白石角

白石角（英文：Pak Shek Kok）喺香港新界，響大埔海（吐露港）西岸邊，近樟樹灘。家下白石角對出嘅填地，以白石角為中心，由沙田海近馬料水，伸到大埔滘東南山後便嘅蕉坑，有香港教育學院運動中心、香港科學園，同港鐵東鐵綫加吐露港公路。

地理

原白石角係個兩條涌聯埋嘅涌口^[1]^[2]，主要一條響樟樹灘東便，細一條由香港中文大學逸夫書院後便。涌流入大埔海，積成河嘴，形突入海，所以叫角。1910年，舊九廣鐵路橫過白石角，隔開佢同樟樹灘，白石角響北，樟樹灘響南。家下重見到廢軌改成嘅小路。1960年代，佢正東便有碼頭。

白石角沿舊岸（家下山邊）向南行可以到馬料水，舊岸凸向沙田海同大埔海。而向北行可以到大埔滘，舊岸係個大灣，有幾個谷有涌流入大埔海，積成平地，好多都用過來耕田。近大埔滘嗰邊，有山隔住大埔滘，火車都開咗條隧穿過。

佢對出係大埔海係望到馬鞍山、船灣等地。遠望望穿赤門，甚至可以見到平洲。

舊時白石角隔條火車路有條叫榕樹嘅村。

1982年，為咗起吐露港公路，成個大埔海西岸填海。填地本來諗住起樓做住宅，但最尾都留來做大專或大學用地。1996年，因為九廣鐵路白石角呢段急彎，有貨卡出軌，交通大亂一日，所以就將路軌拉直，貼近吐露港公路內側。原軌就變成小路。

1996年2月，香港政府同行政局決定起香港科學園，10月開始大規模填海，範圍響吐露港公路以外海皮，東南去到香港中文大學新亞書院以東海邊，西北去到蕉坑，鹿茵山莊以東。發展署將新填地其他部份，叫白石角發展區。

2001年2月24號，香港敎育學院運動中心落成^[3]，位置近蕉坑填地，響九港鐵路舊軌到新軌之間，舊軌變成優景里。個中心亦都叫白石角運動中心，雖然同原白石角都有一段距離。

2001年，近馬料水，香港科學園第一期部份落成。2003年，吐露港公路白石角呢度擴闊到雙程各四綫。2004年，香港科學園第一期完成。2006年，香港科學園第二期落成，2007年開幕，2008年仍然裝修緊。第三期重未動土。

白石角發展區第1期A同C住宅用地賣出。2007年9月17號，香港政府再拍賣白石角發展區第1期B住宅用地。塊地畀四間公司夾份投到，即係南豐地產、信和置業、永泰亞洲同嘉華國際。呢塊地會起低密度獨立屋。A、B、C三塊地夾埋200萬呎，可以起到千單位住宅。

原白石角，度並無村屋，佢連埋隔離西南便樟樹灘、黃泥塊、蕉坑、坡面、排頭、大埔尾等村歸入大埔區。而白石角南便經已係沙田區境，所以南少少香港中文大學同赤泥坪山頭就係沙田區。

而新填地方便，科學園大部份響沙田區，只有第三期北便一少片入大埔區。其餘填地入大埔區。

起吐露港公路嗰陣，已經順便起埋單車徑，響大埔海側邊，可以由沙田踩去大埔。白石角新填地將單車徑同個海隔開咗，所以又響海邊起海濱公園同新單車徑，公園叫白石角海濱長廊。

因為呢條人流增大，第日有機會起東鐵綫白石角站或者科學園站，分擔下大學站人次，不過重未有定案，睇下有幾多人流而定。

而東鐵綫內側嘅填地，會畀香港中文大學起研究科學中心，替咗大學家下嘅科學館。

白石角距離東鐵綫大學站5分鐘車程，東鐵綫沙田站及大埔墟站10分鐘車程。白石角地理位置發展咗幾個大型豪宅項目，首先發展嘅有天賦海灣及逸瓏灣I、II。雲滙，嘉熙，海日灣I、II，逸瓏灣8，浪濤等會喺2019年年底相繼入伙。而新鴻基除咗發展雲滙，亦會喺吐露港馬路天橋對面發展優景里住宅項目。