陀斯卡拿

出自維基百科,自由嘅百科全書
(由托斯卡納大區跳轉過來)
跳去: 定向搵嘢

呢篇文章講嘅係現時嘅意大利大區。想搵古代嘅公國,睇下【陀斯卡拿大公國

陀斯卡拿
Toscana
Flag of Tuscany.svg
陀斯卡拿大區旗
Coat of arms of Tuscany.svg
陀斯卡拿大區徽
地圖
Tuscany in Italy.svg
概況
意大利 意大利
位置 意大利中部
首府 翡冷翠
面積 22990.18[1] km²
人口 387350[2](2013年12月31號)
人口密度 160[3]人/km²
省份 10
市鎮 287
區長 顏列哥·羅思(Enrico Rossi)
網站 官方網站

陀斯卡拿粵拼to4 si1 kaa1 naa4 [註 1]意大利文Toscana,國際音標:[toˈskana])係意大利中部嘅大區面積2萬2990平方公里[1]人口38萬7千幾[2],首府翡冷翠係意大利嘅文化首都。佢嘅西北面係利古里亞(Liguria),北面係霓美利亞-羅曼尼亞(Emilia-Romagna),東面係馬其(Marche)、浣布里亞(Umbria),南面係拉素(Lazio),西面係第勒尼安海

陀斯卡拿大區(包括前翡冷翠共和國同埋陀斯卡拿大公國)係意大利文藝復興嘅發源地,藝術遺產包括建築學、繪畫同埋雕塑。陀斯卡拿大區同時出名博物館多,而最出名嘅博物館係位於翡冷翠嘅烏菲茲美術館(Galleria degli Uffizi),而好多細城市都有博物館。目前陀斯卡拿境內有6處世界遺產:翡冷翠舊城區[4]思耶拿舊城區[5]皮恩扎舊城區[6]聖芝美尼亞諾舊城區[7]比薩主教座堂廣場[8]鄂查谷[9]

陀斯卡拿大區係列奧納多·達·芬奇(Leonardo da Vinci)、米開朗基羅(Michelangelo di Lodovico Buonarroti Simoni)同埋但丁(Dante Alighieri)出世嘅地方。現代意大利文嘅標準就係陀斯卡拿話(主要係翡冷翠話)加上一啲倫巴第話(主要係米蘭話)嘅詞彙。

陀斯卡拿大區出名嘅重有釀,境內重有120個自然保護區

歷史[編輯]

埃特魯里亞時期嘅青銅像「阿里佐嘅獅面龍尾羊(Chimera di Arezzo)」

「陀斯卡拿」爾個名最早喺公元十世紀出現,最早嘅辭源係拉丁文裡面對埃特魯里亞人嘅稱謂「圖斯其亞」(TVSCIA)。埃特魯里亞人喺公元前八世紀已經喺亞平寧半島建立徂文明,領域包括今日嘅陀斯卡拿同拉丁大區北部。公元前七世紀早期,希臘人喺亞平寧半島登徂陸,開始控制亞得里亞海嘅商貿活動。公元前六世紀末期,埃特魯里亞南邊嘅羅馬日益強大,而埃特魯里亞喺海上又唔夠希臘人打。公元前三世紀,羅馬開始向北部擴張,埃特魯里亞嘅城市一座一座恁被羅馬人攻陷,最後一座埃特魯里亞城市韋茲拿(埃特魯里亞話:Velzna;意大利文Volsinii)喺公元前265年陷落。雖然埃特魯里亞文明不復存在,但係佢依然留低徂大量嘅文化遺產。

羅馬人喺吞併徂埃特魯里亞之後,馬上大興土木建造徂四條由羅馬出發嘅大馬路:

  • 歐雷利亞大馬路(VIA AVRELIA),通往位於比薩嘅港口同位於熱那亞嘅海軍基地;
  • 古洛迪亞大馬路(VIA CLODIA),通往農神市(SATVRNIA);
  • 卡思亞大馬路(VIA CASSIA),通往今日嘅翡冷翠一帶;
  • 傅拉明尼亞大馬路(VIA FLAMINIA),通往翁布利亞
蒙迪列佐尼,一座保存得相當完好嘅中世紀陀斯卡拿城鎮。

