日式燒酒

出自維基百科,自由嘅百科全書
日式燒酒
日式燒酒

日式燒酒日文燒酎(shōchū),係一種蒸餾酒。通常使用大米,亦會用到大麥番薯或者蕎麥製麯,加酵母,再加大米、大麥、番薯、蕎麥、黑糖芝麻糖蜜等主要原料中嘅一、兩種,釀製之後蒸餾,熟化,將酒精濃度調整到45度或者以下而成。家下酒精濃度25度嘅最暢銷。根據蒸餾方法分爲單式蒸餾燒酎(乙類)同埋連續式蒸餾燒酎(甲類)。傳統嘅單式蒸餾燒酎中,除咗水之外無加任何嘢嘅可叫「本格燒酎」(honkaku shōchū,即係正式燒酒)。

種類[編輯]

單式蒸餾燒酎(乙類)[編輯]

泡盛[編輯]

日文叫「泡盛」(awamori)或者「琉球泡盛」(Ryūkyū awamori)。使用大米黑麯,加水釀製,蒸餾一次,熟化嘅。可能係喺暹羅傳到琉球嘅傳統式燒酒。產地只限沖繩縣

番薯燒酒[編輯]

日文叫「芋燒酎」(imo jōchū)。通常使用大米麯,亦會用到番薯麯,加水釀製,再加番薯釀製,蒸餾一次嘅。主要產地係鹿兒島縣東京都八丈島茨城縣亦有廠家。鹿兒島人鍾意喺熱水中加番薯燒酒飲。

大麥燒酒[編輯]

日文叫「麥燒酎」(mugi shōchū)。通常使用大米麯,亦會用到大麥麯,加水釀製,再加大麥釀製,蒸餾一次嘅。傳統產地係長崎縣壹岐諸島,家下主要產地係大分縣鹿兒島縣宮崎縣等。

大米燒酒[編輯]

日文叫「米燒酎」(kome shōchū)。使用大米麯,加水釀製,再加大米釀製,蒸餾一次嘅。傳統產地係熊本縣球磨地方,當地生產嘅叫「球磨燒酎」(Kuma jōchū)。家下亦有其他產地。

黑糖燒酒[編輯]

日文叫「黑糖燒酎」(kokutō shōchū)或者「奄美黑糖燒酎」(Amami kokutō shōchū)。使用大米黑麯,加水釀製,再加溶於熱水嘅黑糖釀製,蒸餾一次,熟化嘅。二戰時缺乏大米,泡盛廠家一部分改用特產黑糖製造嘅。產地只限鹿兒島縣奄美群島

蕎麥燒酒[編輯]

日文叫「蕎麥燒酎”」(soba jōchū)。通常使用大米麯,亦會用到蕎麥麯,加水釀製,再加蕎麥釀製,蒸餾一次嘅。主要產地係宮崎縣長野縣北海道亦有廠家。

粕取燒酒[編輯]

日文叫「粕取燒酎」(kasutori shōchū)。使用大米麯,加水釀製,再加大米釀製,壓去清酒之後,將酒粕蒸餾一次嘅。主要產地係福岡縣新潟縣等亦有廠家。

其他燒酒[編輯]

通常使用大米麯,加水釀製,再加大米同部分芝麻栗子薯仔粟米紫蘇等唔同原料嘅一種釀製,蒸餾一次嘅。主要喺添加嘅副原料嘅產地生産。

連續式蒸餾燒酎(甲類)[編輯]

通常使用大米麯,加水釀製,再加糖蜜粟米澱粉等釀製,使用連續式蒸餾器,通常減壓蒸餾一次嘅。提取酒精嘅效率高,成本低,不過缺乏原料嘅香味。主要由喺東京都京都府大分縣等嘅大酒廠生產,喺韓國亦有廠家。

甲乙混和燒酎[編輯]

因爲連續式蒸餾燒酎(甲類)缺乏原料嘅香味,混合部分單式蒸餾燒酎(乙類)添加香味嘅。主要由喺東京都、京都府、大分縣等嘅大酒廠生產。

其他分類[編輯]

  • 原酒 - 熟化前嘅,或者酒精濃度大約40度嘅,無稀釋嘅燒酒。
  • 無過濾 - 無過濾嘅原酒。
  • 古酒 - 蒸餾後熟化三年或以上嘅燒酒。
  • 初餾 - 蒸餾嘅初期分離出嚟嘅燒酒。原本酒精濃度高達50或60度,按法律規定加水到45度以下出廠。如果直接出廠,屬於烈性酒(spirits)。
  • 木桶熟化 - 使用洋式木桶熟化嘅燒酒。通常變成淡琥珀色。
  • 酒甕熟化 - 使用陶瓷熟化嘅燒酒。