小額錢債審裁處

小額錢債審裁處（英文：Small Claims Tribunal；縮寫：SCT）係香港司法機構之一，處理唔超過港幣五萬蚊嘅申索。雖然呢個審裁處都係法庭，但係規則同程序都比其他大部分香港法庭寬鬆。此外，訴訟各方都唔可以由律師代表出庭，一定要親自出席聆訊。當審裁官認為案件唔適合繼續喺小額錢債審裁處進行聆訊嘅時候，聆訊可能會隨時移交到其他法庭，包括勞資審裁處、土地審裁處、區域法院或高等法院繼續處理。而小額錢債審裁處嘅上訴案件會轉交到高等法院嘅原訟法庭。