湖廣填四川

 湖廣填四川（粵拼：wu4 gwong2 tin4 sei3 cyun1） 係發生喺中國明清兩代嘅兩次大規模四川之外嘅人（主要係湖南同湖北嘅居民，即係湖廣人）移居四川地區（包括四川同重慶）嘅移民潮，分爲明初、清初兩次，移民人口達百萬人以上。

呢場移民潮唔浄止湖廣人參與，亦有廣東嘅客家人去填四川。移民影響最主要嘅地方係四川盆地東部，包括重慶、達州、涪陵、萬縣。除咗而家湖南、湖北、廣東外，江西、福建、廣西等十幾個省都有移民去四川。

史

天府之國嘅優越

四川地區偏居於西南地區，因為地理上西有青藏高原、南為雲貴高原、北有秦嶺、東有大巴山，係外界唔易侵擾嘅盆地地帶，宋之前係遠離戰亂嘅世外桃源。春秋時係古蜀國領地。公元前316年，秦國滅蜀後，落令「移秦民萬家實之」，之後不斷有中原移民到四川。由於水土豐饒，災少，好快就開發成「天府之國」，而地形閉塞、山川險固，使四川冇乜大戰，所以人煙稠密，經濟繁榮不下江南（唐時益州即而家成都係同江南嘅揚州號稱揚一益二，分別係東南同西南兩大都會）。而安史之亂爆發後，長安危機，唐玄宗都係走去富庶安定嘅四川避難。

湖廣省嘅形成同第一次湖廣填四川

然而到南宋末年，蒙元軍隊一路南下，喺四川地區激烈拉鋸戰，令四川人口銳減、農田荒廢。

元代第一次喺中國設省，當時嘅省係好大嘅，湖廣省就包咗今日湖北、湖南、廣西、海南大部，外加廣東、貴州小部，幾十年後蒙元滅亡，朱元璋統一中國後改革區劃，湖廣省嘅名沿用，範圍縮到今日湖北、湖南。

為咗恢復四川，朱元璋鼓勵移民四川，因為湖廣省喺四川隔籬，移民自然係最多，呢個就係第一次湖廣填四川。

屠蜀同第二次湖廣填四川

所謂「屠蜀」，就係明末清初時四川地區持續戰亂，難得安定。

首先喺明末，天災多而朝廷又連年發兵徵稅，百姓艱難，於是各地起義。1644年，陝西人張獻忠作爲叛亂軍首領帶軍入四川，喺成都做本營立大西政權，自此明軍、清軍、大西軍三軍喺四川起爭奪戰，期間大屠殺不斷，令四川人口再次劇降。明後半期四川至少300萬人，到清初期時，跌到數萬人，一啲州縣甚至得返十幾戶人家。1673年，清初將軍吳三桂發動三藩之亂，四川未來得切恢復又陷入戰亂。

為咗重振天府之國，康熙平亂後頒佈《招民填川詔》，號召外省人移民四川，出啲嚟墾荒嘅農戶可免頭幾年稅賦等優惠政策。用咗一個世紀嘅時間，大約有600萬人入川，其中湖北、湖南就有300萬。

移民路線

分為水陸二路。

水路係溯長江而上，經三峽入四川盆地，行水路嘅人大多來自湖北同江西。

陸路係行舊時四川同貴州、湖北嘅山路入川，行路去嘅人大多係湖南同貴州人，部份係來自廣東福建嘅客家人。

影響

麻城認同

雖然移民來自湖廣咁大笪地，不過三百年過去，好多四川人講自己嘅鄉下，都話祖先係來自湖北麻城縣孝感鄉（唔同於今日孝感市）。好自然，麻城故里只係個民系認同標誌，就似珠璣巷對廣府人嘅意義噉，因為一個咁細嘅地方，就算搬晒成個鄉，都冇可能填得到四川。

有學者話類似於山西洪洞大槐樹移民，啲移民先係集中喺麻城再統一出發移居四川，於是後人以為麻城係鄉下；都有人話喺呢場移民潮中，麻城來嘅人係最早批移民，勢大資深，後來人為咗尋求蔭庇都冒充係麻城人。無論點，麻城已經成為四川人關於鄉下嘅記憶標誌。

湖廣會館

移民越來越多，為咗聯絡鄉里，有個照應，四川就興起咗湖廣會館。會館係明清時外鄉人設喺城鎮中供同鄉住宿、聚會嘅場所，按地域分，一般由同鄉移民、商旅創辦，供奉鄉下嘅神主、賢人。書生趕考或生意佬出外地做買賣，大都首選本鄉嘅會館來投宿。

形成近現代巴蜀文化

今日大約85%嘅四川人係移民後裔，佔多數係湖廣行省爲本籍嘅人口。歷史上四川地區居民講巴蜀語，由於人口銳減，外來移民衝擊，令巴蜀語式微、滅絕、同移民嘅湖廣話融合形成今日嘅四川話，屬於西南官話嘅一種。

江西填湖廣

由於湖廣地區移咗太多人過去，呢場大規模移居影響到湖南、湖北本身嘅人口結構，結果湖廣空虛，引發咗事件江西填湖廣（亦有講法話湖廣行省喺元末明初經歷過大屠殺，送來嘅移民多數來自江西省，所以出現同樣嘅狀況）。

出面網頁

• 秦漢時的蜀地移民：將六國富豪大戶遷往蜀地
• 蜀史紀要 13，古蜀史上的八次大移民
• 「不正宗」的四川人：2300年的移民史
• 『揚一益二』的由來
• 康熙三十三年《招民填川詔》原文
• 陳世松 (2005年7月5號)。〈「湖廣填四川」研究平議〉。《四川社會科學在綫》。喺2017年1月8號搵到。