咕嚕肉

咕嚕肉

齋咕嚕肉，用豆腐代替豬肉，但仍幾可亂真

冰鎮咕嚕肉 (喺廣州陶陶居影嘅)

咕嚕肉或作咕咾肉、甜酸肉或古老肉，係一道中國粵菜，以甜酸汁同豬肉煮成。呢味餸係歐美人士最熟悉嘅中國菜之一，所以成日喺中國以外唐人街嘅餐館見到。

名由來

咕嚕肉嘅名有兩個傳說。第一個傳說指由於呢味餸以甜酸汁烹調，上菜時香氣四溢，令人禁唔住「咕嚕咕嚕」地吞口水，因而得名。第二個傳說係指呢味餸歷史悠久，故稱為「古老肉」，後轉化成「咕嚕肉」。

製法

咕嚕肉通常會用豬嘅脢頭（豬肩）肉。配料有青椒、紅椒、洋蔥同菠蘿。「咕嚕汁」就用茄汁、山楂、砂糖同檸檬汁等煮成。咕嚕肉嘅煮法，係將豬肉切件醃味，然後沾上生粉，放入油鑊炸到金黃色，再將炸好嘅肉連同配料同咕嚕汁炒成。

普及程度

由於清朝時歐美人士喺中國最先接觸廣東地區，亦順理成章最先接觸粵菜，加上佢哋鍾意甜酸嘅口味，所以咕嚕肉深受佢哋歡迎。另一方面，廣東人亦係最早僑居歐美地區嘅中國人，更喺當地開設粵菜餐館，更令咕嚕肉普及起嚟。現時世界各地唐人街嘅多數餐館，都有咕嚕肉嘅供應，通常會附送白飯或炒飯。

相關食品

咕嚕肉嘅煮法，亦可用於其他材料。最普遍嘅變種係生炒骨，即係用咕嚕汁炒豬排骨。其他咕嚕菜式則包括咕嚕雞球、咕嚕蝦球、咕嚕斑塊等，甚至用豆腐代替豬肉嘅齋咕嚕肉。