景賢里
22°16′00″N 114°10′51″E / 22.26667°N 114.18083°E
景賢里（King Yin Lei），係香港一間歷史悠久嘅大屋，有87年歷史，係一座有中國文藝復興特色嘅紅牆綠瓦建築物。佢起喺香港島灣仔司徒拔道45號。由於香港地價貴，呢幅地皮估價做到成5億。2004年6月業主邱木城曾經想拆咗佢重建。2007年9月，業主突然開始拆瓦頂。不過喺環保團體長春社同輿論嘅壓力影響，香港特區政府即時將佢列為暫定古蹟，2008年7月11號確定評為香港法定古蹟。
史
[編輯]間大屋1937年起好，原名「禧廬」[1]，業主係一代華人鉅富李寶椿嗰女李寶麟同佢女婿岑日初。香港島山頂一帶以前一直都只係歐美人士先畀住。而李寶麟同顏氏大宅嘅顏成坤佢哋就係早期准畀喺灣仔半山居住嘅華人。
係1977年，「話梅大王」邱子文用兩千四百萬港元買咗呢間大宅，改名做「景賢里」。
保育爭議
[編輯]2004年2月，邱子文病逝。同年6月，佢嗰仔邱木城諗住將景賢里拍賣，長春社於是發起「一人一元」運動，希望儲夠錢買咗景賢里返嚟做保育，結果業主取消拍賣。
2007年初，邱木成想同政府傾，但見唔到面，就係同年夏天將景賢里賣俾中國大陸嘅個有錢佬。2007年9月11號，長春社發現有挖泥車係景賢里開工，建築物部分瓦頂一係整爛咗、一係搬走咗，重有啲瓦礫、碎石、打爛咗嘅寶鼎一地都係，引起輿論嘩然。一路到2007年9月13號，政府嘅人重入唔到去，不過根據佢哋係建築物外圍嘅觀察，政府嘅人評定景賢里重未出現結構性損毀。
政府介入
[編輯]2007年9月14號，古物古蹟辦事處嘅人入去景賢里評估後，初步認為景賢里有重要歷史價值，可以成為古蹟。發展局於是就開始法定程序，即時宣布景賢里係暫定古蹟，之後喺9月15號罕有咁用號外形式緊急刊憲生效[2][3]。
注
[編輯]- ↑ 〈香港文匯報：名人棲居地 禧廬變景賢 2007年9月15日〉。原著喺2007年10月12日歸檔。喺2007年10月9日搵到。
- ↑ 〈景賢里列暫定古蹟〉。原著喺2007年10月28號歸檔。喺2007年10月1號搵到。
- ↑ 《古物及古蹟 (暫定古蹟的宣布) (司徒拔道45號) 公告》 互聯網檔案館嘅歸檔，歸檔日期2020年3月27號，.(政府憲報號外，2007年9月15日)
