擴散型思考
(由擴散性思考跳轉過嚟)
擴散型思考（粵拼：kwong3 saan3 sing3 si1 haau2；英文：divergent thinking）係諗嘢方式嘅一種，指個人諗嘢嗰陣唔係集中於要「搵一個正確嘅答案」，而係會嘗試探索好多唔同嘅可能答案，可能當中某啲答案會比較能夠有效噉解答條問題，但唔會話得一個係明顯正確答案。如果畫做圖嘅話，就會好似附圖噉，一吓刺激（俾人要求佢諗答案）引致好多個唔同嘅可能答案[1][2]。擴散型思考相對於聚斂型思考。
舉個例說明，想像家陣有個人俾人叫佢解一條算術問題，條問題得一個正確答案（聚斂），就唔係擴散型思考；相比之下，想像有個人俾人叫佢寫作寫篇短篇故仔出嚟，但途中冇指定個故仔實要係乜乜乜樣，只要個故仔寫得夠好，都能夠達到令人滿意嘅結果－噉要寫作嗰個人可以寫個講人工智能嘅科幻故仔又得、一個建基於希臘神話嘅奇幻故仔又得、一個講吸血鬼嘅恐怖故仔又得... 呀噉－有好多個唔同嘅可能答案[3]。
一般認為，擴散型思考係創意嘅重要一環－一個人要展現創意，首先就實要能夠諗出一大拃原創嘅諗頭，所以途中實會用到擴散型思考，而擴散型思考亦都因而吸引咗唔少認知心理學家嘅注意[4]。
睇埋
[編輯]攷
[編輯]- ↑ Lieberman, J. Nina (1965-12-01). "Playfulness and Divergent Thinking: An Investigation of their Relationship at the Kindergarten Level". The Journal of Genetic Psychology. 107 (2): 219-224.
- ↑ Runco, M. A., & Acar, S. (2012). Divergent thinking as an indicator of creative potential (PDF). Creativity research journal, 24(1), 66-75.
- ↑ 3.0 3.1 Baer, J. (1996). The effects of task‐specific divergent‐thinking training (PDF). The Journal of Creative Behavior, 30(3), 183-187.
- ↑ Basadur, M. (1995). Optimal ideation-evaluation ratios. Creativity Research Journal, 8, 63-75.
- ↑ Olson, J. A., Nahas, J., Chmoulevitch, D., Cropper, S. J., & Webb, M. E. (2021). Naming unrelated words predicts creativity. Proceedings of the National Academy of Sciences, 118(25).