畫畫

出自維基百科，自由嘅百科全書
(由繪畫跳轉過嚟)
跳去導覽 跳去搵嘢
多幅出名嘅畫作：

畫畫（粵拼：waak6 waa2；英文：painting）狹義上指有意噉用架生將有顏色嘅物料鋪上去一個固體嘅表面上，用意好多時係想製作出一幅有藝術價值嘅圖像。畫畫架生可以包括毛筆、畫刷甚至係畫畫人嘅手，有色物料就可以包括油彩同水彩等多種嘅人造或者自然材料[1][2]。再廣義上啲噉講嘅話，畫畫可以定義成「畫畫人有意噉創造一幅二維（2D）嘅圖像」[3]－後者呢個定義可以包括埋用電腦畫畫嘅做法。

畫畫係一門舉足輕重嘅視覺藝術：一方面，畫畫對好多人嚟講都係一樣本質上有趣嘅活動－好多人都會以畫畫同賞畫為喜好[4]，而且佢哋當中有好多都會就畫畫相關嘅技巧以及理論，作出思考同書寫文獻（可以睇吓視藝設計原則）[5]；另一方面，畫又對好多其他類型嘅創作品有用，例如漫畫呢種創作品就要求作者又識作故仔又識畫畫，而插圖（illustration）就係泛指為咗輔助另外一啲出版物或者創作品（故仔書等）而畫嘅畫[6]。

畫畫呢家嘢歷史悠久：人類學家喺法國南部嘅肖維岩洞（Chauvet-Pont-d'Arc Cave）搵到歷史超過 30,000 年嘅壁畫[7]；古埃及、古希臘同夏商[8]等嘅古代文明冚唪唥都有畫畫嘅傳統[9]；而人類喺打後嘅歷史上一路都有畫畫，喺畫畫嘅技術同風格上都有不斷係噉作出創新，好似係粵畫派噉，就係喺 19 世紀尾結合唐人國畫同西人印象派（impressionism）而生嘅流派[10]。呢啲創新令廿一世紀世界各地唔同族群有唔同嘅畫畫風格，亦令畫畫成為咗一門多樣化嘅藝術[11]。

基本概念[編輯]

一塊調色板上面有唔同顏色嘅顏料。
睇埋：藝術元素同埋繪畫理論

顏色[編輯]

內文： 顏色

顏色係一幅畫最基本最底層嘅組成部份：光係種電磁波（EM wave），會由光源射落一幅畫嗰度，而幅畫嘅表面會反射一部份嘅光（可以睇光學）；呢啲光有一部份會進入睇嗰個人對眼嗰度，眼嘅視網膜（retina）上面嘅感光細胞會對光有反應，當中「邊啲感光細胞反應零舍勁」就視乎光嘅頻率而定，而顏色查實就係個腦對感知到嘅光嘅頻率嘅判定（可以睇視知覺）[12][13]；同時，唔同化學成份嘅物質喺「反射乜嘢頻率嘅光」上有差異，所以唔同化學成份嘅物質望落會有唔同嘅顏色，一個畫畫嘅人要做嘅，就係有技巧噉將－因為化學成份唔同而有唔同色嘅－顏料擺上去一個表面嗰度，令個表面展現出佢想要畫嘅圖像[14]。

三大數值[編輯]

睇埋：色彩理論

喺色彩理論（colour theory）上，一幅畫可以想像成一大柞點點，每一點都有特定嘅顏色，而每一點嘅顏色可以用三個數值描述[15]：

  • 色相（hue）指一隻色有幾似俾人描繪成紅、橙、黃、綠、藍或者紫嘅顏色；色相值可以用一個單一數值嚟表示－色相可以想像成一個輪，輪上面有齊典型嘅紅橙黃綠藍紫六色，以及係呢六色之間嘅交界色，一隻色嘅色相就係佢喺呢個輪上面位於邊個「角度」，例如下圖嗰個色相輪入面位於 0 度（個色輪最上嗰一格）嘅色就係典型嘅黃色。原則上，唔同顏色之間並冇明確嘅分界線－一隻色喺色相輪上面嘅可能角度係連續性嘅，可以係 270 度、270.01 度、270.0001 度... 等等[16]。
  • 彩度（saturation）大致上係指一隻色有幾「鮮艷」；假如亮度不變，一柞彩度低嘅色會顯得似一片片唔同深淺度嘅灰白色，而一柞彩度高嘅色就會偏離灰白，望落會好鮮艷。喺實際應用上，彩度都係可以用單一嘅數字嚟表示；下圖中間嗰個色彩輪就表達色相得嚟又包含埋彩度－愈近中心點嘅色就彩度愈低（似灰色）[17]。
  • 亮值（lightness）係指一隻色有幾「光」；假設第啲因素不變，亮值高嘅顏色會接近白色，而亮值低嘅顏色會接近黑色。喺實際應用上，亮值都係可以用單一嘅數字嚟表示；例如下圖最右手邊嗰個色彩輪就表示彩度同亮值－左表示彩度高嘅藍色、右表示彩度高嘅黃色、上表示亮值高嘅色、而下表示亮值低嘅色[18]。
色相輪（左）、彩度輪（中）同埋亮值輪（右）

筆觸[編輯]

一個人用畫筆掃過一張紙嘅表面。
睇埋：畫筆同埋毛筆

喺評鑑一幅畫嗰陣，筆觸（paint stroke，簡稱 stroke）係一個成日提到嘅字眼。筆觸意思係指將一支畫畫工具－好似係畫筆或者毛筆噉－掂住畫嘅表面一掃留低嘅痕跡[19]。一般嚟講，一個有意認真學畫畫嘅人需要學識唔同嘅筆會造成乜嘢筆觸，即係要知道每一種類型嘅筆打戙打橫掃會造成點樣嘅筆觸，並且用呢樣知識創造出佢想要嘅圖像，而一個畫畫高手仲會能夠齋靠睇其他畫畫人嘅完成品嘅筆觸就估到佢哋用咗乜嘢筆法[20][21]。

以西洋畫筆為例，一個典型嘅西洋畫家最少會用到以下呢啲種類嘅畫筆，筆頭形狀唔同嘅筆會造成唔同嘅筆觸[22][23]：

  • Round：支筆啲毛又尖又細，最適合攞嚟畫細節；
  • Flat：支筆啲毛長，可以用嚟又快又平均噉畫一大片顏色，例如畫人嘅長頭髮；
  • Bright：比起平畫筆短啲軟啲，適合短又受控嘅筆觸；
  • Filbert：筆尖細過 flat 同 bright，平衡畫大片顏色同畫細節嘢嘅能力；
  • Fan：好似一把扇噉形，用 fan 打橫掃可以做到又幼又長嘅筆觸，可以攞嚟畫樹等嘅嘢；
  • Angle：筆尖啲愈右愈短嘅毛，可以攞嚟畫細節又可以處理大片顏色；
  • Mop：筆尖又大又圓，成日俾人攞嚟喺顏料乾咗之後再加層顏料上去；
  • Rigger：一種極尖極細嘅筆，傳統俾西人畫家用嚟畫船上嘅 rigging 而得名。

... 等等。順帶一提，除咗按筆頭形狀，畫筆仲可以按「筆頭用乜嘢毛整」或者筆桿等嘅基準分類。

Brushtypes.jpg

靚[編輯]