值得注意嘅係,羅馬人修爾幾條大馬路嘅時候,特登避開澌埃特魯里亞人嘅聚居地,通過恁來推動埃特魯里亞嘅衰落。而大馬路沿途嘅好多羅馬人聚居地,後來都變成徂城市。

西羅馬帝國後期,羅馬北邊嘅遊牧民族開始大舉入侵,最終導致徂西羅馬帝國嘅滅亡。關於中世紀嘅陀斯卡拿,史籍記載好少,目前可以確定嘅係:到徂中世紀後期,陀斯卡拿已經進入徂城邦鼎立嘅時代。翡冷翠、思耶拿、比薩等大城邦為徂爭奪爾一區嘅話事權,不停恁吞併周邊嘅細城邦,同時又相互開戰。爾啲戰爭最初都係城邦嘅公民組建嘅武裝部隊打嘅。《神曲》嘅作者但丁自己就參加過翡冷翠聯軍攻打阿里佐嘅琴帕甸挪之戰Battaglia di Campaldino[10]但係後來由於傷亡太慘重,越來越多城邦開始請僱傭兵來代勞。爾啲相互硬撼嘅城邦大致可以分成兩派:支持教宗國嘅「歸甫派」(又稱「教宗派」,意大利文Guelfi)同支持神聖羅馬帝國嘅「傑卑連派」(又稱「皇帝派」,意大利文Ghibellini[11]。而喺翡冷翠嘅歸甫派後來又分裂成徂「白歸甫派」同「黑歸甫派」。喺華盧華伯爵沙夏勒Charles de Valois)支持嘅黑歸甫派奪得徂翡冷翠嘅政權之後,身為白歸甫嘅但丁被迫流亡,向佢從前嘅敵人傑卑連派尋求庇護。

雖然戰亂頻繁,後來又有導致近一半人口死於非命嘅黑死病,但係中世紀嘅陀斯卡拿都唔完全係七國咁亂嘅。相反,喺絲綢工業同商業嘅推動之下,陀斯卡拿嘅經濟相當繁榮。其中出名嘅例子就有來自比薩嘅商人兼數學家斐波拿慈Fibonacci),佢將阿拉伯數字同阿拉伯人保存嘅古代數學重新帶入陀斯卡拿,大大恁推動徂幾何學嘅發展。而幾何學嘅發展又大大恁推動徂建築學嘅發展,令到陀斯卡拿嘅建築師開始嘗試更大膽、更前衛嘅建築設計。此外,金融機構嘅再次出現,亦都為近現代會計學奠定徂基礎。

1434年,老哥思莫·德·美第奇Cosimo de' Medici, il Vecchio)成為翡冷翠共和國嘅實際首腦,從此開始徂美第奇家族對翡冷翠長達三個世紀嘅統治。同一時期,文藝復興運動首先喺陀斯卡拿開始徂,並且持續徂超過一個世紀。喺文藝復興期間,陀斯卡拿嘅經濟同藝術都進入徂黃金時代,其中翡冷翠更加係成為徂成個大區嘅經濟同文化中心。對此,美第奇家族功不可沒:老哥思莫在位嘅時候贊助徂當時窮到燶嘅建築師布魯尼利斯基Fillipo Brunelleschi),先後委任佢設計翡冷翠育嬰堂同埋聖母百花大教堂嘅穹頂;而佢個孫洛倫佐·德·美第奇Lorenzo de' Medici)就係個好活躍嘅中間人,介紹過贊助人俾包括波鐵車利Sandro Botticelli)、達芬奇安德烈·德·韋羅其奧Andrea del Verrocchio)、米開朗基羅等在內嘅藝術大師。另一方面,美第奇家族由老哥思莫時期就開始建立當時翡冷翠最大嘅美第奇家族圖書館,後來洛倫佐唔單止派人去東方大量搜尋古代書籍,重大量請人喺翡冷翠製作手抄本,大大恁推動徂知識嘅傳播。今日,美第奇家族圖書館收藏徂超過11000本手抄書同4500本早期嘅印刷書籍[12]。美第奇家族之所以有咁多錢,係因為老哥思莫個老頭佐雲尼·德·美第奇Giovanni de' Medici)建立徂美第奇銀行,積累徂大量嘅財富。可惜嘅係,洛倫佐統治嘅後期,美第奇銀行嘅好多海外分支都出現徂大量壞賬。洛倫佐喺1492年過徂身之後,文藝復興嘅中心好快就由翡冷翠轉移徂去羅馬

