絲襪奶茶
絲襪奶茶（粵拼：si1 mat6 naai5 caa4），又叫港式奶茶（粵拼：gong2 sik1 naai5 caa4），係一種有香港特色嘅奶茶[1]，亦係香港人日常早餐同下午茶常見嘅嘢飲[2]。基本上，喺香港茶餐廳供應嘅奶茶都係用「絲襪奶茶」嘅方式嚟泡製，所以準確啲嚟講係早午晚餐都可以睇得見奶茶嘅身影。奶茶嘅特色係茶嘅濃度同奶香平衡得啱啱好恰到好處，通常會加入蒸煮過嘅淡奶或者係全脂奶，令到味道更加醇厚。
絲襪奶茶係香港茶餐廳裡面日常必備嘅飲品，尤其喺早餐同下午茶時段，好多香港人習慣咗配西多士或者菠蘿包嚟享用。絲襪奶茶近年已經成為咗香港嘅非物質文化遺產[3]。
起源
[編輯]
英國由19世紀中開始喺香港嘅殖民統治之後，英國人就將佢哋嘅下午茶文化概念帶到嚟香港[1]。西方人同一般香港華人喺朝頭早飲茶嘅習慣唔同，佢哋習慣喺晏晝３點左右，食晏至放工中間嘅嗰段時間飲茶同抖吓嚟補充體力，飲茶之餘亦都伴埋西式糕點嚟食[4]。因為當時嘅斯里蘭卡亦都係由英國統治，當地出產嘅紅茶味道好，價錢又平，鍾意飲紅茶嘅英國人於是就將錫蘭出產嘅茶葉運去香港，所以錫蘭紅茶喺香港好興，喺香港又叫做「西冷紅茶」。英國人習慣加牛奶同糖嚟飲茶，令到啲紅茶入口嗰陣更香更滑，香港人亦都漸漸接受咗英國人飲紅茶嘅方式[5]，仲成為咗港式奶茶嘅基本形態[6]。
不過原本嘅英式奶茶對基層勞工嚟講太過昂貴，茶餐廳同埋冰室為咗迎合勞動階層嘅需要就開始用價錢平啲嘅碎茶葉同埋進口茶葉溝埋嚟製成濃郁嘅茶膽，仲用成本低啲嘅平價淡奶去取代貴價嘅鮮奶去沖調，用嚟增加奶茶嘅濃郁度同埋熱量畀人補充體力。
港式奶茶最初成為咗好多做咕喱嘅勞動階層喺下午茶嗰陣為咗補充體力而發展出嚟嘅嘢飲，佢哋聚集喺冰室飲奶茶同食啲嘢，呢段時間成為咗佢哋交流情感同互相幫助嘅社交場合，呢種奮鬥同埋團結嘅精神亦都被認為係港式奶茶文化嘅一部分。
隨住時代發展，啲人發現到錫蘭出產嘅紅茶味道好啲，價錢又平啲，令到錫蘭紅茶就喺香港好流行。港式奶茶嘅製作技藝逐漸精進，為咗追求更加順滑嘅口感而發展出細密嘅茶濾袋，港式奶茶嘅獨特之處係喺茶葉嘅拼配同埋精細嘅過濾方法，成為咗香港獨有嘅文化特色，呢個亦都被列做香港嘅非物質文化遺產[3]。
製法
[編輯]
早期嘅奶茶係將煮好嘅紅茶用個網過濾咗先，咁樣除咗用嚟隔走茶渣之外，亦都會令紅茶更濃厚同更香滑[5]，然後將調配好嘅紅茶倒入去已經落咗淡奶嘅杯裡面，再落白糖，不過亦都有唔加糖嘅，等客人按照自己鍾意而落糖。
早期嘅茶餐廳會用大茶壺去長時間煲茶，搞到茶味太過苦澀。絲襪奶茶嘅原創者—大牌檔蘭芳園嘅林木河先生為咗解決呢個問題[7]，佢哋改用一種用棉線造白毛布嘅特製白布袋嚟做嘅細密茶袋去過濾同隔走茶渣[8]，白毛布茶袋經過紅茶嘅浸泡而染色，顏色睇落去就好似絲襪咁樣[7]。不過而家大部分茶餐廳都會用一個棉紗網嚟做濾袋，而呢個濾袋仲會鑲喺一個金屬框架上面，咁樣做會比較容易去處理熱水同埋控制茶水嘅流量，同埋去換已經穿咗嘅濾袋亦都比較方便快捷。奶茶仲要喺啱嘅時機去沖泡，從而發展出更香滑嘅奶茶。當時有食客講笑叫呢樣嘢做「絲襪奶茶」，因為染咗色嘅白毛布茶袋同女性著嘅多數係肉色，收縮嗰陣時呈咖啡色嘅「絲襪」好相似，「絲襪奶茶」亦因為咁而有呢個名，並唔係好似坊間有好多人所講真係用絲襪嚟做濾袋去沖奶茶[9]。
傳統嘅港式絲襪奶茶係用淡奶加入煲好咗嘅錫蘭紅茶。茶餐廳用嚟沖港式奶茶嘅茶葉一般都會選用錫蘭高地紅茶，茶葉仲分咗粗茶同幼茶兩種[10]，茶餐廳會透過控制粗幼茶嘅份量就可以改變或者調節奶茶沖出嚟嘅香味、色澤同埋濃度。一般茶餐廳會用１-２種碎紅茶做主，攞佢嘅茶色同濃味，再配搭高級啲嘅錫蘭紅茶嚟帶出茶香[11]。