內文： 靚

靚（beauty）係一種感受。呢種感受可以係由一個人、一隻動物、一個地方以至一件死物引起嘅，一個人喺感知到佢覺得係靚嘅事物嗰陣，會有一股快感同滿足感，而一位畫家通常希望欣賞佢幅畫嘅人會覺得幅畫靚。美學（aesthetics）係藝術同哲學上嘅一個領域，專門思考「乜嘢係靚？」呢一條問題，而呢方面嘅學者普遍認為，「靚」呢個概念係有可能定義嘅[24]：事實證明咗，靚有一定嘅主觀性，唔同族群以至唔同人對靚嘅睇法可以好唔同；不過靚亦明顯有一定嘅客觀性－因為事實表明咗，有好多事物都係俾多數人覺得佢哋靚嘅，美學其中一個最重要嘅目標就係想知到底呢啲「多數人都覺得靚」嘅特性係乜，而包括畫家在內嘅藝術工作者就會運用呢啲知識，務求整出俾多數人覺得係靚嘅作品[25][26]。

俾好多人覺得係靚嘅事物
曙暮光[27]
 
星雲[28]
 
多種嘅蝴蝶[註 1]
 

構圖[編輯]

維梅爾嘅《畫畫嘅藝術》；呢幅畫成日都俾人攞嚟做構圖嘅基本例子。
內文： 構圖

一幅畫作嘅構圖（visual composition）係指嗰幅畫當中唔同物件嘅位置，包括咗每件物件相對個框嘅位置以及彼此之間嘅相對位置。一幅畫嘅表面上由畫家加落去嘅顏色會結合形成各種嘅物件同特性，例如：

  • 線、
  • 形狀、
  • 肌理，指物件表面嘅觸感、同埋
  • 空間－物件所霸嘅空間（正空間）同物件之間嘅空間（負空間）... 等等；

呢啲特性決定睇畫嘅人對「幅畫入面有啲乜嘢物體」嘅判斷，而畫家做嘅嘢就係諗藝術元素嘅位置要點安排，並且賦予幅作品結構同埋表達佢嘅意圖[29][30]。

以荷蘭畫家維梅爾（Johannes Vermeer）嘅其中一幅出名作品《畫畫嘅藝術》（The Art of Painting；附圖）為例，《畫畫嘅藝術》個構圖簡單講如下：圖中主要有「塊掛毯」、「個畫家」同「個模特兒」等三件物件，呢幾件物件都係分別由某一柞有顏色嘅點點組成；當中個畫家線條上大致成垂直（線），佔嘅空間大致成一個四方形（形狀），佢著住嘅衫望落似布質（肌理），佢同個模特兒之間有一定嘅空位（空間），位置上喺塊掛毯之後同個模特兒之前（相對第啲元素嘅位置），離右邊界距離大約係成幅畫闊度嘅 1/3（相對於個框嘅位置）[31]。

節奏[編輯]

莫奈嘅《四樖樹》
內文： 節奏

節奏（rhythm）係構圖嘅一個重要考量[32][33]：最廣義上嚟講，節奏可以指「一連串以特定規律對比嘅刺激」；喺音樂上，節奏會係指每隔一段時間就有一串具有某啲特定性質嘅聲出現，而喺視藝上，節奏可以想像成「定時通過空間移動」（timed movement through space）[34]－例如一棟建築物有若干個窗，而且啲窗之間彼此距離一致（第一個窗同第二個窗之間嘅距離，等如第二個窗同第三個窗之間嘅... 如此類推），又或者係一幅畫入面畫咗四樖樹，而嗰四樖樹彼此之間嘅距離一致，於是睇嗰份作品嘅人如果係以恆定嘅速度移動佢嘅目光嘅話，就會每隔一段特定長度嘅時間見到其中一個元素，而呢點能夠造到一般俾人覺得靚嘅美學效果[35][36]。

例如係法國印象派始祖莫奈（Claude Monet）嘅《白楊樹》系列當中嘅《四樖樹》（The Four Trees；1891 年）噉，喺呢幅畫入面有四樖白楊樹，佢哋之間相隔大致恆定嘅距離（節奏－物件之間以恆定嘅規律成對比），同時四樖樹之間喺距離上有少量嘅不一致，令啲樹望落自然，而且背景嘅物件唔跟節奏，反而更強調四樖樹所形成嘅節奏[37]。

順帶一提，亦有藝術界嘅人指出，節奏使唔使完全一致視乎畫中嘅物件係人造定自然：佢哋認為，自然物件多數都係有些少不規律性嘅，所以畫自然物件嗰陣，節奏要帶些少不規律性先會順眼（例如《四樖樹》當中嗰四樖樹之間嘅距離就唔完全一致）；相比之下，好似建築物呢啲人造物件就大可以有完美前後一致嘅幾何性規律[38][註 2]，例如係 19 世紀法國畫家佐治·秀拉（Georges-Pierre Seurat）嘅作品《Parade de cirque》（粵譯：馬戲團遊行）噉，畫中「表演者頭上嘅燈光」以及「表演者企嘅位置」有相當高嘅規律性，而且構圖上充滿咗直線，反映咗幅畫所描繪嘅係人造物體[39]。

  • 《Parade de cirque》

黃金比例[編輯]

黃金比例嘅圖解
內文： 黃金比例

"Without Mathematics There is No Art." （「冇咗數學，就唔會有藝術。」）

Luca Pacioli （盧卡·帕西奧利）

藝術界有對構圖嘅數學特性作出思考。有唔少藝術方面嘅工作者同學者認為，構圖上展示某啲數學特性嘅畫會零舍有美感，而黃金比例（golden ratio；）就係一個成日俾人指同美感有重大關係嘅數值：想像有兩個數值 同 ，；如果「 同 之間嘅比例」等同「 同 之間嘅比例」嘅話， 同 就算係成黃金比例，即係話[40]：

有好多藝術界嘅工作者相信，一幅靚嘅畫構圖需要喺某啲方面展示黃金比例；而文藝復興時期（Renaissance）嘅意大利藝術家廣泛噉將黃金比例用喺佢哋作品嘅構圖當中[41]，以達文西（Da Vinci）舉世聞名嘅作品《蒙娜麗莎》（Mona Lisa；1500 年代）為例[42][43]：

黃金長方形嘅圖解；圖中嘅 同 成黃金比例。 
《蒙娜麗莎》全圖
 
蒙娜麗莎塊面俾人指係運用咗黃金長方形嘅原理。 

按顏料分類[編輯]

要將畫分類，其中一種最常用嘅基準係按用嘅顏料嚟分。顏料泛指一啲完全或者局部唔溶於水嘅有色物料，而唔同嘅顏料喺黏度同溶解度等嘅物理特性上都有差異，畫家揀起顏料用上嚟需要相當有技巧，而好多畫家都會有偏好用嘅顏料[14]。

油畫[編輯]

內文： 油畫

油畫（oil painting）泛指用由乾性油（drying oil）溶嘅顏料畫出嚟嘅畫。乾性油係指一啲一接觸到空氣就會開始乾同變硬嘅油，包括亞麻籽油同紅花籽油等等。喺畫油畫嗰陣，畫畫人通常會先用鉛筆喺塊畫布上面畫出預期中幅畫嘅大致形態，然後佢要將油彩由密封嘅容器唧落去一塊調色板上面，並且嘗試喺啲油彩變硬之前，用畫筆或者畫刀將油彩油落去塊畫布上適當嘅位置嗰度，最後等啲油彩乾同變硬[44]。

油畫歷史相當悠久：油畫有得追溯到公元 7 世紀嘅阿富汗[45]；歐洲人最遲喺 12 世紀經已有廣泛噉使用油彩，而喺文藝復興時代期間，油彩仲成為咗歐洲畫嘅主流，例如舉世聞名嘅《蒙娜麗莎》就係一幅喺 16 世紀初畫好嘅油畫；喺打後嗰幾個世紀，西人一路都有用油彩畫畫，好似係印象派同表現主義等 19 世紀同廿世紀初嘅歐洲藝術運動都出咗多幅油畫名作－令到油畫成為咗西洋畫嘅一個代表[44][46]。

以下係一啲出名嘅油畫作品：

水彩畫[編輯]