1494年,法國國王沙夏勒八世任命于格一世·德昂布華斯Hugues Ier d'Amboise)做陀斯卡拿總督,然後派兵入侵翡冷翠。喺法國大軍壓境嘅情況下,翡冷翠首腦彼耶羅二世·德·美第奇被迫出逃。道明會修士薩佛納羅拉Girolamo Savonarola)成為徂翡冷翠嘅實際首腦。薩佛納羅拉熱衷於建立一個類似伊斯蘭國嘅教權至上嘅國家,因此佢唔單止逐家逐戶搜集「世俗享樂物品」並全部燒毀,重嚴格限制商業發展。大量靠商業攈食嘅翡冷翠人好快就頂唔順薩佛納羅拉。1498年,喺一場民變之後,薩佛納羅拉終於投降,美第奇家族重新掌權。

1570年,哥思莫一世·德·美第奇Cosimo I de' Medici)自封陀斯卡拿大公,將翡冷翠共和國改為陀斯卡拿大公國。陀斯卡拿再次進入繁榮時期。1737年,美第奇家族嘅最後一任陀斯卡拿大公振·加斯通尼·德·美第奇喺無後裔嘅情況下過徂身,標誌著美第奇家族嘅統治終於劃上句號。根據1738年嘅《維也納和約》,哈布斯堡家族洛廷恩分支嘅洛廷恩公爵,後來當選神聖羅馬帝國皇帝嘅法蘭茨一世Franz I)繼任陀斯卡拿大公。

紀念陀斯卡拿併入薩丁尼亞王國嘅銘牌

之後哈布斯堡家族統治陀斯卡拿直到1800年拿破崙入侵意大利,推翻陀斯卡拿大公國,建立徂一個短命嘅「埃特魯里亞王國」(法文Royaume d'Étrurie意大利文Regno di Etruria),指定徂家族近親路多域哥一世意大利文Ludovico I di Etruria法文Louis Ier d'Étrurie)。1807年,拿破崙嘅法蘭西帝國正式吞併徂陀斯卡拿將陀斯卡拿分成徂厄挪(Arno)、地中海(Méditerranée)同翁布里亞(Ombrone)三個省,重指定由佢個埃莉莎·波拿巴Élisa Bonaparte)接任陀斯卡拿大公。拿破崙被反法同盟推翻徂之後,哈布斯堡家族恢復徂對陀斯卡拿嘅統治,但係六年之後嘅1860年,徂哈布斯堡家族嘅統治就被人推翻徂。三月,陀斯卡拿、帕爾馬、摩德納同羅曼尼亞通過公投決定加入由薩伏亞王朝統治嘅薩丁尼亞王國Regno di Sardegna),成為一個大區。1865年,根據薩丁尼亞王國同拿破崙三世之間嘅協議,翡冷翠取代都靈,成為徂薩丁尼亞王國嘅新首都,直到1870年薩丁尼亞王國征服教宗國,遷都羅馬為止。

政治[編輯]

現任區長顏列哥·羅思

陀斯卡拿嘅大區級立法機關係陀斯卡拿大區議事會意大利文Consiglio regionale della Toscana),由55名通過最大餘額法選出嘅民選議員組成。大區議事會嘅開會地點係翡冷翠加富爾道嘅卡樸尼-哥禾尼宮Palazzo Capponi-Covoni)。

根據《陀斯卡拿大區法》(Statuto della Regione Toscana),陀斯卡拿大區議事會嘅職能包括[13]

