絲襪奶茶

絲襪奶茶

凍奶茶

冰鎮奶茶

絲襪奶茶（粵拼：si1 mat6 naai5 caa4）係具有香港特色嘅一種奶茶，係香港人日常下午茶（同早餐）常見嘅嘢飲。基本上，喺香港茶餐廳供應嘅奶茶都係用「絲襪奶茶」嘅方式泡製。

起源

由英國開始喺香港嘅殖民統治，英國人就將「下午茶」呢個概念帶到香港。同一般華人喺朝早飲茶嘅習慣唔同：西方人習慣喺下晏三點左右，食晏到放工中間嘅一段時間，除咗享受西茶，再配啲甜品。由於錫蘭出產嘅紅茶味道較好而價錢又平，所以錫蘭紅茶喺香港好流行。西方人飲茶習慣加牛奶同糖，令茶入口更香更滑，咁樣成為咗香港奶茶嘅基本。

製法

所謂「絲襪奶茶」，係將煮好嘅紅茶用一個棉線網先行過濾，作用除咗隔走茶渣之外，亦令紅茶更香滑，然後再加入淡奶同糖。傳統嘅港式絲襪奶茶用淡奶加入煲好嘅錫蘭紅茶。原創人（蘭芳園茶餐廳林木河先生）用特製白布袋，但而家大部分人都會用一個棉紗網鑲喺一個金屬框架度。

由於棉紗網經奶茶浸泡，網顏色同絲襪好接近，因此叫做「絲襪奶茶」，「絲襪」係女性用尼龍襪褲嘅俗稱（尼龍未面世前絲襪乃係用絲綢織成，而且多數係長筒絲襪），多數係肉色，收縮時呈咖啡色，第二次世界大戰後由美國傳入，初期叫「原子襪」，「蘭芳園」大牌檔伙計將煮沸茶水倒入過濾網，上下拉動以加速茶水濾出，手法熟練誇張，狀似做秀，引人注目，係港式茶餐廳製作奶茶一大特色。過濾網染上奶茶，形狀顏色似尼龍襪褲，食客講笑叫做為「絲襪奶茶」，並唔係用絲襪做為濾網來過濾嘅。

用來沖奶茶嘅錫蘭高地紅茶分為粗茶同幼茶兩種，餐廳透過控制粗幼茶嘅份量，就可以改變沖出來嘅奶茶嘅香味、色澤同濃度。一般茶餐廳會用一至兩種碎紅茶做主，攞佢嘅茶色同濃味，再配搭較高級嘅立頓錫蘭紅茶以帶出茶香。

沖茶時先將紅茶放入尼龍網度，然後將網浸入巨型水煲度，並用鉤將網鉤喺水煲嘅邊沿。將茶燜喺茶煲入面幾分鐘後（叫做焗茶），將茶倒落另一茶壺度，來回倒幾次（叫做撞茶）。最後倒入已放入淡奶嘅杯度。

絲襪奶茶嘅品質以入口幼滑延綿為好，能有適當嘅「厚度」（body）。而厚度係主要由淡奶嘅濃淡度所決定，奶脂濃度足夠時，奶茶就會喺表面凝結成啡色嘅奶衣，擁有呢樣厚度嘅奶茶就係所謂嘅「掛杯奶茶」。

至於將奶茶做成凍奶茶（冰奶茶）有三種方法：

• 以往喺製冰機唔流行嘅年代，係先將奶茶倒入玻璃樽度，再放到雪櫃度慢慢雪凍，但係呢種做法已經好少見到。
• 而家大部份嘅凍奶茶係透過喺奶茶加入冰塊來達到降溫嘅效果，缺點係慢慢溶解嘅冰塊會將奶茶原本嘅味道沖淡。
• 第三種方法係用「恆溫水浴」嘅概念，將已有奶茶嘅茶杯放入一個有冰水同冰塊嘅容器度，奶茶就可以由頭到尾保持冰凍同濃度，呢種做法嘅奶茶叫做「冰鎮奶茶」。

睇埋

• 茶走

出面網頁

• 港式奶茶列香港非物質文化遺產。2013年6月9號。香港政府新聞網
• 18歲港少年榮登港式奶茶王。2011年8月13號。壹蘋果專題
• 傳說中的絲襪奶茶是咋做出來的。2011年1月6號。搜狐新聞網站
• 地道文化 絲襪奶茶始祖 公開沖茶秘技。2006年10月13號。蘋果日報網站
• 2006年9月8號星期五，明報第D5版：絲襪奶茶所用的是港幣5元一個的棉紗網，不是絲襪網又不是尼龍網。此棉質網每個可用約1星期。