內文： 水彩畫

水彩畫係指用水彩（water colour；溶喺水入面嘅顏料）畫出嚟嘅畫，現代嘅水彩畫通常會畫喺一啲特製嘅紙（呢啲紙對水比較有抵抗力）上面。呢種畫歷史好悠久－遠至古埃及經已有人喺度用水彩畫畫[47]，而中世紀嘅歐洲同同期嘅東亞都有用水彩畫畫嘅做法。藝術史學家一般認為，水彩係喺文藝復興時期中後嘅歐洲先正式興起嘅[48]，當時有德國嘅丟勒（德文：Albrecht Dürer）等嘅藝術家採用水彩嚟畫佢哋嘅作品，令水彩開始受到藝術界嘅注意[49]。

水彩喺特性上同油彩有明顯差異：同油彩比起嚟，水彩乾得快好多，所以一支沾咗水彩嘅畫筆難以攞嚟畫大面積嘅顏色，即係話水彩通常唔能夠攞嚟畫大幅嘅作品，只能夠攞嚟畫一啲小品或者做速寫（croquis；指喺幾分鐘內畫好一件目標物件嘅大致外形）等嘅工作；不過雖然佢有啲噉嘅限制，水彩又能夠做到啲顏色半透明嘅效果，可以攞嚟用一層顏色覆蓋下一層（呢點油彩難以做到），而呢點俾好多人覺得有獨特嘅美感，亦令水彩成為咗唔少畫畫愛好者偏好嘅顏料[50]。

水墨畫[編輯]

內文： 水墨畫

水墨畫（日文：水墨画，suiboku-ga；韓文：수묵화，sumukhwa；英文：ink wash painting）係指用墨汁畫出嚟嘅畫，墨汁係將墨放喺墨硯嗰度用水研磨形成嘅。水墨畫係狹義上嘅中國畫，亦可以話係傳統東亞畫藝嘅一個代表，喺唐朝嗰時經已存在，打後喺宋朝時期進入全盛，並且傳到去全東亞嘅各個地區－包括日本同朝鮮半島在內[51][52]。就算到咗廿一世紀，水墨畫仲有人喺度畫，例如香港都有本地畫家專門畫水墨畫[53]。

水墨畫背後展現咗道家同佛家嘅思想：一般嚟講，水墨畫並唔追求完美噉捕捉事物嘅外表－呢點同中世紀以及文藝復興時期嘅歐洲畫藝大相逕庭（睇埋寫實主義），反而係想要捕捉事物嘅「靈魂」；喺一位水墨畫家畫一隻馬嗰陣，佢要做嘅嘢係理解隻馬嘅脾性，並且畫出一幅令人感受到呢樣嘢嘅圖像，而唔係要盡可能準確噉畫出隻馬嘅骨同肌肉；而喺畫一朵花嗰陣，水墨畫家唔使完美噉配合朵花嘅花瓣數量或者顏色，而係要用畫嘅線條等嘅特性畫出朵花嘅「香」[51][52]。

炭筆畫[編輯]

內文： 炭筆畫

炭筆畫（charcoal painting）係指用炭畫嘅畫，早喺 28,000 年前經已有人喺度畫[54]：現代嘅炭筆係由炭加埋結合劑成形嘅筆－炭係一種軟嘅材料，容易因為摩擦力而剝落，用炭筆畫畫嘅人會攞住支炭筆有技巧噉掃過一張（通常）白紙嘅表面，等支筆留低一條條深灰同黑色嘅痕跡，靠噉嚟畫出想要嘅圖像[55]。

炭筆畫有一套獨特嘅藝術性同技巧：炭筆用唔同深淺度嘅灰同黑色形成影像令炭筆畫做到油畫等難以做到嘅效果；而同粉彩等嘅固體顏料相同嘅係，炭筆留低嘅痕跡容易剝落，所以想長期保存炭筆畫嘅人通常會喺幅畫上面噴固定劑或者用膠套封住幅畫[55][56]。

粉彩畫[編輯]

內文： 粉彩畫

粉彩畫係指用粉彩（pastel）畫嘅畫。乾粉彩係一碌碌將乾、處於粉狀嘅顏料用結合劑（binder）固定成一嚿形成嘅棒（蠟筆）－粉彩係固體狀嘅，所以喺油粉彩嗰陣唔係用支畫筆沾，而係將碌粉彩磨落去畫嘅表面上，等顏料因為磨擦力由支棒嗰度脫落，並且黐上去塊表面，形成有色彩嘅圖案[57]。粉彩源於 15 世紀，而喺打後嗰幾個世紀，西人一路都有畫粉彩畫，都出咗唔少名作[58]。

乾粉彩可以整出不亞於第啲顏料嘅鮮艷色彩，不過因為乾粉彩呈固體粉狀（相對於處於液體狀態嘅油彩同水彩），所以喺繪畫技巧同畫作保存方法上同油畫以及水彩畫相當唔同：乾粉彩表面比較脆弱容易剝落，所以通常要加塊玻璃喺畫嘅表面先至容易保存，亦有做法係噴一浸固定劑（fixative）喺幅畫嘅表面上；不過只要做咗呢啲保存工作，一幅乾粉彩畫可以保存到成幾個世紀都唔變[57]；另一方面，因為乾粉彩呈粉狀，所以如果支蠟筆嘅結合劑唔夠勁，可能會搞到畫畫人一路畫、一路吸入蠟筆嘅顏料，而呢啲顏料好多時有輕微嘅毒性，長遠嚟講可以對畫畫人嘅呼吸系統健康造成危害，所以專門畫乾粉彩嘅畫畫人通常都要做健康上嘅防護措施[59]。

濕壁畫[編輯]

內文： 濕壁畫

濕壁畫（fresco，眾數係「frescos」或者「frescoes」）係一類嘅壁畫做法，涉及喺啱啱鋪好嘅建築石膏上面畫圖案。畫濕壁畫會用到將水（「濕」）同顏料溝埋一齊，然後再混和建築石膏，用呢啲有色嘅物料喺牆或者天花板畫出想要嘅圖案，然後等建築石膏乾嗮之後，啲圖案就會變成棟建築物嘅牆或者天花板嘅一部份。畫得又大又精美嘅濕壁畫常見於豪華建築物嘅裝飾[60]。

濕壁畫同文藝復興時期嘅意大利好有啦掕：濕壁畫極之古老，早喺公元前 3,000 年嘅古埃及經已存在[61]，而公元前嘅印度（可以睇吓阿旃陀石窟）同古希臘都有濕壁畫；不過文藝復興時期嘅意大利大規模噉採用濕壁畫嘅做法，出咗多幅喺現代廣為人知嘅作品，令到好多人都會將濕壁畫同文藝復興時期嘅意大利藝術聯想埋一齊。事實係，濕壁畫嘅英文名就係源自意大利文「fresco」－即係意大利文入面「新鮮出爐」噉解[60][62]。可以睇埋文藝復興建築。

熱蠟畫[編輯]

內文： 熱蠟畫

熱蠟畫（hot wax painting / encaustic painting）係指將加熱咗成液體狀態嘅蜂蠟（beeswax）同粉狀顏料溝埋形成有色熱蠟，再用呢啲有色熱蠟畫出嚟嘅畫，亦有熱蠟畫會採用蜂蠟以外嘅蠟或者喺啲蠟嗰度加入少少亞麻籽油等嘅物料。熱蠟畫通常會係畫喺木頭、石頭或者畫布上面，一般會用畫刀等金屬架生或者特製嘅畫筆嚟畫上去個表面嗰度，畫好想要嘅圖案之後，畫畫人就會等啲蠟慢慢冷卻變硬，形成一幅完成作品。熱蠟畫通常都需要用好多特製嘅架生先至可以畫得到，所以唔係咁常見[63]。

