搬龍門

出自維基百科,自由嘅百科全書
Jump to navigation Jump to search
一個足球嘅龍門

搬龍門粵拼:bun1 lung4 mun4;moving the goalposts,或者 shifting the goalposts)呢句嘢源自英國,字面上解係指喺啲有龍門運動入面場波打打吓改變個龍門嘅位置,會噉做嘅通常係技不如人輸緊嗰一方-喺呢個情況入面,因為輸緊而搬龍門嗰一方出緊矛招,等自己表面上好似冇輸到噉[1][2]。而喺哲學上,「搬龍門」俾哲學家攞咗嚟指一種非形式謬論,指緊啲講緊謬論嘅人喺討論中途改變對對方嘅要求,等自己望落好似冇輸到噉[3][4]

謬論[編輯]

始祖鳥嘅化石

哲學上係噉樣形容搬龍門謬論嘅[4][5]:提出咗某個主張嘅人喺場討論當中傾傾吓突然間改變對對方嘅要求,仲要扮到對方因為滿足唔到嗰個新要求就等如滿足唔到個舊要求噉;通常噉係因為個對方提出咗啲好強嘅理據,俾人睇到原先嗰個主張係唔真確唔合理嘅,於是提出嗰個主張嘅人會提出第個主張,對方處理唔到個新主張就扮到好似個舊主張係啱嘅噉-但係事實上,個舊主張都仲係唔真確唔合理嘅。就好似技不如人踢踢吓波俾人入咗,跟手唔係認衰,而係將個龍門搬走,仲指住對手話對手冇入波。

例子
A 君:我認為進化論係錯嘅,因為佢根本冇證冇據。
B 君:查實呢,進化論有好多證據,例如係科學家掘到啲始祖鳥化石同似現代雀鳥嘅化石出嚟,仲有...(詳請請睇進化論嘅證據
A 君:超,佢揾到始祖鳥化石同似現代雀鳥嘅化石之嘛,但係又冇親眼睇過嗰啲生物,所以進化論根本冇證據支撐。
B 君:你噉即係搬緊龍門啫。
(而且如果吓吓都要親眼見到先算證據嘅話,噉好多嘢都唔信得。)

喺呢場對話入面,B 君攞咗一啲證據出嚟,呢啲證據顯示 A 君原先嗰句主張係錯嘅-進化論真係有證據-但係 A 君唔係認衰或者嘗試回應 B 君啲證據(例如係如果佢認為 B 君啲證據唔合理,解釋吓點解佢會噉諗),而係提出一個新要求-要求親眼睇到嗰啲生物,仲要講到好似 B 君處理唔到呢個新要求就等如原先嗰個主張係啱嘅噉。

運動方面嘅例子[編輯]

睇埋[編輯]

[編輯]

  1. "Moving the goalposts". Phrases.org.uk.
  2. Safire, William (28 October 1990). "On Language; Moving the Goalposts". The New York Times.
  3. Moving the Goalposts - Logically Fallacious
  4. 4.0 4.1 Clark, Jef et al. (2005). "Moving the goalposts," Humbug! The Skeptic’s Field Guide to Spotting Fallacies in Thinking, p. 101.
  5. Hobbs, Jeremy. "Moving the Goal Posts," The New York Times.