕、 伍立光、張莉莉、龍文康、陳寶華、 張寶燕 |
| 編導 | 袁英明、邱南隆、劉鎮明、黃俊文、 林建龍、馮柏源、連熾勳 |
| 助理編導 | 李國輝、黃肖英、關月麗、林玉芬、 羅永賢、管國偉 |
| 主演 | 鄭少秋、劉青雲、藍潔瑛、周慧敏、 郭藹明、李麗珍、邵仲衡、陶大宇、 劉松仁、林保怡、楊 羚、吳詠紅、 曾 江、劉 江、光 毅 |
| 集數 | 40 |
| 主題曲 | 1：我的生命我的愛 2：歲月無情 |
| 作曲 | 1：草 生 2：徐嘉良 |
| 填詞 | 1：因 葵 2：潘偉源 |
| 主唱 | 1：譚詠麟 2：鄭少秋 |
| 插曲 | 1：紅河村 2：未曾後悔 |
| 作曲 | 1：未知 2：黃家駒 |
| 填詞 | 1：未知 2：黃家強 |
| 主唱 | 1：周慧敏 2：Beyond |
| 製作 | |
| 拍攝／製作年份 | 1991年9月—1992年3月 |
| 製作統籌 | 陳美華 |
| 監製 | 韋家輝 |
| 編審 | 曾謹昌、陳鈺萍 |
| 拍攝地 | .svg){kind=small} 英屬香港、 臺灣 |
| 製作公司 | 香港電視廣播有限公司 |
| 無綫電視翡翠台首播 | |
| 播出日期 | 1992年10月5號-11月27號 |
| 播出時間 | 下面所有播出時間都係逢星期一至五播出： 10月5號-11月13號 19:35-20:35（連廣告） 11月16號-11月27號 20:50-21:50（連廣告） |
| 出面網頁 | |
| TVBI 官方網站 | |
《大時代》（英文：The Greed of Man）係無綫電視製作嘅家庭恩怨情仇劇集，兼無綫25周年台慶劇，1992年10月5號至11月27號期間播，共40集，監製韋家輝。主要演員有劉青雲、鄭少秋、郭藹明、周慧敏、藍潔瑛等等。當中方家所住嘅居屋，係現實中嘅馬鞍山恆安邨。
套劇於1992年10月喺翡翠台首播，後於1997年3月深夜重播，及至2006年3月底至5月喺無綫電視屬下星河頻道再度重播，並由同年6月起喺無綫經典台每周六連續播映五集。2015年4月21號喺翡翠台再次重播。
《大時代》以香港六十年代到九十年代嘅金融市場為主線背景，並以兩個家庭兩代之間嘅恩怨情仇為主幹而開展嘅故事，顯現當名利同人性糾埋一起，係幾咁有毀滅性同幾咁無奈。八十年代至九十年代，當時香港電視劇盛行製作一般被俗稱為「爭產劇」（或「爭鬥劇」）嘅劇種，內容多數係講述香港上流社會人士嘅利益鬥爭同埋是非恩怨，集數多、人物多、節奏明快而劇情非常複雜，但多數正邪分明。不過好似《大時代》噉橫跨三十年時空嘅爭鬥劇就唔多見。
套劇被視為香港爭鬥劇劇種發展嘅一個難以超越嘅高峰，亦係被公認為製作優秀嘅經典香港電視劇，更被譽為「港劇之王」。韋家輝後來製作嘅另一劇集《世紀之戰》亦被喻為《大時代》嘅姊妹作，但外界評論亦一致認為就算連韋家輝自己都無法超越當年自己所創下嘅奇蹟。
套劇甚至為香港本土用語加添一啲新詞彙。例如佢播出後至今，每逢股市大起大落，坊間總會用「大時代」一詞概括說明當時市況。另外，如果股市出現大升或大反彈，就稱之為「大奇跡日」。又如果股市下跌嗰時正值咁啱有鄭少秋參與嘅電視劇上演，坊間則以丁蟹效應一詞說明下跌原因。
簡介[編輯]
劇集講述丁蟹同方進新兩代人既恩怨，交織以方展博同龍紀文、阮梅之間嘅微妙三角戀愛。展博最後成為股票市場嘅高手，喺股票市場上同丁家決一死戰。
經典對白[編輯]
大時代造就咗好多經典對白，其中好多由丁蟹講出。
| 角色 | 對白（粵語讀音） |
| 陳萬賢 | 咁多人死，唔見你死？ |
| 趁地腍！ | |
| 我係呢度嘅皇帝，我係呢度嘅上帝！ | |
| 我冇咁嘅權，但我有咁嘅勢 | |