熱蠟畫出名在於佢嘅古老性：熱蠟畫嘅其中一個英文名「encaustic painting」源自希臘文嘅「enkaustikos」，意思係「燒入去」噉解[64]；事實係，熱蠟畫嘅做法早喺公元 1 世紀經已有古羅馬人喺度用[65]，而好多 1 至 3 世紀嘅古埃及同古羅馬文物上都有用熱蠟方法畫出嚟嘅圖像[66]。喺中世紀嗰陣，熱蠟畫喺東歐（睇埋拜占庭帝國）同埋中東嘅某啲地區一路都有相當嘅影響力。而呢種獨特嘅畫畫方式仲喺 1990 年代開始喺西方世界重新崛起[67]。

第啲顏料[編輯]

... 等等。

數碼繪畫[編輯]

內文： 數碼繪畫

數碼繪畫（digital painting）係指用電腦方法創造畫作。一般嚟講，數碼繪畫嘅做法係，畫畫人會用一啲電子架生（可以睇吓數碼繪圖板；graphics tablet）控制住部電腦，用部電腦嘅圖像軟件畫出想要嘅圖像，然後再將呢啲訊息傳去打印機等嘅機械嗰度，等部打印機將顏料加落去紙等嘅表面上高，而廿一世紀嘅圖像軟件仲有好多技術能夠造出似油畫或者水彩畫噉嘅筆觸等嘅效果[68]。

藝術界一般會分清楚數碼繪畫同演算法藝術（algorithm art）：一般認為，呢兩個概念嘅分別在於，演算法藝術所指嘅係個用家指定一段演算法嚟教部電腦自己畫一幅圖像，而數碼繪畫指嘅係幅圖像嘅線同點由畫畫人指定，電腦只係負責對畫畫人指定「邊點要有乜嘢顏色」嘅輸入俾反應[68]。

一塊數碼繪圖板

按地區分類[編輯]

睇埋：藝術風格

西洋畫[編輯]

內文： 西洋畫

西洋畫（western painting）泛指西方世界－廣義上可以包嗮成個歐洲，狹義上淨係包括西歐同埋英國以外嘅英文圈－嘅畫藝傳統。西洋畫嘅歷史最少可以追溯到去古埃及、古希臘同古羅馬呢三個對歐洲文明影響深遠嘅古文明。喺中世紀（medieval age；5 至 15 世紀）以至文藝復興時期，歐洲畫家一路都有受到皇室同貴族嘅擁護，負責做幫皇室貴族畫畫像或者畫畫裝飾宮殿等嘅工作[69]；喺文藝復興時期之後，啲人嘅教育水平提升，開始多咗中產階級嘅人請畫家畫畫；而到咗浪漫主義（romanticism）盛行嘅 19 世紀，歐美畫家仲開始有「為藝術而藝術」（art for art's sake）嘅風氣，建立咗印象派等多個到咗廿一世紀都仲係相當有影響力嘅藝術運動（art movement）。呢套畫畫傳統到咗廿一世紀都仲有好多人傳承緊，仲因為美國等西方國家嘅強大影響力而傳到全世界[70]。

寫實主義[編輯]

內文： 寫實主義

寫實主義（realism）係 1850 年代喺法國盛行嘅一種藝術運動：主張畫應該盡可能追求準確噉描述現實，避免喺作品當中加入任何誇大嘅線條、唔自然嘅色彩或者超自然元素等唔真實嘅嘢，所以寫實主義嘅畫作好多時望落甚至會似相多過似畫。呢啲特色令寫實主義藝術同（例如）成日用誇張扭曲線條嘅表現主義（睇下面）或者主張虛幻同不真實嘅超現實主義（睇下面）成強烈嘅對比[71]。寫實主義喺 19 世紀嘅全盛被認為係對浪漫主義嘅一種反叛：源自 18 世紀尾嘅浪漫主義當時主導咗法國畫界，追求以強烈嘅情感做藝術品嘅主導－而寫實主義就反而係追求客觀同真實；及後寫實主義仲有影響法國嘅第啲藝術同擴展去喺正法國隔離、而且同樣講羅曼語族語言嘅意大利嗰度，對打後嘅意大利藝術有一定嘅影響[72][73]。

一件藝術品可以淨係局部噉跟從寫實主義：例如一幅畫作可以強調喺題材同圖像上都要真實，幅作品明顯睇得出係畫緊一啲真實存在嘅嘢，而且個畫家會想盡力務求自己幅作品似一幅相，呢個特點喺好多 19 世紀嘅歐洲人像畫身上都可以睇到；另一方面，一個藝術家又可能會追求圖像上真實，但題材唔真實，例如幅作品畫神話入面嘅故事，但畫面依然追求畫到好似一幅相噉[71]。

印象派[編輯]

內文： 印象派

印象派（impressionism）係喺 19 世紀尾法國畫界開展嘅一場藝術運動。呢個門派嘅畫作有以下嘅特徵[74][75]：

  • 用幼細、但明顯睇得到嘅筆觸；
  • 構圖開放，放寬咗「主題」同「背景」之間嘅界線；
  • 平凡嘅題材，興畫日常生活嘅景象，相對於傳統歐洲畫藝偏好以歷史大事或者聖經故仔等「宏大」嘅嘢做題材；
  • 異常嘅視角；
  • 以物件嘅郁動作為人類感知嘅重要部份，好多時會用濛濛地嘅圖像代表物件嘅郁動－畫家嘗試捕捉望到物件嗰一剎那所見到嘅影像（「印象」）；
  • 強調準確噉描繪光嘅變化－印象派畫家受到當時物理學上光學知識嘅演進影響，反對當時歐洲畫家淨係喺室內畫畫嘅傳統，會走去室外畫畫，嘗試了解喺自然光下嘅物件嘅色水應該係點嘅。

以法國畫家莫奈（Claude Monet）喺 1874 年畫嘅油畫《日出印象》（法文：Impression, soleil levant）為例，日出印象廣泛噉俾人認同係印象派嘅代表作，呢幅畫題材好平凡，描繪一個日出景象，畫一個室外見到嘅景，而且畫中物件好濛，強調咗啲物件嘅郁動同光暗[74]。

印象派喺歷史上幾經轉折：初頭（當時嚟講好反傳統嘅）印象派廣受法國藝術界批評，例如因為印象派畫家興畫一啲平凡、日常生活當中嘅嘢，搞到當時嘅（偏好宏大題材嘅）法國畫界覺得佢哋難登大雅之堂；不過，打後喺一眾印象派畫家嘅努力下，印象派最後得到成個歐洲藝術界嘅承認[76][77]。而到咗廿一世紀，印象派，仲影響咗世界多地嘅畫藝，好似係嶺南畫派噉，就係結咗中國畫同印象派思潮而生嘅一個畫派[10]。

表現主義[編輯]

內文： 表現主義

表現主義（expressionism）係 19 世紀尾至廿世紀初起源於德國嘅一場現代主義藝術運動。表現主義核心諗頭係強調以主觀嘅角度描繪世界，而唔追求客觀噉描繪世界，所以好多時會用極端嘅情感表現，務求令讀者或者觀眾喺情緒上受到件作品感染[79][80]，表現主義嘅畫具有以下嘅特徵[81][82]：

  • 會扭曲現實，畫起嘢上嚟唔追求要畫作似實物－呢點同（好多時重視盡可能噉畫得似實物）嘅傳統西洋畫藝成強烈對比；
  • 喺用色上大膽，一幅畫作裏面有對比好強好刺眼嘅多種顏色；
  • 將物件嘅某啲特徵誇大，追求加強情緒效果。