製作港式奶茶至少要用到兩個相同容量嘅大茶壺，沖茶嗰陣時要事先將調校好晒份量嘅紅茶茶葉放入個棉紗濾袋（尼龍）裡面，然後將嗰個濾袋放入去大茶壺，等啲茶葉完全浸落熱水裡面，仲要用鈎嚟將濾袋嘅邊框鈎喺大茶壺嘅邊緣，方便喺之後攞返個濾袋出嚟。沖茶嗰陣時要等嗰煲紅茶喺茶煲裡面燜幾分鐘（呢個過程叫做焗茶[10]）之後，再將啲茶倒落去另一個茶壺，之後拎起茶壺將紅茶倒入去另一個空嘅茶壺裡面，將放咗茶葉嘅濾袋喺已經倒咗茶水出嚟嘅茶壺裡面攞起，再拎高啱啱裝咗熱茶嘅茶壺，將茶水喺高嗰邊傾倒落去之前已經有茶葉嘅濾袋入面，而經過濾袋嘅茶水就會流返去原先嘅茶壺裡面，呢個將茶水由高嗰面倒落去濾袋來回做幾次嘅動作就叫做「撞茶」[10]，跟住又將茶水重覆經過濾袋倒落去另一個空嘅茶壺裡面，「撞茶」需要連續做幾次，呢個程序可以令到茶葉得到充分嘅萃取[12]，嚟提升茶水嘅濃度同茶香，又可以避免茶葉長時間浸泡出嚟嘅茶水太過苦澀，最後將紅茶啲斟落去已經加咗淡奶嘅杯裡面就完成。絲襪奶茶嘅質素以入口幼滑延綿為之好，能夠有啱啱好嘅「厚度（body）」。厚度亦即係奶茶嘅濃厚程度，而呢個厚度主要係由淡奶嘅濃淡度嚟決定，當奶脂濃度足夠嗰時，奶茶就會喺表面凝結成啡色嘅奶衣，擁有呢種厚度嘅奶茶就係所謂嘅「掛杯奶茶」[11]。
大牌檔「蘭芳園」嘅伙計會將煮滾咗嘅茶水倒落去過濾網，再上下拉郁佢嚟加速去過濾啲茶水出嚟，手法純熟又誇張到好似做騷咁引人注目，係港式茶餐廳製作奶茶一大特色。
至於將奶茶整到成凍奶茶有３種方法：
- 舊陣時喺製冰機仲未流行嘅年代，整凍奶茶係要將奶茶倒入去玻璃樽嗰度先，然後再放入雪櫃嗰度慢慢雪凍[13]，但係咁樣做好嘥時間，所以呢種做法已經非常之少見；
- 而家大部份嘅凍奶茶係透過喺奶茶加冰嚟達到降溫嘅效果，缺點係啲冰慢慢溶化咗之後就會將奶茶原本嘅味道溝淡咗[14]。
- 第３種方法係用「恆溫水浴」嘅概念，係將奶茶連埋個杯擺落去一個已經放咗冰嘅盤裡面，奶茶因為咁樣就可以由頭到尾保持住濃度唔會溝淡咗，而溫度又可以維持冰凍，呢種奶茶就叫做「冰鎮奶茶」[15]。
咖啡因問題
[編輯]2016年3月，香港消費者委員會喺市面採購咗幾種奶茶同埋咖啡等等嘅嘢飲嚟做測試，入面包括咗３０個港式奶茶嘅樣本，結果發現部分港式奶茶嘅每杯咖啡因含量比濃縮咖啡仲高啲，裡面咖啡因含量最高嘅兩個樣本係喺樂園同埋新釗記茶餐廳買返嚟嘅奶茶，一杯就含有高到去220毫克嘅咖啡因，遠高過香港４間主要咖啡專門店賣嘅咖啡飲品[16]。呢個相信同紅茶茶葉含有嘅咖啡因比白茶同綠茶等等其他種類嘅茶葉有關，每８安士（28.35克）嘅紅茶茶葉就含有40-70毫克嘅咖啡因[17]，而萃取方式亦都會影響到茶水嘅咖啡因濃度[18]。長期攝取過量嘅咖啡因會搞到包括有失眠等等嘅健康問題，奶茶因為咁並唔啱細路同埋餵哺緊母乳嘅婦女去飲。
睇埋
[編輯]參考
[編輯]- ↑ 1.0 1.1 〈「港式奶茶」與香港人文化身分認同〉。嶺南大學。原著喺2021-05-05歸檔。喺2021-05-03搵到。
{{cite web}}: Unknown parameter|deadurl=ignored (|url-status=suggested) (help) - ↑ 〈Top 10茶餐廳港式奶茶 鐵皮檔懷舊情懷茶味濃！〉。《新Monday》。2018-10-03。原著喺2019-11-05歸檔。喺2019-07-18搵到。
{{cite news}}: Unknown parameter|dead-url=ignored (|url-status=suggested) (help) - ↑ 3.0 3.1 〈港式奶茶製作技藝〉。非物質文化遺產辦事處。原著喺2021-06-17歸檔。喺2022-07-08搵到。
{{cite web}}: Unknown parameter|deadurl=ignored (|url-status=suggested) (help) - ↑ 〈港式奶茶之中的大英帝國〉。《故事》。2017-08-30。原著喺2020-04-16歸檔。
{{cite news}}: Unknown parameter|deadurl=ignored (|url-status=suggested) (help) - ↑ 5.0 5.1 〈港式奶茶順滑秘密：速度與力度〉。《香港01》。2016-11-01。原著喺2021-05-03歸檔。喺2019-07-18搵到。
{{cite news}}: Unknown parameter|deadurl=ignored (|url-status=suggested) (help) - ↑ 〈喝一口港式奶茶〉。《米芝蓮指南》。2018-04-12。原著喺2021-09-26歸檔。喺2021-09-26搵到。
