尊嚴複數

呢幅油畫描繪 1900 年（晚年）嘅維多利亞女皇。

尊嚴複數（粵拼：zyun1 jim4 fuk1 sou3）係一種代名詞現象，講緊好有權力嘅人用眾數代名詞（我哋）嚟指自己，當中好有權力嘅人包括有歐洲諸國嘅君主或者教宗呀噉。尊嚴複數只會喺某啲語言先有，呢啲語言通常分佈於古代西亞、歐洲同埋英文圈等地。

歐語使用

尊嚴複數喺拉丁文叫 pluralis majestatis。

舉例說明，喺廿一世紀初嘅英文圈，就廣泛噉流傳住一個有關維多利亞女皇（十九世紀；維港個名就係由佢嗰度嚟嘅）嘅傳說：話說有一日，維多利亞女皇喺溫莎堡（英國王室嘅家族城堡）嗰度開晚宴，在場嘅王室人員同其他出席者喺度一路食飯一路傾偈交際；期間維多利亞女皇身邊有個人講咗個有啲不雅嘅笑話，維多利亞女皇就噉樣回應 ——

We are not amused.

呢句嘢就噉字面解係我哋並唔覺得好笑噉嘅意思。喺呢句說話入便，維多利亞女皇表達咗佢自己嘅感受，同時開口用我哋（眾數代名詞）一詞嚟講嘢，彷彿好似佢代表晒在場嘅人－甚至乎係全英國－講嘢噉嘅樣，展現咗佢幾咁威嚴。喺英文裏面，呢種使用 we 嘅方法又有叫做 royal "we"－即係「皇家式嘅我哋」噉嘅意思。

其他英倫君主都有用過「皇家式嘅我哋」。而喺英倫以外，歐洲第啲地區嘅君主以至係教宗等嘅宗教領袖，都有用過尊嚴複數。

聖經使用

希伯來文版嘅創世紀

睇埋：Elohim

响《摩西五經》嘅眾書之中，上帝都試過以眾數代名詞嚟自稱，例如係創世紀描述上帝創造天地嗰陣，就提到上帝講過噉嘅說話：

希伯來文：וַיֹּ֣אמֶר אֱלֹהִ֔ים נַֽעֲשֶׂ֥ה אָדָ֛ם בְּצַלְמֵ֖נוּ כִּדְמוּתֵ֑נוּ וְיִרְדּוּ֩ בִדְגַ֨ת הַיָּ֜ם וּבְע֣וֹף

大致粵譯：上帝話『我哋要照我哋嘅形像，照我哋嘅樣，造人類，俾佢哋掌管海上嘅魚同埋空中嘅禽鳥。』

對於點解上帝會用我哋自稱，基督教同猶太教有截然不同嘅睇法：基督徒傾向當爾句說話係支持三位一體論嘅證據－喺基督教傳統上，耶穌係上帝以血肉之軀現身嘅形態，係三位一體論中嘅子；相比之下，猶太教徒拒絕三位一體論，佢哋認為上帝係單一嘅，唔會化身成人出現；至於上帝因咩原因自稱為我哋，猶太教徒間就有觀點話上帝係用緊尊嚴複數－上帝有足夠嘅權威，能夠用佢「代表晒萬物」噉嘅口吻嚟發言。

睇埋

• 漢語嘅朕
• 人稱代詞
• 語言威望
• 雙層語言
• 領導才能

拎

• （英文） Royal "We"，電視橋段網有講尊嚴複數嘅概念。