以挪威畫家孟克（挪威文：Edvard Munch）1893 年嘅著名作品《吶喊》（挪威文: Skrik；德文：Der Schrei der Natur，意思係「大自然嘅吶喊」）為例。吶喊廣泛噉俾人認為係表現主義嘅代表作之一，幅畫用咗極度扭曲嘅線條，色彩上好唔似自然景物，而且幅畫嘅主角特徵誇大（身體有誇張、唔真實嘅扭曲），令成幅畫帶有好強烈嘅焦慮情緒[83]。

表現主義喺一戰前正式崛起（不過有學者指出，德文地區嘅藝術早喺中世紀經已有表現主義特徵[82]）。話咁快就喺以柏林做中心嘅德國－以至成個日耳曼歐洲（包括挪威、瑞典、同奧地利等地區）－大受歡迎。打後，表現主義仲擴展咗去畫同詩以外嘅藝術型式當中，例子有表現主義建築（expressionist architecture）[84]。

  • 《吶喊》

  • 《雨中》（德文：Im Regen）
    法蘭茲·馬克（Franz Marc），1912 年

  • 《森林入面嘅鹿》（德文：Rehe im Walde）
    法蘭茲·馬克，1914 年

  • 畫自己係士兵嘅樣
    E. L. 卡希納（E. L. Kirchner），1915 年

第啲門派[編輯]

睇埋：藝術運動
  • 後印象派（post-impressionism）：1886 年至 1905 年間喺法國興起嘅一場藝術運動，反對印象派對「要自然噉描述光同顏色」嘅執著，包括強調狂野色調嘅野獸派（fauvism）；好出名嘅荷蘭畫家梵高（Vincent van Gogh）就係一個後印象派畫家[85]。
  • 立體主義（cubism）：由西班牙畫家畢加索（Pablo Picasso）帶動嘅一場廿世紀初藝術運動，追求將畫簡化，將圖像變成有咁簡約得咁簡約嘅線同形狀簡單化；立體主義打破咗好多先前嘅藝術傳統，亦被指係超現實主義等打後嘅藝術運動嘅先驅[86]。
  • 超現實主義（surrealism）：起源於 1920 年代嘅法國，由達達主義演變出嚟，講求刻意唔跟現實，畫出好怪異同望落唔合常理嘅圖像。達利（Salvador Dalí）就係一個超現實主義畫家[87]。
  • 抽象表現主義（abstract expressionism）：起源於 1940 年代紐約市嘅一場藝術運動，被指係美國發展出一套獨有畫藝嘅開端；抽象表現主義受超現實主義影響，唔以描繪具體嘅物件做目標，而係通過用點、線、面、色彩、形體同構圖等抽象化嘅嘢嚟傳達各種情緒[88]。
  • 普普藝術（pop art）：喺廿世紀中源自美國同英國嘅一場藝術運動，集中於運用流行文化當中嘅影像嚟創造藝術品；普普藝術會用到廣告同漫畫等量產嘅文化產品裏面嘅影像做畫作嘅一部份，而呢點被認為係對西人傳統雅藝術（fine art）概念嘅挑戰[89]。
  • 照相寫實主義（photorealism）：起源於 1960 年代嘅紐約市，追求一幅畫要畫到好似相噉。

... 等等。

  • 《麥田群鴉》（Wheatfield with Crows）
    梵高，1890 年

中國畫[編輯]

內文： 中國畫

中國畫，好多時就噉簡稱「國畫」，古代有叫「丹青」，泛指唐人嘅傳統畫藝，係琴棋書畫四藝之一。狹義上，中國畫係指水墨畫（睇上面），廣義上就包嗮唐人傳統嘅壁畫或者陶瓷上面畫嘅圖像等嘅文化產物。中國畫歷史悠久－早喺商朝同夏朝嘅時期中原嘅人經已有喺度畫畫，而山水畫等現代廣為人知嘅國畫風格主要係喺唐朝嗰陣正式進入全面發展嘅，而且唐朝後嘅各朝代亦有喺畫畫上作出一定嘅創新，例如宋朝就有開始用「隱約描繪地貌」嘅做法，即係以模糊嘅輪廓去表現出遠嘅景物同將山嘅外形畫到隱沒喺濃霧當中－呢種特性喺廿世紀嘅國畫身上仲見得到[90]。

《清明上河圖》；畫嘅人係北宋畫家張擇端。

唐朝畫[編輯]

內文： 唐朝畫

喺隋唐朝期間嘅唐人一路有畫畫，而且呢個時期嘅畫有明顯嘅特色：唐朝畫當中其中一樣最出名嘅係人物畫，喺呢個時期嘅名作有《虢國夫人遊春圖》等，而且呢個時期啲作品所畫嘅人物好多變，由皇帝以至仕女或者軍人都有；除此之外，據講唐朝畫另一個特點係開始多咗山水畫，而且經已明顯受到道家同佛家思想影響，出現「畫靈魂而非執著畫實相」嘅特性[91]。

山水畫[編輯]

內文： 山水畫

山水畫（和製漢字：山水画，sansuiga；韓文：산수화）係中國畫其中一個最重要嘅分支，起源於劉宋，喺日本畫同韓國畫當中都見得到[92]。山水畫可以算係風景畫嘅一種，畫嘅係山以及河同湖等嘅水體，山水畫強調「平遠」、「高遠」同「深遠」多過闊遠，喺視覺上，山水畫有以下多種特性：

  • 山水畫會運用散點透視，想要做到「漫步喺山路上」噉嘅效果，令睇畫嘅人可以一路行一路睇，焦點不斷變換，往往會畫出非常長嘅畫卷；
  • 「深遠」就係運用遠近山嘅形狀同深淡做對比，畫出立體同山谷深邃嘅效果；
  • 除此之外，山水畫亦好重視「意境」，即係唔執著要準確噉畫出事物嘅外形（同西洋畫嘅寫實主義大相逕庭），而係要用雲同霧等嘅景象加埋畫入面嘅人跡（例如係隱士居住嘅一間屋仔）表達出山水嘅主觀實像，呢點被指係體現咗道家嘅思想[93][94]。

一般嚟講，山水畫嘅技巧包括咗「勾」、「皴」、「擦」、「染」同「點」五個步驟：首先用墨線勾出山石嘅輪廓，然後用各種皴法畫出山石嘅明暗向背，然後用淡墨渲染，進一步加強山石嘅立體感，最後再用濃墨或者鮮明嘅顏色點出石頭上嘅青苔或者遠山嘅樹木[93]。

嶺南畫派[編輯]

內文： 嶺南畫派

嶺南畫派，有時會俾人叫做粵畫派，係由粵人畫家創立嘅一個畫派，喺 19 世紀尾由高劍父同高奇峰兩兄弟以及趙少昂等嘅嶺南文人創立[95]。呢個畫派嘅特色係引進咗西洋畫嘅水彩畫法同印象派（睇上面）思潮，融合中國同西方嘅畫藝，廣州畫院副院長黃志堅就將粵畫派嘅特徵歸結做以下四點：「以倡導『藝術革命』、建立『現代國畫』為宗旨；以折衷中西、融會古今為道路；以形神兼備、雅俗共賞為理想；以兼工帶寫、彩墨並重為特色。」而粵畫嘅獨特藝術性勁到令佢俾人同大戲以及廣東音樂一齊俾人嗌做「嶺南三秀」[96]。

喺技術同外觀上，粵畫大致有以下嘅特徵[97]：

  • 注重留白：粵畫派同傳統嘅水墨畫一樣，喺佈局嗰陣講求「虛實相生」，「用心於無筆墨處」，係對水墨畫傳統技法嘅繼承。
  • 用筆注重骨法：粵畫派筆法變化好繁複，喺畫面上造成咗反傳統嘅效果，以達到氣勢磅礴、氣韻生動嘅境界。
  • 畫面賦色艷麗：受到西人印象派嘅影響，粵畫派睇重光嘅表現，畫面啲色水大多數都好鮮艷－呢一點同強調「蕭條則會筆墨之趣、淡漠則得筆墨之神」嘅水墨畫啱啱好相反。
  • 背景著色渲染：自從唐朝嘅王維提出「畫道之中，水墨為上」嘅主張之後，傳統唐人畫一直就重視水墨，唔鍾意彩色。粵畫派以色水渲染嚟襯托水墨，係對唐畫技法嘅一種創新。

