李立達
| 李立達 | |
|---|---|
| 出世 | 1988年5月17號 中國湖北襄樊（今日係湖北襄陽） |
| 屋企 | 中國海南海口 |
| 出名原因 | 第一位成功橫渡瓊州海峽嘅細路 2001年《健力士世界紀錄大全》——世界上橫渡海峽游程最長同時間最耐嘅細路 |
李立達（粵拼：lei5 laap6 daak6；簡化字：李立达；1988年5月17號—）係中國大陸嘅游水健將，湖北襄樊（今日係襄陽）人，曾經喺2000～2001年間試過橫渡瓊州海峽而出名。尤其喺2001年5月17號嗰次橫渡成功，亦俾健力士世界紀錄大全列佢做世界上橫渡海峽游程最長同時間最耐嘅細路[1]。後嚟個紀錄喺2003年、2005年先後俾嚟自北京嘅王一妍、深圳嘅郭思妤打破咗[2]。
生平
[編輯]李立達喺1988年5月17號喺湖北襄樊（今日嘅襄陽）出世，佢阿爸係差人。李立達喺出世幾個月之後俾阿爸抱住到漢水嘅河灘邊散步，佢第一次睇到煔煔聲啲水而好開心。後嚟阿爸諗到李立達鍾意大水而帶佢去學游水[3]。
1994年5月底，李立達本嚟要去泳館，但半佬去咗遊樂場嘅摩天輪入面玩而俾家屬搵咗佢半日，最後俾阿爸批評，重新返到泳館訓練之後好快學識咗游水。9歲嗰時，背泳比賽游出33秒68嘅成績，重快過嗰時全國10歲組嘅紀錄。後嚟一家大細搬到海南海口之後，重參加咗海南省組織嘅游水比賽攞咗兒童組冚唪唥冠軍，重有幾次刷新咗海南省嘅紀錄。
1999年10月，海南省要組織批游水健將參加橫渡瓊州海峽嘅大賽。本嚟阿爸擔心個仔會喺海峽入面出事，但仔最後喺次訓練入面成功連續游到20km嘅距離而俾佢參加呢項極高難度嘅挑戰，但因為佢嗰時年紀太細而俾海南省有關體育部門拒絕咗。直到2000年春節假期後到元宵間，李立達決定自己一人要橫渡瓊州海峽，目的係支持北京申辦2008年奧運。同年6月1號正式第一次橫渡瓊州海峽，但因為海口同徐聞地區之間橫風橫雨，好多時出大浪而橫渡失敗。第一次橫渡失敗之後好快俾海口當地嘅新聞媒體質疑。就因為呢次橫渡，令全家陷入山窮水盡嘅地步。後嚟李立達阿爸同贊助商傾咗一輪，重向有關部門提出申請橫渡瓊州海峽嘅事，最後政府接受咗李立達阿爸嘅提議。2001年5月17號06:02（UTC+8），佢喺廣東湛江徐聞縣海安鎮排尾角正式出發，經過咗10個鐘頭又6分9秒嘅水路，最後喺嗰日16:04（UTC+8）成功到達海南海口瓊山區嘅千年塔[註 1]以西2km地方成功登陸，全程一共游咗36.8km。賽後好快俾包括中國中央電視台同鳳凰衛視、海南各大媒體、及大公報、文匯報等報章猛咁採訪同報道。
最後，呢位仁兄嘅事跡好快被拍成《我是一條魚》嘅紀錄片重列入咗中國大陸2004年發行嘅初三英文課教材[4]。
李立達喺2005年6月19號要提出橫渡臺灣海峽[5]，但之後一直冇下文。
註同攷
[編輯]- 註
- ↑ 千年塔喺2001年1月1號起好，2010年3月31號俾海口建築部門話因為塔身生鏽得太犀利而拆咗。
- 攷
- ↑ 〈图文：海南少年李立达横渡琼州海峡创吉尼斯之最〉。《中國新聞網》。2000-12-17。
- ↑ 〈深圳两小学生成功横渡琼州海峡 打破吉尼斯世界纪录〉。《新华网》。新浪。2005-06-02。
- ↑ 走进国家教材的高中生 互聯網檔案館嘅歸檔，歸檔日期2017年8月1號，. 论文网
- ↑ 走进国家教材的高中生 互聯網檔案館嘅歸檔，歸檔日期2020年3月27號，. 少年文摘
- ↑ 〈李立达要横渡台湾海峡 挑战人体水中运动极限〉。《海口晚报》。南海网。2005-06-19。原著喺2020-08-14歸檔。喺2017-07-10搵到。