{{cite news}}: Unknown parameter|deadurl=ignored (|url-status=suggested) (help) - ↑ 7.0 7.1 〈政府正制訂非遺傳承人認定機制 社會要如何保育相關文化？〉。《無綫新聞》。2025-10-24。喺2025-10-24搵到。
- ↑ 當時布行嘅老闆就話畀佢聽，你試吓用棉衲，棉衲裡面有一層布，翻出嚟白色，佢話呢個係叫白毛布，佢話連絲都透唔過，佢放咗茶葉落去煲就染成咗啡色。
- ↑ 〈地道文化 絲襪奶茶始祖 公開沖茶秘技〉。蘋果日報。2006-10-13。原著喺2015-01-02歸檔。喺2011-01-18搵到。
{{cite web}}: Cite has empty unknown parameter:|coauthors=(help); Unknown parameter|deadurl=ignored (|url-status=suggested) (help) - ↑ 10.0 10.1 10.2 〈5招沖出香滑絲襪奶茶〉。《東方日報》。2017-08-16。原著喺2021-05-03歸檔。喺2021-05-03搵到。
{{cite news}}: Unknown parameter|deadurl=ignored (|url-status=suggested) (help) - ↑ 11.0 11.1 〈識飲識食幼滑如絲 • 絲襪奶茶〉。《壹蘋果車網》。2005-01-31。原著喺2014-08-28歸檔。喺2011-05-10搵到。
- ↑ 〈不拘一派！借用精品咖啡科學 萃取港式奶茶黃金比例〉。《明周》。2021-03-30。原著喺2021-09-26歸檔。喺2021-09-26搵到。
{{cite news}}: Unknown parameter|deadurl=ignored (|url-status=suggested) (help) - ↑ 〈凍 奶茶 @奶茶通俗學〉。《新假期》。2015-07-07。原著喺2022-07-08歸檔。喺2022-07-08搵到。
- ↑ 〈香醇濃厚「港式奶茶」〉。《晴報》。2014-08-01。原著喺2022-07-07歸檔。喺2022-07-08搵到。
{{cite news}}: Unknown parameter|deadurl=ignored (|url-status=suggested) (help) - ↑ 〈冰塊放「外面」最香濃 泡港式奶茶出色的秘訣〉。《東森新聞》。2013-06-27。喺2022-07-08搵到。
- ↑ 〈港式奶茶咖啡因勁過星巴克 飲得多會點？〉。《香港經濟日報》。2016-03-22。原著喺2017-03-24歸檔。喺2021-09-21搵到。
{{cite news}}: Unknown parameter|deadurl=ignored (|url-status=suggested) (help) - ↑ 〈茶飲咖啡因含量排行榜 5大常見茶飲＋不同茶葉功效解構〉。《新假期》。2019-07-09。原著喺2021-09-26歸檔。喺2021-09-26搵到。
{{cite news}}: Unknown parameter|dead-url=ignored (|url-status=suggested) (help) - ↑ 〈哪款茶最多咖啡因？茶會否引致骨質流失？〉。Medical Inspire。2018-06-25。原著喺2021-09-26歸檔。喺2021-09-26搵到。
{{cite news}}: Unknown parameter|dead-url=ignored (|url-status=suggested) (help)
出面網頁
[編輯]- 港式奶茶列香港非物質文化遺產。2013年6月9號。香港政府新聞網
- 18歲港少年榮登港式奶茶王。2011年8月13號。壹蘋果專題
- 傳說中的絲襪奶茶是咋做出來的。2011年1月6號。搜狐新聞網站
- 地道文化 絲襪奶茶始祖 公開沖茶秘技。2006年10月13號。蘋果日報網站
- 2006年9月8號禮拜五，明報第D5版：絲襪奶茶所用嘅係港幣５蚊／個嘅棉紗網，唔係絲襪網又唔係尼龍網。呢個棉質網每個可以用大約１個禮拜。