想像共同體

想像共同體 (英文：Imagined Community)，或者叫想像嘅共同體，係美國學者本尼迪克特·安德森 (英文：Benedict Anderson) 為咗分析民族主義而創造嘅概念。想像嘅共同體比起現實嘅共同體唔一樣，因爲現實嘅共同體係建立喺成員之間每日面對面嘅互動。安德森相信民族係社會建構嘅共同體，而想像嘅共同體，就係知道自己係呢個團體嘅一部分嘅人，所想像出嚟嘅結構。

安德森嘅出名作品《想像的共同體》，深入咁說明咗呢個概念。呢本書首先喺1983年出版，跟住之後喺1991年同2006年分別再版。

起源

根據安德森嘅講法，想像共同體嘅創造唔能夠冇咗「印刷資本主義」。因為資本主義嘅企業家為咗最大限度咁增加銷售量，會用當地嘅地方語言嚟出版佢哋嘅書同各樣媒體。喺歐洲歷史之中，呢個過程取代咗以前以拉丁文為基礎嘅書面語，俾普羅大眾都能夠理解當中嘅内容。

結果，用當地語言嘅讀者，會通過共同嘅書寫，能夠同原本因為用唔同方言而唔能交流嘅人嚟溝通，所以浮現出共同嘅論述。安德森論證歐洲第一波嘅民族國家，就係由佢哋印刷自己嘅民族語言期間而形成。

民族主義

根據安德森嘅理論，民族主義出現嘅主要原因係大量白話讀寫嘅出現，令到用某啲書面語（例如拉丁文）嘅特權同重要性下跌。白話讀寫嘅運動，幫助咗廢除神權同埋世襲君主統治嘅觀念；印刷出版資本主義嘅出現（「資本主義嘅聚斂，同埋印刷技術、曆法、時計、同語言標準化，都喺出版嘅書同埋日報入面體現到」）—工業革命嘅開始，都對所有現象嘅發生有影響。

當安德森嘗試為民族主義嚟定義嘅時候，佢提出咗三個悖論：

1. 對民族嘅觀點：
   1. 歷史學家眼中，係客觀同埋現代
   2. 民族主義支持者眼中，係主觀同埋古代
2. 民族嘅特徵：
   1. 喺社會文化上，形式好普遍
   2. 喺具體表現上，係獨一無二嘅
3. 民族主義：
   1. 喺理論層面，非常缺乏同埋唔融貫
   2. 喺實際層面，非常有力量

安德森講到無名戰士墓嚟作為民族主義嘅例子。無論呢個墓係空嘅，抑或係有未知嘅殘骸，個別嘅民族都會支持呢類型嘅紀念館，並且聲稱呢個戰士係屬於佢哋嘅。無論呢個無名士兵嘅實際來源係點嚟，呢個民族已經將佢哋嘅想像共同體，寄託咗喺呢位無名士兵上面。

民族作為想像共同體

安德森定義民族為一個想像共同體。根據佢所指出嘅概念，民族「係想像嘅，因為即使一個民族最細嘅成員，佢哋從來都唔會聽過好多佢哋大部分嘅同胞嘅名，更加唔會見過面或者識佢哋。不過，佢哋兩個人嘅心目中，都依然會有佢哋係互相連結嘅呢個概念」。

共同體嘅成員可能永遠唔會面對面咁認識每一個成員，不過佢哋仍然能夠有類似嘅利益，亦都會意識到，佢哋都係屬於同一個民族嘅一份子。民族成員喺佢哋心目中，有一個好親密嘅心理意象，例如：當你嘅「想像共同體」參與類似奧運之類嘅大型事件嘅時候，你會同你其他嘅民族成員，分享作為同一個民族嘅感覺。 仲有，民族係一個共同體，因為「即使喺每個民族內部，有可能存在一啲普遍嘅唔平等同埋剝削，但係民族總係被想像為一個又深刻又平等嘅同志情誼。最終，喺過去兩個世紀之中，正正係呢種友愛關係，令到數以百萬計嘅人甘願成為民族，去屠殺其他人或者甘心咁去送死」。

內容同影響

安德森之所以提出佢嘅理論，係因為佢感覺無論係馬克思主義定係自由主義，呢啲理論都冇辦法充分咁解釋到民族主義。

安德森、Ernest Gellner、同埋 Eric Hobsbawm 都屬於「歷史主義」或者「現代主義」嘅民族主義學派，佢哋假定民族同民族主義係一個現代性嘅產物，而且係為咗某啲經濟同政治嘅目的，先至被創造出嚟。呢個學派同原生論嘅支持者對立，因為原生論係相信，民族係自從人類歷史嘅早期就已經存喺。想像共同體可以被睇成為一種社會建構論，同 Edward Said 嘅“想像地域”(英文：Imagined geographies) 概念相提並論。

安德森同 Gellner 或者 Hobsbawm 唔同，因為佢對民族主義嘅觀念並冇敵意。佢唔認為民族主義喺全球化嘅世界入面，係陳舊嘅事物，反為覺得民族主義之中嘅烏托邦元素係有價值嘅。

根據 Harald Bauder，想像共同體嘅概念喺今時今日嘅語境，仍然同民族國家嘅框架，有高度嘅關係。佢亦都明確咁表達同國內或者國外政策有關嘅認同，例如對於移民或者遷移政策嘅認同。根據 Euan Hague：「安德森提議民族作為想像共同體嘅概念，已經變成（喺佢書中所呈現嘅）回顧地域思想嘅標準。」。

即使「想像共同體」呢個術語喺被創造嘅時候，係特別用嚟講關於民族主義，但係佢哋依家已經被廣泛咁使用，幾乎同「利益共同體」嘅概念通用。例如，「想像共同體」亦都可以用嚟講唔同基於性傾向嘅共同體，又或者關於環保議題嘅覺醒。

出面網頁

• 本土香港──誰想像嘅共同體？ - 陳婉容Wayback Machine嘅版面存檔備份