... 等等。就算到咗廿世紀中後，嶺南畫派喺香港等地都仲有發展緊，例子可以睇吓楊善深[10]。

  • 《東戰場烈焰》
    高劍父，1930 年代

  • 高奇峰畫嘅花同雀仔
    廿世紀初

  • 《漁港雨》
    高劍父，1935 年

  • 高奇峰畫嘅鹿
    廿世紀初

  • 高奇峰畫白馬
    廿世紀初

第啲類型[編輯]

  • 按人群分：
    • 文人畫，又有叫「士人畫」：泛指古代唐人社會當中文人同士大夫畫嘅畫，以別於宮廷畫（院畫）同民間畫。文人畫講究全面嘅文化修養，提倡「讀萬卷書，行萬里路」，必需要做到詩、書、畫同印相得益彰，表達嗮人品、才情、學問同思想等一個文人要有嘅素質，題材上多數為山水、花鳥同梅蘭竹菊等[98]。
    • 院體畫，簡稱「院畫」：狹義上係指中國古代皇室宮廷畫家嘅畫作，喺宋朝最興盛，會反映仕女同仕大夫等嘅宮廷題材[99]。
  • 按題材分：
  • 按技巧分：
    • 工筆畫：泛指重視畫工精緻嘅畫，畫畫人會嘗試畫出物件嘅細節同表現出畫中物件嘅層次[102]。
    • 寫意畫：單純要求神似，唔要求畫清楚細節，好多時仲會用撥墨嘅方法大刀闊斧噉畫一大片嘅面積，例如南宋畫家梁楷嘅作品《潑墨仙人》（下圖）就係噉[103]。

... 等等。

第啲地區[編輯]

... 等等。

按內容分類[編輯]

1833 年一本生物學書入面一幅描繪唔同昆蟲嘅插圖

按畫嘅內容嚟分類嘅話，畫可以噉樣分：

  • 靜物畫（still life），指畫嘅係一啲死物，例如係畫一盤生果噉[106]。
  • 風景畫（landscape painting），指畫嘅係一大片自然景物，例如係山、河同森林等等。即係話山水畫可以算係風景畫嘅一種。
  • 城景畫（veduta，源自意大利文「景象」噉解），指畫嘅係一片城市嘅景象嘅畫。
  • 人像畫（portrait），指畫一個人，而且幅畫嘅中心係佢塊面同表情。
    • 自畫像（self-portrait），指畫畫人畫自己個樣嘅人像畫。
  • 人體畫（figure painting），指集中畫一個或者多個人嘅身體嘅畫，會強調畫中人嘅身材，而畫中人好多時係唔著衫嘅。
  • 插圖（illustration），指畫嚟輔助第啲出版物或者創作品嘅畫，例如係喺生物學文獻入面、用嚟展示一隻動物個樣嘅圖。

... 等等。

畫畫工具[編輯]

睇埋：文房四寶

畫畫常用嘅架生（畫具）有以下呢啲：

... 等等。

簡史[編輯]

肖維岩洞其中一幅壁畫
內文： 繪畫史

史前[編輯]

畫畫係一種歷史極之久遠嘅藝術：已知最古老嘅畫位於法國南部嘅肖維岩洞（Chauvet-Pont-d'Arc Cave）搵到歷史超過 30,000 年嘅壁畫，呢啲畫描繪咗馬、犀牛、獅子、水牛同猛獁象等嘅動物，而且仲有似係打完獵返屋企嘅人嘅圖案[7]；事實係，類似噉嘅洞穴壁畫喺世界各地都有，包括歐洲多地、中國、澳洲同印度等地都可以搵到啲噉嘅史前壁畫。對於呢啲畫嘅作用，學者作出咗多個猜測：有人估史前人類相信畫畫可以用嚟捕捉所畫嘅動物嘅靈魂，令打起獵上嚟容易啲；又有人認為呢啲畫反映史前人類對大自然嘅崇拜；又有人話史前人類畫畫只不過係無聊想打發時間；不過對於「史前人類畫呢啲畫嚟做乜」嘅問題，到咗家陣都仲未有一致嘅定論[107]。

文明進展[編輯]

畫畫喺人類文明嘅歷史上一路都有發展同變化：早喺公元前 3,000 年咁久遠嘅古埃及就經已有濕壁畫[61]，而打後嘅夏商皇朝都有壁畫嘅做法[8]；喺公元 1 至 10 世紀，世界多地嘅畫藝都有進展，好似係唐朝畫就出咗好多有睇頭嘅人物畫同山水畫[91]，而喺呢個時候，世界唔同地方嘅族群喺畫風上亦有咗明顯嘅差異，例如東亞人明顯噉偏向用水墨嚟畫畫，而歐洲人就明顯比較偏好水彩同油彩。打後歐洲人喺文藝復興時期產出咗大量出眾嘅畫作，而佢哋嘅畫藝及後亦都隨住大航海時代（Age of Discovery；15 至 17 世紀）嘅來臨傳播去到世界各地[11]。

廿世紀起[編輯]

睇埋：現代主義

現代西洋畫大變源自 19 世紀尾同廿世紀初。喺呢個時期，西人有咗一樣革命性嘅發明－影相；傳統西洋畫好多時都係追求真實（可以睇寫實主義）嘅，但影相呢家嘢嘅存在就表示，西人唔使再靠「請畫家畫」嘅方法記低自己嘅樣或者生活點滴，而呢點搞到畫家嘅地位受到動搖。藝術史學家認為，呢一點就係 19 世紀尾同廿世紀初嘅西方世界起咗一大柞藝術運動嘅主因之一－畫家唔可以再靠「畫得真實」嚟搵食，於是佢哋就開始唔重視「畫得真實」，而係變成著重用抽象化嘅畫嚟表達自己嘅情感或者諗法－呢點可見於印象派同表現主義等嘅藝術運動當中。而呢啲新嘅藝術風格隨住全球化傳到去世界各地，同各地嘅本土畫畫風格接觸同結合（例子可以睇返嶺南畫派），令廿一世紀初嘅畫界充滿咗各式各樣嘅諗頭[11]。

註釋[編輯]

  1. ↑ 可以睇埋 TV Tropes 嘅 Pretty Butterflies。
  2. ↑ 可以睇埋 TV Tropes 嘅 Sinister Geometry。
  3. ↑ 馬內（Édouard Manet）係一位由寫實主義轉去印象派嘅畫家，而佢呢幅作品被指係展示咗由寫實主義去印象派之間嘅過渡期。

睇埋[編輯]

參考文獻[編輯]

  • Bois, Y. A. (1993). Painting as model. Mit Press.
  • Daniel, H. (1971). Encyclopedia of Themes and Subjects in Painting; Mythological, Biblical, Historical, Literary, Allegorical, and Topical. New York: Harry N. Abrams Inc.
  • Greenberg, C. (1982). Modernist painting. Modern art and modernism: A critical anthology (PDF), 5(6).
  • Ling, R. (1991). Roman painting. Cambridge University Press.
  • W. Stanley Jr. Taft, James W. Mayer, The Science of Paintings, 1st Ed., Springer, 2000.