| 丁 蟹 | 做人要輸得起，唔衰得畀人睇架！唔好衰畀人睇！（字幕係「不要丟人現眼」） |
| 淫人妻子笑呵呵，妻人淫人爾若何？ | |
| 人善被人欺，馬善被人騎 | |
| 道義放兩旁，利字放中間。 | |
| 人善人欺天不欺，人惡人怕天不怕。 | |
| 黑社會有好人有壞人，你耍群啲好人唔好群啲壞人！（字幕係「你要跟好人，不要跟壞人」） | |
| 我打死人，但係冇做錯。 | |
| 呢件事的重點唔係我有冇殺人，而係浪子回頭金不换。 | |
| 法官大人，我唔認罪。 | |
| 跳呀，冚家剷！ | |
| 方進新 | 今日做得唔好，唔要。聽日做得唔好，唔要。做得好畀人工我。 |
| 你要做皇帝，我就嚟革你嘅命! | |
| 方展博 | （親眼目擊五蟹跳樓情景嗰陣講）一隻…兩隻…三隻…第四隻，仲爭隻丁蟹（第1及40集） |
| 阿爸…阿爸…阿爸死咗喇（第6集） | |
| 還咩還，你靠咩還，還到你成個冚家剷都還唔晒！（第8集） | |
| 我方展博要發達，我方展博要做億萬富豪……（重覆咁講） | |
| 玲姐 ... 媽咪 ... 我媽咪死咗啦！！（第36集） | |
| 我最希望呢就係親眼同丁蟹五父子送終！（在中環交易廣場外）（第38集） | |
| 葉 天 | 股票係人嘅遊戲 |
| 我係股神！I am the god of Wall Street！ |
趣事[編輯]
- 丁蟹一角原本諗住由萬梓良飾演[1]。
- 原本由艾威飾演丁益蟹一角，後嚟改由陶大宇飾演[2]。
- 原本由陶大宇飾演丁旺蟹一角，後嚟改由吳啟明飾演[2]。
- 原本由鄭浩南飾演丁孝蟹一角，後嚟改由邵仲衡飾演。
- 原本由邵仲衡飾演陳滔滔一角，後嚟改由林保怡飾演。
- 原本羅慧玲係方展博、方芳等人嘅親生阿媽，因為藍潔瑛覺得自己生唔出咁大個仔，所以劇本改為方展博、方芳等人嘅後母[3]。
- 周慧敏飾演慳家成性嘅阮梅，原型嚟自韋家輝嘅一位女性編劇朋友。
- 拍攝四蟹跳樓嗰陣，有途人以為係真嘅，因此報警[2]。
- 劇中方進新1973年揸車經過金鐘道，鏡頭拍攝到統一中心等建築，但嗰時呢啲建築重未起。
- 本劇有唔少綠葉分飾多個角色，例如游飈先後飾演報紙檔員工、出市代表。
衍生作品[編輯]
- 無綫電視冇同《大時代》拍續集，但亞洲電視搵咗韋家輝開拍《世紀之戰》，角色同劇情都似「大時代續集」。《世紀之戰》同樣由韋家輝監製，劉青雲、鄭少秋、郭藹明主演。
- 香港商業電台喺2006年推出粵語廣播劇《黃金少年》，其中Season 1同Season 2嘅主題曲叫咗《大大時代》並由譚詠麟主唱，由於呢首歌被部份網民視為有《大時代》嘅影子，有啲網民將《大時代》劇集入面片段剪咗出嚟，自製《大大時代》嘅MV[4][5]。
註[編輯]
- ↑ 〈【拆解大時代(1)】丁蟹原型真有其人 原屬意萬梓良演出〉. 2015-04-28. 原著喺2015-04-29歸檔. 喺2015-04-29搵到.
{{cite news}}: Cite has empty unknown parameter:|2=(help) - ↑ 2.0 2.1 2.2 〈不為人知的《大時代》〉. 蘋果日報. 2015-04-25. 原著喺2015-04-28歸檔. 喺2015-04-29搵到.
- ↑ 〈【拆解大時代(3)】玲姐原是青雲親母 藍潔瑛過唔到自己嗰關〉. 2015-04-28. 原著喺2015-04-29歸檔. 喺2015-04-29搵到.
{{cite news}}: Cite has empty unknown parameter:|2=(help) - ↑ 《大時代x大大時代》 (英文), 喺2021-10-06搵到
- ↑ 《大時代x大大時代2》 (英文), 喺2021-10-06搵到
出面網頁[編輯]