  • 審議適用與大區內嘅法例,並推動法例嘅施行;
  • 執行《意大利共和國憲法》賦予嘅其他職能。

陀斯卡拿大區議事會目前嘅議席分佈係:

黨派 獲得票數 獲得議席[14]
顏列哥·羅思(「民主陀斯卡拿」黨派聯盟)
民主黨-陀斯卡拿改革派
Partito Democratico - Riformisti Toscani
641214 24
公義意大利黨[暫譯]
Italia dei Valori
143194 5
左派聯合會綠色聯合會[暫譯]
Federazione della Sinistra - Verdi
80.017 3
摩妮卡·法顏茲(「為陀斯卡拿」黨派聯盟)
自由人民黨
Il Popolo della Libertà
412118 16
北方聯盟
Lega Nord
98523 3
法蘭車斯哥·波思
中間派聯盟
Unione di Centro
72548 2

注意:以上祇列出獲得議席嘅黨派。

行政區劃[編輯]

Map of region of Tuscany, Italy, with provinces-it.svg

陀斯卡拿下轄九個省同一個廣域市

省名 面積
(km²)
下轄市鎮數 省府
粵語 意大利文
阿里佐省 Provincia di Arezzo 3.235 37 阿里佐
翡冷翠廣域市 Provincia di Firenze 3.514 42 翡冷翠
古羅些托省 Provincia di Grosseto 4.504 28 古羅些托
列禾挪省 Provincia di Livorno 1.211 20 列禾挪
盧卡省 Provincia di Lucca 1.773 34 盧卡
馬沙與卡拉拉省 Provincia di Massa e Carrara 1.156 17 馬沙
比薩省 Provincia di Pisa 2.444 37 比薩
皮斯托亞省 Provincia di Pistoia 965 22 皮斯托亞
普拉托省 Provincia di Prato 365 7 普拉托
思耶拿省 Provincia di Siena 3.821 36 思耶拿

[編輯]

  1. 粵名「陀斯卡拿」係廣東話音譯自意大利文嘅Toscana。目前中文資料有兩個常見譯名:一個係普通話由意大利文度音譯爲托斯卡納,遞個係國語由英文度音譯爲托斯卡尼(英文:Tuscany)。呢啲名後面可以加後綴「大區」。

參考[編輯]

  1. 1.0 1.1 意大利國家統計研究所(ISTAT). Tavola: Superficie territoriale (Kmq) - Toscana (dettaglio provinciale) - Censimento 2001.(土地面積─陀斯卡拿【分省計】─2001年統計). 2001年. 喺2015年6月13號搵到; (義大利文). 
  2. 2.0 2.1 Popolazione straniera residente in Toscana: dati 2013. 陀斯卡拿政府. 2015年1月27號. 喺2015年6月4號搵到; (義大利文). 
  3. 據英文維基百科。查詢日:2015年6月13號。
  4. Centre historique de Florence. 聯合國教科文組織. . 喺2015-06-04搵到;. 
  5. Centre historique de Sienne. 聯合國教科文組織. . 喺2015-06-04搵到;. 
  6. Centre historique de la ville de Pienza. 聯合國教科文組織. . 喺2015-06-04搵到;. 
  7. Centre historique de San Gimignano. 聯合國教科文組織. . 喺2015-06-04搵到;. 
  8. Piazza del Duomo à Pise. 聯合國教科文組織. . 喺2015-06-04搵到;. 
  9. Vallée de l'Orcia. 聯合國教科文組織. . 喺2015-06-04搵到;. 
  10. Herbert L. Oerter, 《Campaldino, 1289,》 ,載於《Speculum, 43:3 (1968), 429–50。
  11. Jacques Heers, « Guelfes et Gibelins », Clio.fr
  12. Medicean-Laurentian Library. Encyclopædia Britannica. 2007. 
  13. 陀斯卡拿大區政府. II - Gli organi della Regione Statuto della Regione Toscana. . 喺16-7-2010搵到;. 
  14. Elezioni Regionali 28-29 marzo 2010: Toscana. 意大利《共和國報》. 2010-03-29. 喺2015-06-08搵到;.