攷[編輯]

  1. ↑ "Paint – Definition". Merriam-webster.com. 2012.
  2. ↑ Chieffo, Clifford T.: Contemporary Oil Painter's Handbook, Prentice Hall, 1976.
  3. ↑ Painting. Encyclopedia Britannica.
  4. ↑ Elkins, James (1996). "Art Criticism". In Jane Turner (ed.). Grove Dictionary of Art. Oxford University Press.
  5. ↑ William Lidwell; Kritina Holden; Jill Butler (2010). Universal Principles of Design, Revised and Updated: 125 Ways to Enhance Usability, Influence Perception, Increase Appeal, Make Better Design Decisions, and Teach Through Design. Rockport Publishers.
  6. ↑ Ivan Viola and Meister E. Gröller (2005). "Smart Visibility in Visualization" (PDF). In: Computational Aesthetics in Graphics, Visualization and Imaging. L. Neumann et al. (Ed.).
  7. ↑ 7.0 7.1 Chauvet, Jean-Marie; Eliette Brunel Deschamps; Christian Hillaire (1996). Dawn of Art: The Chauvet Cave. Paul G. Bahn (Foreword), Jean Clottes (Epilogue). New York: Harry N. Abrams. English translation by Paul G. Bahn from the French edition La Grotte Chauvet.
  8. ↑ 8.0 8.1 曹洞颇. (2002). 夏商周绘画研究的意义. 美术观察, (A07), 84-84.
  9. ↑ Boardman, John ed., The Oxford History of Classical Art, Oxford University Press, 1993.
  10. ↑ 10.0 10.1 10.2 Croizier, R. C. (1988). Art and Revolution in Modern China: the Lingnan (Cantonese) school of painting, 1906-1951 (Vol. 29). Univ of California Press.
  11. ↑ 11.0 11.1 11.2 Preziosi, D. (ed.) The Art of Art History: A Critical Anthology, Oxford: Oxford University Press, 1998.
  12. ↑ Aur, D (2012). "A comparative analysis of integrating visual information in local neuronal ensembles". Journal of Neuroscience Methods. 207 (1): 23–30.
  13. ↑ Margaret, Livingstone (2008). Vision and art : the biology of seeing. Hubel, David H. New York: Abrams.
  14. ↑ 14.0 14.1 Völz, Hans G.; Kischkewitz, Jürgen; Woditsch, Peter; Westerhaus, Axel; Griebler, Wolf-Dieter; De Liedekerke, Marcel; Buxbaum, Gunter; Printzen, Helmut; Mansmann. "Pigments, Inorganic". Ullmann's Encyclopedia of Industrial Chemistry. Weinheim: Wiley-VCH.
  15. ↑ HUE, VALUE, SATURATION (PDF).
  16. ↑ McGuire, R. G. (1992). Reporting of objective color measurements (PDF). HortScience, 27(12), 1254-1255.
  17. ↑ Fairchild, Mark (2013). Color Appearance Models. John Wiley & Sons., page 87.
  18. ↑ Kuehni, Rolf G. (February 2002). "The early development of the Munsell system". Color Research & Application. 27 (1): 20–27.
  19. ↑ Stroke. Merriam-Webster.
  20. ↑ Fischer, J., Bartz, D., & Straβer, W. (2005, November). Artistic reality: fast brush stroke stylization for augmented reality. In Proceedings of the ACM symposium on Virtual reality software and technology (pp. 155-158).
  21. ↑ Park, Y., & Yoon, K. (2004). Adaptive Brush Stroke Generation for Painterly Rendering. In Eurographics (Short Papers).
  22. ↑ "Choose The Best Paint Brush | World's Finest Handcrafted Paint Brushes". Monarch Painting | Australia's Finest Handcrafted Brushes, Rollers & Accessories.
  23. ↑ Artist Paint Brushes. Art is fun!.
  24. ↑ Konstan, David (2014). Beauty - The Fortunes of an Ancient Greek Idea. New York: Oxford University Press. pp. 30–35.
  25. ↑ Kirwan, James, 1999. Beauty, Manchester: Manchester University Press.
  26. ↑ Hegel, G.W.F., 1835, Hegel's Aesthetics: Lectures on Fine Art, in two volumes, T.M. Knox, trans., Oxford: Clarendon, 1975.
  27. ↑ Howat, John K. (1987). "Twilight in the Wilderness". American Paradise: The World of the Hudson River School. Metropolitan Museum of Art.
  28. ↑ Coe, S. R. (2006). Nebulae and How to Observe Them. Springer Science & Business Media.
  29. ↑ Elder, J. H., & Goldberg, R. M. (2002). Ecological statistics of Gestalt laws for the perceptual organization of contours. Journal of Vision, 2, 324–353.
  30. ↑ Girshick, A., Interrante, V., Haker, S., & Lemoine, T. (1999). Line direction matters: An argument for the use of principal directions in 3D line drawings. Proceedings SIGGRAPH 1999.
  31. ↑ Critical Assessments: The Art of Painting 互聯網檔案館嘅歸檔，歸檔日期2019年7月8號，..
  32. ↑ P. Lieberman, The Biology and Evolution of Language (Cambridge, MA: Harvard Univ. Press, 1984) pp. 54–55.
  33. ↑ Stebbing, P. D. (2004). A universal grammar for visual composition? (PDF). Leonardo, 37(1), 63-70.
  34. ↑ Jirousek, Charlotte. 1995. "Rhythm". In An Interactive Textbook, Ithaca: Cornell University
  35. ↑ Eiichi Tosaki, Mondrian's Philosophy of Visual Rhythm: Phenomenology, Wittgenstein, and Eastern thought, Volume 23 of Sophia Studies in Cross-cultural Philosophy of Traditions and Cultures, Springer, 15 Nov 2017, pp. 108–109, 130, 139, 158.
  36. ↑ Piet Mondrian, Neo-Plasticism: Its Realization in Music and in Future Theater, 1922.
  37. ↑ Rhythm in Art – Master Painting Examples. Draw Paint Academy.
  38. ↑ GEOMETRIC VS ORGANIC SHAPES.
  39. ↑ Michael F. Zimmermann. Seurat and the Art Theory of His Time. Antwerp, 1991.
  40. ↑ Dunlap, Richard A., The Golden Ratio and Fibonacci Numbers, World Scientific Publishing, 1997.
  41. ↑ See How Artists Discover Simplicity as an Art Form in Works Which Reflect the Golden Ratio. artnet.com.
  42. ↑ Da Vinci and the Divine Proportion in Art Composition. The Golden Number.
  43. ↑ Livio, M. (2002). The golden ratio and aesthetics. Plus Magazine, 22.
  44. ↑ 44.0 44.1 Chieffo, Clifford T.: Contemporary Oil Painter's Handbook, Prentice Hall, 1976.
  45. ↑ Archaeology, Current World (6 July 2008). "World's oldest use of oil paint found in Afghanistan". World Archaeology.
  46. ↑ Osborne, Harold (ed), The Oxford Companion to Art, 1970, OUP. p. 787-788.
  47. ↑ Ancient Egyptian Water Pigments. Water Colors Through time.
  48. ↑ Andrew Wilton & Anne Lyles. The Great Age of British Watercolours (1750–1880). Prestel, 1993.
  49. ↑ Bartrum, Giulia. Albrecht Dürer and his Legacy. London: British Museum Press, 2002
  50. ↑ David Dewey. The Watercolor Book: Materials and Techniques for Today's Artist. Watson-Guptill, 1995.
  51. ↑ 51.0 51.1 The Editorial Committee of Chinese Civilization: A Source Book, City University of Hong Kong (1 April 2007). China: Five Thousand Years of History and Civilization. City University of HK Press. p. 732-3.
  52. ↑ 52.0 52.1 Dorothy Perkins (19 November 2013). Encyclopedia of China: History and Culture. Routledge. p. 232.
  53. ↑ 藝術館展覽展示香港水墨畫的發展過程.
  54. ↑ Australian rock art among world's oldest. The Christian Science Monitor.
  55. ↑ 55.0 55.1 Harris, Peter J F (1999). "On Charcoal". Interdisciplinary Science Reviews. 24 (4): 301–306.
  56. ↑ Elisabeth, Mary. Foster, Niki (ed.). "What are Charcoal Pencils?".
  57. ↑ 57.0 57.1 Mayer, Ralph, The Artist's Handbook of Materials and Techniques, Third Edition, New York: Viking, 1970, p. 312.
  58. ↑ Monnier, Geneviève, "Pastel", Oxford Art Online.
  59. ↑ Section 10: Painting and Drawing. Baylor University | Environmental Health & Safety.
  60. ↑ 60.0 60.1 Mora, Paolo; Mora, Laura; Philippot, Paul (1984). Conservation of Wall Paintings. Butterworths. pp. 34–54.
  61. ↑ 61.0 61.1 Case, Humphrey; Payne, Joan Crowfoot (1962). "Tomb 100: The Decorated Tomb at Hierakonpolis". The Journal of Egyptian Archaeology. 48: 17.
  62. ↑ Ward, Gerald W. R., ed. (2008). The Grove Encyclopedia of Materials and Techniques in Art. Oxford University Press. pp. 223-5.
  63. ↑ Mattera, Joanne (2001). The Art of Encaustic Painting: Contemporary Expression in the Ancient Medium of Pigmented Wax. Watson-Guptill Publications. p. 22.
  64. ↑ Encaustic. Online Etymology Dictionary.
  65. ↑ Pliny the Elder (1855) [c. AD70]. The Natural History. Translated by John Bostock; H.T. Riley. London: Taylor and Francis. Book 35, ch 41.
  66. ↑ Doxiadis, Euphrosyne (1995). The Mysterious Fayum Portraits: Faces from Ancient Egypt. H. N. Abrams. p. 193.
  67. ↑ Gianquinto, Michael A., Cape Cod Museum Curator of Art. Swept Away: Translucense, Transparence, Transcendence in Contemporary Encaustic. (2014) Curator's foreword to Hunterdon Art Museum Exhibition Catalog, p. 6.
  68. ↑ 68.0 68.1 Paul, C. (2003). Digital art (Vol. 224). London: Thames & Hudson.
  69. ↑ Discussion of the role of patrons in the Renaissance.
  70. ↑ Cole, Bruce, Art of the Western World: From Ancient Greece to Post Modernism. Simon and Schuster, 1981.
  71. ↑ 71.0 71.1 Finocchio, Ross. "Nineteenth-Century French Realism". In Heilbrunn Timeline of Art History. New York: The Metropolitan Museum of Art, 2000–. online (October 2004)
  72. ↑ Zarrilli, Phillip; McConachie, Bruce; Williams, Gary Jay; Sorgenfrei, Carol (2010). Theatre Histories: An Introduction, 2nd edition. Oxon: Routledge. p. 389.
  73. ↑ Hayward, Susan. "Realism" in Cinema Studies: The Key Concepts (Third Edition). Routledge, 2006. pp. 334–35
  74. ↑ 74.0 74.1 Hauser, A. (2005). Social history of art, volume 4: naturalism, Impressionism, the film age. Routledge.
  75. ↑ Samu, M. (2004). Impressionism: Art and modernity. Heilbrunn Timeline of Art History.
  76. ↑ Samu, Margaret. "Impressionism: Art and Modernity". In Heilbrunn Timeline of Art History. New York: The Metropolitan Museum of Art, 2000 (October 2004).
  77. ↑ Cole, Bruce (1991). Art of the Western World: From Ancient Greece to Post Modernism. Simon and Schuster. p. 242.
  78. ↑ Brombert, B. A. (1997). Edouard Manet: rebel in a frock coat. University of Chicago Press.
  79. ↑ Bruce Thompson, University of California, Santa Cruz, lecture on Weimar culture/Kafka'a Prague. Archived 2010-01-11 at the Wayback Machine.
  80. ↑ Chris Baldick. Concise Oxford Dictionary of Literary Terms, entry for Expressionism
  81. ↑ Victorino Tejera, 1966, pages 85,140, Art and Human Intelligence, Vision Press Limited, London.
  82. ↑ 82.0 82.1 Expressionism.
  83. ↑ Olson, Donald W.; Russell L. Doescher; Marilynn S. Olson (May 2005). "The Blood-Red Sky of the Scream". APS News. American Physical Society, 13 (5).
  84. ↑ Gombrich, E.H. (1995). The Story of Art (16. ed. (rev., expanded and redesigned). ed.). London: Phaidon. pp. 563–568.
  85. ↑ Bowness, Alan, et alt.: Post-Impressionism. Cross-Currents in European Painting, Royal Academy of Arts & Weidenfeld and Nicolson, London 1979.
  86. ↑ Alfred H. Barr, Jr., Cubism and Abstract Art, New York: Museum of Modern Art, 1936.
  87. ↑ Alexandrian, Sarane. Surrealist Art. London: Thames & Hudson, 1970.
  88. ↑ Anfam, David. Abstract Expressionism - A World Elsewhere. New York: Haunch of Venison, 2008,
  89. ↑ Livingstone, M., Pop Art: A Continuing History, New York: Harry N. Abrams, Inc., 1990.
  90. ↑ 《意會中國畫》撰文：杭春曉。
  91. ↑ 91.0 91.1 Eichenbaum, Patricia. Arts of the Tang Court. New York: Oxford University Press, 1996.
  92. ↑ Wen Fong (1992). Beyond Representation: Chinese Painting and Calligraphy, 8th-14th Century. Metropolitan Museum of Art. p. 71.
  93. ↑ 93.0 93.1 司徒錦鷹. 水墨山水畫教學綱領 (PDF). 2003-03-01 [2010-10-11].
  94. ↑ Northrop, Filmer Stuart Cuckow (1949). Ideological Differences and World Order: Studies in the Philosophy and Science of the World's Culture. Yale University Press. p. 64.
  95. ↑ "岭南画派". 原著喺2014年2月13號歸檔. 喺2017年9月15號搵到.
  96. ↑ 嶺南畫派-折衷中外融合古今.
  97. ↑ The Lingnan School of Painting - Introduction.
  98. ↑ Poškaitė, L. (2017). The Embodiment of Zhuangzi's Ecological Wisdom in Chinese Literati Painting (wenrenhua 文人畫) and Its Aesthetics. Asian Studies, 5(1), 221-239.
  99. ↑ 張迤邐編著. 國不知識一本通. 北京：中國紡織出版社 ,. 2015.01: 271.
  100. ↑ Marco, Meccarelli. 2015. "Chinese Painters in Nagasaki: Style and Artistic Contaminatio during the Tokugawa Period (1603–1868)", Ming Qing Studies 2015, Pages 175–236.
  101. ↑ Forbes, Andrew ; Henley, David (2012). Suzuki Harunobu: 100 Beauties. Chiang Mai: Cognoscenti Books.
  102. ↑ 郎绍君. (2008). 浅谈当代工笔画. 当代中国画, (3), 94-95.
  103. ↑ 周晟. (2006). 中国水墨写意画对现代平面设计的指导意义. 书画艺术, (5), 40-40.
  104. ↑ Bell, David. Ukiyo-e Explained. Global Oriental. 2004.
  105. ↑ Grabar, Oleg, Mostly Miniatures: An Introduction to Persian Painting, 2001, Princeton University Press.
  106. ↑ Ebert-Schifferer, Sybille. Still Life: A History, Harry N. Abrams, New York, 1998,
  107. ↑ "Milhares de pinturas rupestres são descobertas em cavernas no México". BBC News Brasil (in Portuguese).

拎[編輯]

由「https://zh-yue.wikipedia.org/w/index.php?title=畫畫&oldid=1496643」收